Yowele 2 - Mawu a Mulluku

Nazombe tti ochenjeza wa nllapo na Apwiya

¹ Ipani nipallapata o Ziyoni, khuwani moochenjeza va mwaangwaaka waweella. Nyu attheene ookhalla mu Yuda tthukumellani vawi nllapo na Apwiya ninimawa, nohaatamella.

² Tti nllapo neepiphi ni neethakaraka, nllapo namirapo ddoottikana. Mulloko wa amasiva, tti wonanko epiphi ehuruwelle miyaango, khonooneyekevo waambeella khalle nave khowa wooneya.

³ Munllo onnallandda muhoollo mwiwa, mutulli mwiwa, munllo onnaviha, owiitthoni wiwa ellapo tti wonanko emata ya Edeni, otulli wiwa tti wonanko echipululu moohikhalla ello, khaavo anaavulluwe.

⁴ Mooneyellwiiwa tti a akavalo, othamaka wiwa tti wa akavalo akhoto.

⁵ Annaruma wonanko magareta voowellani miyaango, anniiweya wonanko manasi awumma vamunlloni ennatthattana wonanko akhoto amasiva enakhozekella ekhoto.

⁶ Aatamellaka, athu ennoova, ekhove ddittheddene ddinniithwa.

⁷ Ennathamaka wonanko akhoto, annawella mipanda wonanko akhoto. Arive muthu anneeta vamuzerani, oohitiwalla ettillaaye.

⁸ Khenakakhanakakhana, enneeta mu ettilla ddiwa, ennavira variyari va ezida ddakhoto kheyiivo enaawiimesa.

⁹ Annalluphella m'muzindanimmo, annawella vaddullu va mipanda, ennavollowa mpa, oweella m'mawindoni wonanko allupaawiiya.

¹⁰ Ellapo yavatthi ennatikheya alliwa yaawaatamellaka. Oddullu onnatthukumella, nndduwa ni mweeri ddinnathiima, etheneeri ddinnahiya owala.

¹¹ Apwiya ennakhuwella milloko ddiwa ddakhoto, oowiiwellellaayo tti amasiva nave ooheerengeya. Nllapo na Apwiya tti nuullupalli nave nawoopiha. Ethiyo ttaani anaavulluwe?

Apwiya enawiithana athu wi elape

¹² Koma naari ollellova, Apwiya enallota wi, “Lapani nave muhokollweelle wa miyaano ni murimaanyu muttheene. Hallani ocha, inllani ekutho ni omoriha ethakaraka.

¹³ Ahullani murimaanyu ohiri ddoowara ddanyuve.” Hokollweellani wa Apwiya Mullukwaanyu vawi alliwa tti eechifundo ni ooreera murima, oohisha murima mwawaakuva ni ooddalla ni echikondi yoohisintheya, ni oohiya ollaka.

¹⁴ Apaalle ttuusintha maganizwiiwa ni wiihiiha, ttuuwuudalisani ni ddoocha ni ddoowirya ddawi muvelleelle wa Apwiya Mullukwaanyu.

¹⁵ Ipani nipallapata vamwaangoni wa Ziyoni, alamuleni athu ehalle ocha, ithanihani mutthukumano woopatuleya.

¹⁶ Atthukumaniheni athu, alleelleni wi yiipatule. Atthukumaniheni awuulluvalla, anamwani ni akantchewa. Mulamule wi naari ootthellana wene ekhumemo muzipindani mwiwa.

¹⁷ Allupa mukutho enaarumeyella Apwiya yinlleke variyari va nikhote na apoto ni nikuwa na mukutho. Elloteke wi, “Nyu Apwiya, weerelleni echifundo athwaanyu, muhaakhullelle wi mitundu ddimodda ddinyaambuseke ni ovevulla yoohallanaanyu voollotani wi, ‘Ari wuuwi Mullukwaanyu?’ ”

Apwiya enahokollosella ellapo okhalla ya ddoocha

¹⁸ Vano Apwiya yahaamba okondattho ellapwiiwa, enaweerella echifundo athwiiwa.

¹⁹ Apwiya yahaakhulla ni ollota wa athwiiwa wi, “Vano kineerewuurumihellani tirigu, vinyo ni makhura a olivi wi muvoneke wunchichi, nave mitundu ddimodda khadduunyaambusanittho.

²⁰ Kineeromwiikara oovenyera ompoto wi yuurekamelleni, kineeromwiikarella o ellapo yawumma ni yoohikhalla ni athu. Amuhoollo kinaawiikarelle onyanjani ya wookhuma nndduwa, amutulli kinaawiikarelle onyanjani ya woovollowa nndduwa. Vano eneerewuunta nave eneerewunkha, kineerowoononga ekaamba ya ddittheddene eweerelleewani.”

²¹ “We ellapo, ohoove, thapella nave hakallalla vawi Apwiya aaweerella dduullupalli.

²² Nyu enama ddamuhakani, muhoove vawi munyepu wa mu echipululu onimaphuwa, miteekho ddinimiima ezipaso, namukuyu ni mpesa ddinimiima wunchichi.

²³ Nyu athu a o Ziyoni, hakallallani thapellani ni nnddo Apwiya Mullukwaanyu eweerelleewani. Aaweerellani echifundo voomurupihani murimu eeyitta, ntthokollapallaka ni murimu awaallella.

²⁴ M'mapuroni moomuuputhellamo tirigu muneeroddalla, moovotellamo mpesa muneerosefukella vinyo ni makhura a olivi.

²⁵ Kineerewuuhokollosellani mmiddo ddanyu ddittheddene nnddo ddaachiwe ni nazombe a mitundu ddittheddene miyakha ddenndde. Ollathi sika mulloko wakhoto oyo kawurumihalleemi wi owoonongeni.

²⁶ Muneerocha ddinchichi ni ovona, muneerotitimiha nnddina na Apwiya Mullukwaanyu eweerelleni ddoottikhiniha. Athwaaka khewa enyaambusiwattho.

²⁷ Vano Israele, oneerodduwella wi kiri variyari vawo, miyaano Apwiya tti Mullukwaawo khaavottho mmodda. Athwaaka khewa enyaambusiwattho.”

Nllapo na Apwiya

²⁸ “Vatulli viwa kineerohella munepaaka va athu attheene, aniinyu aallopwana ni aatthiyana eneerollotella, athu awuulluvalla eneerolloha, asombwe eneerewoona masomphenya.

²⁹ Enthawi yeeyo kineerokitthiha Munepaaka, naari va akaporo aallopwana ni aatthiyana.”

³⁰ “Kineerewooniha ddoottikhiniha, oddullu ni ellapo yavatthi, nikhame, munllo ni mwiisi woottikana.

³¹ Nndduwa nineerothiima, mweeri oneerofiira wonanko nikhame nihinaphiye nllapo nuullupalli ni nawoopiha na Apwiya.

³² Vano attheene ayo enaawiithane mu nnddina na Apwiya eneerovullusiwa, vawi mu mwaango wa Ziyoni ni mu Yerusalemu muneerokhalla ovullusiwa monga Apwiya yallotilliiwa, ni mwa oohalla ayo Apwiya yawiithanilliiwa.”