Zefaniya 3 - Mawu a Mulluku

Ollotella dda Yerusalemu

¹ Otulli wa Yerusalemu, muzinda woowukila, wooripihiwa ni weekuku.

² Khaawiiwellelle mawu oochenjeza, khaawaapwathille oohumullulla. Khaawaaroromenlle Apwiya apaalle omwaatamella Mullukwaaye.

³ Enduna ddaye ddaanathuruma muwari mwiwa wonanko mikango, aweeruzaaye yaari wonanko akhatwe aweeteeta misikuwa, oohihiya nikhuva wi niphiyere ohinase.

⁴ Anamallotellaaye tti oohikhalla ni mutteko ni oohiroromelleya. Allupa mukuthwaaye ennaripiha ddoopatuleya, ennakhoromaniha malamulo.

⁵ Koma Apwiya tti oolungama m'muzindanimmo, tti a echiweruzo yaphaama. Enneeruza moolungama nllapo ni nllapo, enthawi ettheene khenalephela, koma athu oohilungama khenawulliwa muru.

⁶ Apwiya enallota wi, “Kohoononga mitundu ddittheddene dda athu, mipanda ddiwa dda akhoto kooddikumulla. Misewu ddiwa kooddoononga kheyiivottho ayo enaaweetemo. Mizinda ddiwa ddootthattuwa ntepe, khaavo naari muthu mmodda oyo ahanllemo.

⁷ Kaganiza wi athwaaka ennakoova, khetiwalla malamulwaaka, eneerewuupuwella ehuddihwaaka. Koma sika vano ettepilliiwa weera ddoonanara va mitteko ddiwa ddittheddene.”

⁸ Apwiya enallota wi “Ekaamba ya yeella kitiyereni, mutiyere nllapo nno kinaawiipeemini mullatu vawi kooganiza ddootthukumaniha mitundu dda athu ni moomweniiwa mattheene wi kiwoonihelle onanariwa waka, yiiwe ovoreya wa owallaaka. Ellapo ettheene yavatthi eneeroosha ni munllo wa osha murima waka.”

⁹ “Enthawi yeeyo kineereweelliha eyano dda mitundu ddittheddene dda athu, wi attheene yiithaneke nnddina na Apwiya, yaarumeyelleke nimodda.

¹⁰ Naari wuuteete, okhopella wa mihinje dda o Kushi, athu ookillapella, athwaaka oopallalleya, eneerovelleella mukutho wa miyaano.

¹¹ Nyu athu a o Yerusalemu, nllapo nenno khamuwa muwulliwattho muru, ekaamba ya ddoonanara ddittheddene mwakiwukilalleenyu. Vawi enthawi yeeyo kineerewuuvenyihellani, attheene awiitukhulla ni awiinyarulla. Khamuwa mweerattho ddawiitukhulla ddanyu, va mwaangwaaka waweella.

¹² Variyari vanyu kineerewaahiya awiiyeviha ni ookittha, alliwa eneerewaasha voothawellavo mu nnddina na Apwiya.

¹³ Oohalla a mu Israele khewa yeera yoohilungama, khewa ellotattho ddawoottha, khewa yeerattho ddoolleka. Eneerokhalla vaphaama vamurendelleni, oohikhallavo oyo anaawoopopihe.”

Nchipo na ohakallalla

¹⁴ Nyu athu a o Ziyoni, ipani moowelliha, nyu Aisraele, khuwani. Hakallallani, thapellani ni murimaanyu muttheene, nyu ookhalla mu Yerusalemu.

¹⁵ Apwiya ahuuvenyihellani ollakiwa wanyu, aawiikarihellani adanaanyu. Apwiya, mwene a Israele, eri ni nyuwaano, khamuwa moovattho erive yoonanara.

¹⁶ Nllapo nenno eneeromulleella Yerusalemu wi, “We Ziyoni, ohoove, mattaawo ehifooke.

¹⁷ Apwiya Mullukwaawo eri ni weyaano tti amasiva oovullusa. Eneerohakallalla ekaamba ya weyaano, kheyuuhumullulla ekaamba ya echikondiiwa, eneerohakallalla ni weyaano voowiipani machipo oohakallalliha.

¹⁸ Va mallapo eehakallallo, kineerewuuvenyihella otulli oyo onuukatamiha ni wuuvevulla.

¹⁹ Enthawi yeeyo kineerewaallaka awuunyingallella attheene. Kineerewaavullusa oottutthunya ni waatthukumaniha oopallalleya attheene. Kineerotthattusa owullihiwa muru wiwa okhalla oriihiwa nave ellapo ettheene yavatthi eneerewaavaha olemu.

²⁰ Enthawi yeeyo kineerewuutthukumanihani nave kineerewuuhokollosellani owaninyu. Kineerewuutthattusani athu oovuwa ni ooriiheya variyari va mitundu ddittheddene dda athu a va ellapo yavatthi, kineerewuuhokollosellani ddaphaama mwiikimoona. Mi Apwiya koollota.”