Zekariya 10 - Mawu a Mulluku

Apwiya enalonjeza ovullusa

¹ Avekeni Apwiya wi yuuvaheni murimu mu enthawi yawaalla vawi alliwa sika enapanga mirapo. Alliwa sika enamurupiha murimu ni omumellihella mmiddo m'matani arive muthu.

² Vawi aterafimu enallota ddoolleka nave awoombesa makhanga enoona ddawoottha. Oottaphullella olloha ennuuhollosani nave enuullipihani murima nivuddo. Sika athu enneeteeta nngu ni nngu wonanko enkhosa yoohikhalla ni mbusa.

³ Kohaashella murima abusa nave kineerewaallaka oohoollella a mwiillaponimmo. Koma mi Apwiya Amasiva Mattheene kineerohoollella enkhosa ddaka, nibanja na Yuda nave kineerodditthattusa wonanko akavalo akhoto amasiva.

⁴ Mwa alliwa muneerokhuma oohoollella amasiva ookhalla wonanko nlluku noopaalleyesesa, ekhomo, apaalle muura wakhoto. Nave oolamulella attheene enaavenyereke mwa alliwa.

⁵ Ayuda attheene vamodda enaakhalle wonanko akhoto amasiva awaanyingallella adani m'musewuni enthawi yakhoto. Eneerowana ekhoto ekaamba yawi Apwiya eri ni alliwa nave eneerewaagonjiha adani oowella va akavalo.

⁶ “Nibanja na Yuda kineeronillipiha, edduullu dda Israele kineeroddaakiha. Athwaayo kineerewaahokollosella owaniwa kaambiiwa kooweerella echifundo. Sika enaakhalle wonanko ngaatathinlle vawi mi tti Apwiya Mullukwiiwa, kineerowaakhulla ddooveka ddiwa.

⁷ Aefuremu enaakhalle wonanko akhoto amasiva, eneerohakallalla wonanko athu oomuvona vinyo. Aniiwa eneeroddoona ddenndda, eneerohakallallattho m'murimani mwiwa muneeroddalla othapella, ekaamba ya nnddo yeerille Apwiya.”

⁸ “Kineerewiipa mutturu wi athwaaka etthukumane vamodda. Kineerowoopolla nave eneerewaata wonanko mmo yakhallelliiwa khalle.

⁹ Naari kaapallalleselle variyari va mitundu, komave o ellapo ddawoorekamannddo eneerokuupuwella. Alliwa ni aniiwa eneerovulluwa, eneerohokollweella owaniwa vamodda.

¹⁰ Kineerewaakhumiha o Iguputo ni waayaana owaniwa, kineerewaatthukumaniha ovenyera o Asiriya. Kineerewaaphiyana o Giliyadi ni o Lebanoni ophiyera ellapo ettheene eddanlle.

¹¹ Voollapuwani enyanja ya ddoohoosa, kineeromaalliha mafunde a va enyanjeeyo, maaddi mattheene a mu Nailo eneerowelleella. Wiitukhulla wa Asiriya oneeromalla, ekopo yoomwene ya Iguputo eneerokothowa.

¹² Kineerewaallipiha athwaaka, eneereweeta moollapella mu nnddina naka, mi Apwiya koollota.”