Yowele 1 - Mawu a Mulluku

¹ Mawu a Apwiya yaaphiya wa Yowele mwaana a Petuwele.

Athu eninlla ekaamba ya mullilli wa nazombe

² Nyu attekweene apellani maaru Nyu attheene ookhalla mu Yuda, kireyeni naaru. Ethiyo ddenndda ddaambilleke weereya mu enthawaanyu apaalle mu mallapo a makhollwaanyu?

³ Mwaatthopoollelle aniinyu, alliwattho yaatthopoollelle aniiwa aniiwaayo etthopoollellettho mbado mmodda.

⁴ Eyo nazombe ayihiyalleeye, yaachiwa ni nazombe mmodda eyo nazombe yoolla ayihiyalleeye, yaachiwattho ni nazombe mmodda. Eyo nazombe mmoddoolla ayihiyalleeye yaachiwattho ni nazombe mmodda.

⁵ Nyu oolezela, venyani mwinlle, nyu attheene oomuwirya vinyo, mwinlle mookhupanya ekaamba yawi vinyo oonang'aneya, oohiihiwa vayanoni vanyu.

⁶ Mullilli muullupalli wa nazombe wooddalla mwiillaponi mwaka, wamasiva navettho wooheerengeya. Miinwiiwa tti a mukango waamullopwana, etwaatwara ddiwa tti dda mukango waamutthiyana.

⁷ Ohoononga mpesaaka, ohinttaka miteekho ddaka ddanamukuyu, ooddikhwarullella, ooddikumburulla makulliiwa aatathilla, addihiya enthambi ddiwa ddiri mbee!

⁸ Nyu athu, inllani wunchichi, wonanko namwalli awanre echiguduli ekaamba ya okhwa wa musombwe oyo apaalla omutthella.

⁹ Mikutho dda ddoocha ni dda ddoowirya khaddinavelleelliwa o enyumba ya Apwiya. Allupa mukutho eniminlla, oorumeyella a Apwiya.

¹⁰ M'matani mohoonongeya ethaya eniminlla, vawi tirigu ohoonongeya vinyo oolepheleya, miteekho dda olivi ddohumma.

¹¹ Nyu oollima, tathillani murima nyu oollima mpesa, inllani vawi tirigu ni barele ni ddittheddene ddam'matani ddoolepheleya.

¹² Mpesa wohumma, namukuyu oonyaalla, Makangaza, kanjeza, miteekho dda mapulosi ni miteekho ddittheddene dda mwiillaponi ddohumma, sika ohakallalla wa athu woomalla.

¹³ Nyu allupa mukutho, warani eziguduli, nyu oorumeyella onikuwani, inllani, nyu oorumeyella a Mullukwaaka, ikhuneelleni ni eziguduli mahiiyu mattheene. Mikutho dda ddoocha ni dda ddoowirya khaddinavelleelliwa o enyumba ya Mulluku.

¹⁴ Alamuleni athu wi ehalle ocha, ithanihani mutthukumano woopatuleya, atthukumaniheni oohoollella ni Ayuda attheene ewe o enyumba ya Apwiya Mullukwaanyu yinllelle wa alliwa.

¹⁵ Moowe kookhwa! Nllapo na Apwiya niri vakhuviru, nno Amasiva Mattheene anoonongeyiiwa, ddawoona, nllapo nenno ninaawe ni ddawoopiha!

¹⁶ Khaninna yaweera vawi yoochaahu yohoonongeya, ohakallalla khawiiwo naari vang'ono o enyumba ya Mullukwaahu.

¹⁷ Mmiddo woonyaalla vawi ethaya tti yawumma, tirigu awi nimusunge khaawo, ekhokwe ddohoonongeya vawi khamuri ello.

¹⁸ Eng'ombe ddiniminlla ni ettalla, ddinimoona weeteeta ekaamba yoorama munyepu naarittho enkhosa ddinimahoowa.

¹⁹ Nyu Apwiya, kinimawinllellani vawi munyepu woosha ni munllo miteekho ddamuhakani ddohaavuwa ekaamba yawi munllo wooddoononga.

²⁰ Naari enama ddamuhakani ddininllella wa nyuwaano ekaambiiwa mihinje ddittheddene ddoowelleella nave munllo wooshellelliha moochihellamo, ohakani.