Yowele 3 - Mawu a Mulluku

Apwiya eneereweeruza mitundu dda athu

¹ Apwiya enallota wi, “Enthawi yeeyo kineerewaahokollosella ddaphaama athu a o Yuda ni a o Yerusalemu.

² Kineerotthukumaniha mitundu ddittheddene ni oddiwaana ohito wa ntapo na Yehoshafati. Wenko kineeroweeruza ekaamba ya nnddo yaweerelliiwa Aisraele, athwaaka ni yoohallanaaka vawi ahaapallallesella mu ellapo ddiwa ddittheddene nave ayikawakawa ellapwaaka.

³ Ahoombesa wi yaakawane athwaaka, aamwaakakhaniha musombwe ni hule aamwakakhaniha namwalli ni vinyo wi elezele.”

⁴ “Ethiyo nyu athu a o Tiro, Sidoni ni a o ezigawo dda Filistiya, munapaalla mukeere tini? Ethiyo munakihokollosella ekaamba ya nnddo kiweerelleemini? Ddaarimi ddiri ddiiddo, nameenettho kineerewuuhokollosellani mwawaakuva.

⁵ Vawi mookaakha silivaaka, golidaaka ni eyuumaaka yoowallamella mutengo muddihiya mu enyumba dda milluku ddanyu.

⁶ Mohaakulliha athu a o Yuda ni a o Yerusalemu wa Agriki* woorekamella ni owaniwa.

⁷ Koma kineerewaakhumihawo omapuroni nko mwaakullihalleenyuwo nave kineerewuuhokollosellani nnddo mwaweerelleenyu.

⁸ Kineerewaakulliha aniinyu aallopwana ni aatthiyana wa athu a o Yuda nave alliwa eneerewaakulliha wa Aseba, woorekamella ni owaniwa.” Mi Apwiya koollota.

⁹ “Llalleyani wa athu a mitundu ddittheddene wi, ‘Khozekellani ekhoto, wiithaneni akhotwaanyu amasiva, atthukumaniheni athu akhoto attheene wi yaatamelle, alleelleni wi esusellewo.

¹⁰ Hanani ehipa ddanyu wi ddikhalle masupada, ezikwakwa ddanyu wi ddikhalle mavaka. Naari oofooka allote wi, Mi tti akhoto.

¹¹ Nyu attheene awaapheella, akuvani nave muwe, tthukumanani wenko.’ ” Nyu Apwiya, akitthiheni akhotwaanyu.

¹² “Athu a mitundu ddittheddene ekhozeke, ephiye o ntapo na Yehoshafati. Wenko kineeroweeruza athu a mitundu ddittheddene, oovenyera mu ezigawo ddawaapheella.

¹³ Kusani echikwakwa vawi ohata wohaatamella, Waawoni muwuvote mpesa, vawi moovotellamo mpesa mooddalla. Mino ddinimasefukella, ddawoona machimo a athu ahaata.”

¹⁴ Athu ooheerengeya eri mu ntapo na Echiweruzo, nllapo na Apwiya nohaatamellawo.

¹⁵ Nndduwa ni mweeri ddinnathiima, etheneeri ddinnahiya owala.

Apwiya eneerewaadalisa athwiiwa

¹⁶ Apwiya enimathuruma ovenyera o mwaango wa Ziyoni, mawiiwa eniiweya wonanko ogugudeya wa murimu ovenyera o Yerusalemu, oddullu ni ellapo yavatthi ddinimatthukumella. Apwiya tti woothawellawo wa athwiiwa, esiri yoollipa ya Aisraele.

¹⁷ Vano we Israele, oneerodduwella wi, mi tti Apwiya Mullukwaawo oyo kinakhalla o Ziyoni, mwaangwaaka waweella. Yerusalemu anaakhalle oopatuleya, adani khewa emugonjihattho.

¹⁸ “Nllaponno naphiya miyaango ddineeromukhumiha vinyo ooddiva, asimiyaango eneereweeta mukaka. Mihinje ddittheddene dda o Yuda ddineeroddalla ni maaddi, neetuutu aneerokhuma mu enyumba ya Apwiya, aneerohellella ntapo na Shitimu.

¹⁹ Iguputo aneerotthattuwa echipululu, Edomu anaakhalle ntepe noohikhalla athu ekaamba ya ekhoto yahelliwe athu a o Yuda ni owiipha athu oohilakwa mwiillaponi mwiwa.

²⁰ Koma Yuda aneerokhalliwa wa enthawi yoohimalla, Yerusalemu khawa amalla athu o mibado ddittheddene.

²¹ Kineerohokollosella ddoonanara ekaamba ya ayo yiiphiwe, oochimwa ngaahiya ddiiddo oohaallaka vawi mi tti Apwiya ookhalla o Ziyoni.”