Zekariya 1 - Mawu a Mulluku

Namallotella anaachenjeza athu wi ehiye ddoonanara

¹ Mu mweeri waneetthanu ni raru wa muyakha waneepiilli wa omwene wa Dariusi, mawu a Apwiya yaawa wa namallotella Zekariya mwaana a Berekiya, edduullu ya Ido wi,

² “Apwiya yahaashella murima makhollwaanyu.

³ Sika alleelle athu wi Apwiya Amasiva Mattheene eni hokollweellani wa miyaano nave kineerohokollweella wa nyuwaano.

⁴ Muhikhalle wonanko makhollwaanyu ayo yiiwalle mawu a anamallotella akhalle ootthopoolla othengaaka wawi, ‘Hiyani makhallellwaanyu oonanara ni oochimwa.’ Koma alliwa kheyaawiiwellelle naari vang'ono, Mi Apwiya koollota.

⁵ Ethiyo makhollwaanywaayo eri wuuwi ollello? Nave anamallotella ennakhalla ni okumi woohimalla?

⁶ Ethiyo mawaaka ni malamulwaaka ayo kaalleelleemi oorumeyellaaka anamallotella kheyaamorenlle makhollwaanyu? Sika alliwa yaalapa ni ollota wi, ‘Ddawoona, Apwiya Amasiva Mattheene yaaneerella nnddo yallotilliiwa moollikana ni makhallellwaahu ni mitteko ddahu ddoonanara.’ ”

Masomphenya a akavalo

⁷ Va nllapo na 24 na mweeri waneekhumi ni mmodda, mweeri wa Shebati, muyakha waneepiilli wa omwene wa Dariusi mawu a Apwiya yaawa wa namallotella Zekariya mwaana a Berekiya mwaana a Ido. Sika Zekariya aallota wi,

⁸ “Mahiiyu kahoona ddeko mu masomphenya. Kaamoona muthu amuwenlle kavalo oofiira nave iimenlle va asimiteekho amakukhu muntaponi. Nave vatulli viwa vaari akavalo oofiira, oosiripa ni aweella.

⁹ Sika kaamukoha wi, ‘Apwiya, vano ella tti tini?’ Mungelo olle allota ni miyaano aakaakhulla wi, ‘Kineerewuutthopoollella ottaphullella wiwa.’

¹⁰ Vano muthu olle iimenlle va asimiteekho amakukhu ahaakhulla wi, ‘Alla sika ayo Apwiya yaarumalliiwa wi yeeteete mwiillaponi.’ ”

¹¹ Nave attheenaayo yaamulleella mungelo a Apwiya iimenlle va asimiteekho amakukhu wi, “Noheeteeta va ellapo yavatthi nave erive ello eri mwamurendelle ni mookeraattheya.”

¹² Vano mungelo a Apwiya aakoha wi, “Nyu Apwiya Amasiva Mattheene, ethiyo Yerusalemu vamodda ni mizinda ddittheddene dda o Yuda nnddo mwaddinanariwelleenyu wa miyakha makhumi matthanu ni meelli, munaaddummelle murima ophiyera niini?”

¹³ Apwiya yaamwaakhulla ni mawu ookhurumusa murima mungelo oyo allota ni miyaano.

¹⁴ Mungelo aakilleella wi, “Llalleya wi Apwiya Amasiva Mattheene enallota wi, ‘Maganizwaaka mattheene ni murimaaka muttheene ddiri va Yerusalemu ni Ziyoni.

¹⁵ Kohaananariwella wunchichi athu a mitundu ddimodda ayo eri vamurendelleni. Vawi kaananariwelleemi athwaaka mooyeva koma alliwa sika yoonjereriiwa waahoosa athwaaka.

¹⁶ Sika ekaambiiwa kihokollweelleemi o Yerusalemu ni murima weechifundo. Enyumbaaka eneeromakiwattho wenko nave eneerokusattho mukwe woolingella wi emakettho muzinda wa Yerusalemu, Mi Apwiya Amasiva Mattheene koollota.’

¹⁷ “Ollalleyettho wi Apwiya Amasiva Mattheene eni, ‘Mu mizinda ddaka muneerokhallattho eyuuma yinchichi. Kineeromukhurumusa murima Ziyoni nave kineeromutthattusattho Yerusalemu muzindaaka wavamurimani.’ ”

Masomphenya a manyaka

¹⁸ Mu masomphenya mamodda kahoona manyaka masese.

¹⁹ Kaamukoha mungelo olle allota ni miyaano wi, “Vano ella tti tini?” Olliye aakaakhulla wi, “Alla tti masiva a vatthimva ayo yaapallallesille athu a o Yuda, a o Israele ni a o Yerusalemu.”

²⁰ Vatulli viwa Apwiya yaakooniha oohana mikoko asese.

²¹ Sika kaakoha wi, “Vano alla enaweella tini?” Nave yaakaakhulla wi, “Ewiille wi yoopopihe ni ogonjiha mitundu dda athu nnddo ddanyenyille ellapo ya Yuda ni waapallallesa athwiiwa.”