Zefaniya 2 - Mawu a Mulluku

Athu erukunuwe murima

¹ Nyu athu oohiwulliwa muru, ithananihani nave tthukumanani,

² adani ehinuumwareni wonanko mallulla, owalli wawoopiha wa Apwiya ohinuumorelleni, nllapo na osha murima wa Apwiya nihinuuphwanyeni.

³ Nyu attheene awiiyeviha, waashaasheni Apwiya, nyu muniiwellella malamulwiiwa. Ashaashani echilungamo ni wiiyeviha apaalle ttuuvulluwa va nllapo na osha murima wa Apwiya.

Apwiya eneerewoononga ellapo ddawaatamana ni Yuda

⁴ Muzinda wa Gaza oneerohiyiwa Ashikeloni aneerotthattuwa ntepe, Ashidodi aneerewiikarihiwa otthaana moorurumusa. Ekeroni aneerotulliwa.

Apwiya eneerewoononga ellapo ddawaatamana ni Aisraele

⁵ Otulli nyu okhalla ellapo ya o enyanja, nyu mutundu wa Akeretinu! Nyu athu a o Kanani, ellapo ya Filisti, mawu a Apwiya ennuuhumullullani wi “Kineerowoonongani attheene khavihalla naari muthu mmodda.”

⁶ Ellapo eyo eri mukhwipi mwa enyanja eneerotthattuwa moochihella ni makholla a eziweto.

⁷ Wenko oneerokhalla ellapo ya oohalla a mu nibanja na Yuda. Eneerekochiha eziweto ddiwa mukhwipi mwa enyanjeeyo, misikuwa enaakoneke enyumba dda Ashikeloni. Vawi Apwiya Mullukwiiwa eneerewaapwatha, eneerewaahokollosella ddaphaama.

Amowabu ni Aamoni

⁸ Apwiya enallota wi, “Kohiiwa ovevulla wa Amowabu ni oruwana wa Aamoni, mmo enaanyaambuselliiwa athwaaka, mmo eniitukhullelliiwa mwiillaponi mwiwa.

⁹ Sika ekaambiiwa mi Apwiya Amasiva Mattheene kinallupelleemi wi, ‘Kinimallupella vamiitthoni vaka, miyaano Mulluku Ookumi a Israele, Mowabu aneerewoonongiwa wonanko Sodomu, Amoni aneerewoonongiwa wonanko Gomora. Nipuronno ninaakhalle wonanko mapuro oomella miiwa nlliti namwiinyu, ellapo yeechipululu wa enthawi yoohimalla. Athwaaka oohalla eneerewaakha mapuro oovulluwa eneerewaakhella wi ekhalle yoohallaniiwa.’ ”

¹⁰ Nngu onaakhalle ollakiwa kaambiiwa yahiitukhulla, yahaavevulla Apwiya Amasiva Mattheene.

¹¹ Vano Apwiya eneerowoopopiha, eneerewoononga milluku ddittheddene dda va ellapo yavatthi. Sika athu attheene eneerewaallapella Apwiya, arive muthu vanipuroni vaye, orive mutundu wa athu o ellapwiiwa.

Akushi ni Aasiriya

¹² Nyuttho Akushi, muneerewiiphiwa ni nsupada naka.

¹³ Apwiya eneerotukhullella nnatta niwa ompoto owoononga Aasiriya, muzinda wa Nineve eneerowutthattusa ntepe, wawumma wonanko echipululu.

¹⁴ Sika vano eziweto ddinaakoneke wenko navettho enama ddittheddene ddamuhakani. Ephangwi ni eddiiddi ddineerekokona mu miru dda apotwiiwa, ddineerekonyakulla m'mawindoni, anakhuku eneerekokhalla va nthato niwa, matabwiiwa amikunguza eneerovenyihiwavo.

¹⁵ Yooyo tti muzinda oyo waddeesa wookeraattheya, oyo m'murimani mwiwa wallota wi, “Meeneve, khaavottho mmodda!” Vano ngoonani mmo woonongeyelliiwa! Wootthattuwa ntepe nookhallamo enama ddamuhakani, arive muthu oovira mwemmo aneerekewoopa musoonyo nave aneerekotikha muru.