Zefaniya 1 - Mawu a Mulluku

¹ Mawu a Apwiya yaawa wa Zefaniya, mwaana a Kushi, mwaana a Gedaliya, mwaana a Amariya, mwaana a Hezekiya va enthawi ya olamulello wa Yosiya mwaana a Amoni mwene a o Yuda.

Nllapo na echiweruzo ya Apwiya

² Apwiya enallota wi, “Kineerodditthollosa ddittheddene dda va ellapo yavatthi.

³ Kineerowoononga athu ni enama ddene, kineerowoononga epallame ddamuddullu ni ehomba ddamunyanja, kineerewaatthollosa athu oochimwa, kineerowoononga athu attheene waavenyiha va ellapo yavatthi,” Mi Apwiya koollota

⁴ Kineerotukhulla nnatta naka wi kaallake athu a mu Yuda ni a mu Yerusalemu. Kineerewoononga ddittheddene ddoohalla dda Baala va nipuro nenna. Khaavo oyo anaawuupuwellettho allupa mukutho a nifanonno.

⁵ Kineerowoonongattho ayo enakokhora vaddullu va enyumba ddiwa enallapella nndduwa, mweeri ni etheneeri. Kineerowoonongattho ayo enaallapella Apwiya enallupella mu nnddina niwa, nngu ellupellaka mu nnddina na Milikomu.

⁶ Alliwaayo yahaareya etulli Apwiya ehinaathwarattho, ehinawaashaasha apaalle waaveka ezeru.

⁷ Khurumuwani vamiitthoni va Apwiya Mulluku! Nllapo na Apwiya nohaatamella. Apwiya aakhoza mukutho nave ahaapatula khalle awiithaniwa.

⁸ Apwiya enallota wi, “Va nllapo nenno, nllapo na mukuthwaaka, kineerewaallaka anamwani a mwene ni enduna ddaye ni attheene ookuseya murima ni makhallello eelleto.

⁹ Va nllapo nenno kineerewaallaka attheene oollapella wonanko athu eelleto ni ayo enaphwanya eyuuma mwa ekuku ni moolleka wi eddallihe enyumba ya apwiiwa.”

¹⁰ Apwiya enallota wi, “Va nllapo nenno winlla wuullupalli oneerewiiweya o mullako wa Musika Weehomba, ekutho yuullupalli oneerewiiweya o echigawo ya variyari va muzinda wa Yerusalemu, oneerowiiweyattho okhuwa wa okumuwa ovenyera o asimiyaango.

¹¹ Nyu ookhalla wookittha, opani ekutho vawi ookulliha malonda attheene aatthollowa, attheene oomukulliha siliva ahoonongeya.

¹² Va enthawi yeeyo kineerewaashaasha mu Yerusalemu ni enyali, kineerewaallaka athu awi moona okeraatthi wonanko vinyo ookeraattheya ayo m'murimani mwiwa enallota wi, ‘Apwiya kheneera yaphaama apaalle yoonanara.’

¹³ Eyuumiiwa eneerewaakhiwa ni adaniiwa, enyumba ddiwa eneeroddikumulla. Eneeromaka enyumba koma khewa ekhallamo. Eneerewaalla emata ddampesa koma khewa emuwirya vinywiiwa.

¹⁴ Nllapo nuullupalli na Apwiya nohaatamella, niri vakhuviru nave nineerophiya mwawaakuva. Nllapo nenno oneerokhalla okhuwa woovoreya naari akhoto amasiva aneerewinlla mookhuwa.

¹⁵ Nllapo nenno ninaakhalle nllapo noosha murima, nllapo na ddookatamiha ni na ddoohoosa, nllapo nawoonongeya ni otthollowa, nllapo neepiphi yuullupalli, nllapo namirapo ddoottika,

¹⁶ nllapo namapallapata ni okhuwella mizinda dda mipanda ni mattattha a akhoto.”

¹⁷ Apwiya enallota wi, “Kineerewaahoosa wawoopiha wawi eneeteke wonanko oohoona vawi yaakichimwella. Nikhame niwa ninaakhalle virive veko wonanko nthupi, miilli ddiwa ddinaakhalle virive veko wonanko mashi eeng'ombe.

¹⁸ Naari siliviiwa apaalle golidiiwa, khawora owoopolla va nllapo na osha murima wa Apwiya. Owalliiwa tti wonanko munllo, onnashellelliha ellapo ettheene, moorurumusa eneerewaamalla attheene ookhalla mwemmo.”