Yuda 1 - Mawu a Mulluku

¹ Ovenyera wa miyaano Yuda, oorumeyella a Yesu Khrisitu ni mwanamunne a Yakobo. Kinuulembellani nyuwaano mwiithaniwe nave munakondiwa ni Mulluku Attiitthaanyu ni oteteziwa ni Yesu Khrisitu.

² Echifundo, murendelle ni echikondi ddawaata, ddoovenyera wa Mulluku ddikhalle ni nyuwaano.

Ahuddihi awoottha

³ Akhwaaka ookondiwa, kaapaallesesa wuulembellani dda ovullusiwa nko attheene nirinaahu mwa Yesu Khrisitu. Koma kahoona wi tti waphaama wuulembellani vano wi kuuvekeni wi mullipanena oteteza echikhulupililo eyo Mulluku aavahilleeye athwaaye aweella omoddave wenko.

⁴ Vawi athu amodda oohikhulupilila yaavollowa variyari vanyu mwawiitta. Yaalla tti athu ayo enaanganyera echisomo ya Mullukwaahu wi ephwanyellevo yaweerella machimo oorarawu, ayo enamukhoota Yesu Khrisitu, yooyove ari ooholleellaahu ni Apwiihu. Ddaalembiwa khalle mu mawu a Mulluku wi athu yaalla eneerollakiwa.

⁵ Naari mwadduwenlle khalle ddittheddene vano kinapaalla kiwuupuseni wi Apwiya yaavullusa Aisraele ovenyera o Iguputo koma vatulli viwa yaawoononga attheene a alliwaayo ayo yahikhulupilila.

⁶ Muupuwelle angelo ayo yahikwakhwanihiwe ni olamulellwiiwa nave yaahiya mookhalla mwiwa. Mulluku ahaamaka ni onyolo woohiphaddeya nave ohaahiya onipuroni neepiphi ophiyera nllapo naweeruza nuullupallinne.

⁷ Muupuwelle Sodomu ni Gomora ni matawoni awaatamanana, nko athu yeerille ddoophwanaphwana ni nnddo yeerille angelwaalle. Athwaalla yaheera machimo ooraruwa ni machimo amodda oohiphwanella weeriwa ni muthu. Mulluku ahaallaka ni munllo woohimalla wi aachenjeze athu amodda.

⁸ Athu ayo yavollowille variyari vanyu eneera emoddamoddave yeeyo voothwarani ddoolloha ddiwa. Ennaripiha miilli ddiwa voochimwani, ennakhoota olamulello navettho enaallotella epewe angelo.

⁹ Koma naari Mikaele, muullupalli a angelo, ahoova omwiipa mullatu Satana voomullotellani epewe. Nave akanganeeye ni Satana voovaanyihana dda mutembo wa Mose wi ttaani aphwanenlle owuukusa koma aallotille wi, “Apwiya yuullake.”

¹⁰ Koma athu yaalla enallotella epewe erive ello ehinadduwelliiwa. Nave nnddo enadduwelliiwa ni ezeru ddooyariwana, wonanko dda enama ddoohakani, tti ddennddo ddinaawononga.

¹¹ Yaayo aakhalla ni otulli vawi enakhalla wonanko Kaini. Ennachimwa wonanko Balamu ekaamba yoopaalla makobiri. Eneerewoonongeya ekaamba yoomuwukila Mulluku wonanko enre Kora.

¹² Yaalla sika enaripiha machellellwaanyu oohakallallella eyaattano mumpingoni vawi ennikonda weekhiiwa moohiwulliwa muru. Tti wonanko mirapo ddookakhiwa ni ephevo nave ddoohimurupiha murimu. Tti wonanko miteekho ddoohimma ezipaso naari ophiyalle omamallihello wa enthawi yoohata ezipaso. Tti wonanko miteekho ddootulliwa nave ddaakhwa.

¹³ Ddaweera ddiwa ddoowulliha muru ddinooneya wonanko niphoru na mafunde awoopiha a va enyanja. Tti wonanko etheneeri ddaweeteeta nave Mulluku ohaasungella nipuro na epiphi yooripa yoohimalla.

¹⁴ Enoki, muthu a mbado waneetthanu ni piilli ovenyera va Adamu, aallotella dda yaalla wi, “Ngoonani! Apwiya eneeroowa ni angelwiiwa ooheerengeya.

¹⁵ Eneeroowa wi eweeruze athu attheene nave eneerokamulla wi attheene oohaakhulupilila alliwa tti oochimwa ekaamba ya mitteko ddiwa ddoonanara eneeriiwa yaachimwaka navettho ekaamba yawi yaamullotella epewe olliye.”

¹⁶ Athu yaalla ennawinya wunchichi. Nave enathwara minkhella ddiwa ddoonanara. Ennallota mwawiitukhulla nave ennaariiha athu mwawoottha wi epindulevo.

Ochenjeza ni olangiza

¹⁷ Koma nyuwaano akhwaaka ookondiwa, muupuwelle ddallotiwe ni amurummwa a Apwiya Yesu Khrisitu.

¹⁸ Yahuulleellani wi, “Va mallapo oomallihella vineerokhalla athu oovevulla, owiitukhulla voothwarani minkhella ddiwa ddoonanara.”

¹⁹ Athu yaalla tti ayo enaambiha okawaneya, enathwara ddeko ddoonanara dda vatthimva nave khenna Munepa Waweella.

²⁰ Koma nyuwaano, akhwaaka ookondiwa, muwumake okumaanyu va matthipello a echikhulupililo yaweella. Nave muvekelleke moohoollelliwa ni Munepa Waweella.

²¹ Mukhalleke mu echikondi ya Mulluku, mwaatiyeraka okumi woohimalla oyo Apwiya Yesu Khrisitu eneeriiwa yuuvaheni mwa echifundwiiwa.

²² Muweerelleke echifundo ayo enakayikella.

²³ Nave mwaavulluse amodda voowaakihani ovenyera omunlloni nave muweerelleke echifundo amoddattho koma muchenjere nave mwiitaneke ni yoowariiwa yooripihiwa ni machimo.

Nivekello noomutitimiha Mulluku

²⁴ Nave wa olliye oyo anawora wuutetezani wi muhichimwe ni owiimesani mu ntitimiho naye moohikhalla ni yoochimwa nave moohakallalla ni murimaaye muttheene,

²⁵ wa Mulluku mmoddave yooyo, Oovullusaahu mwa Yesu Khrisitu Apwiihu, okhalle ntitimiho, ottekweene, masiva ni olamulello ovenyera ehinaambe enthawi, ollello ni mallapo mattheene a muhoollo. Amen.