Yoswa 9 - Mawu a Mulluku

Agibiyoni enamulleka Yoswa

¹ Mamwene mattheene ookhalla woovollowa nndduwa wa muhinje wa Yordani yahiiwa ddenndda. Attheene ookhalla m'miyaangoni, mutapo ni mukhwipi mwa Enyanja Yuullupalli ya ompoto wa Lebanoni alliwattho yahiiwa. Yaalla tti mamwene a Ahiti, Aamori, Akanani, Aperezi, Ahivi ni Ayebusi.

² Attheene yaatthukumana wi ewane ni Yoswa ni Aisraele attheene.

³ Vano Ahivi a o Gibiyoni yiiwalle nnddo Yoswa eerilleeye ni muzinda wa Yeriko ni wa Ai,

⁴ yaaganiza ddoomulleka. Yaaya yaareya abulwiiwa ddoocha dda m'mathumbani akhalle navettho mathumba a vinyo anttapara akhalle.

⁵ Yaawara esapato ddakhalle dda ezigamba navettho ddoowara ddamatapwata. Buledi yamukusalliiwa aari awumma ni eenguwi.

⁶ Vano yaaya omisasani o Giligala emulleella Yoswa ni Aisraele attheene wi, “Hi nivenyenre o ellapo yawuuteete nave ninapaalla nipangane ni nyuwaano.”

⁷ Koma Aisraele yaawaakhulla Ahivi wi, “Apaalle owaninyu tti mukhuviru mwemmu. Vano ninaapangane mwawiidde?”

⁸ Alliwa yaamulleella Yoswa wi, “Hi niri akaporwaanyu.” Vano Yoswa ahaakoha wi, “Ethiyo nyuwaano ttaani? Muvenyenre wuuwi?” Athwaayo yaamulleella mwaha muttheenooyo wi,

⁹ hiyaano akaporwaanyu nivenyenre o ellapo yawoorekama ekaamba yawi nohiiwa dda Apwiya Mullukwaanyu. Nohiiwa epilli ettheene ya nnddo eerilleeye o Iguputo,

¹⁰ navettho wa mamwene meelli a Aamori wookhuma nndduwa wa muhinje wa Yordani, wa Sihoni mwene a o Heshiboni navettho wa Ogi, mwene a o Bashani, oyo akhalla a o Ashitaroti.

¹¹ Vano oohoollella ni athu attheene ookhalla mu ellapwaahu yaanilleella wi, “Khozani ddoocha dda voolendoni, khaweni mwakumanena athu yaayo nave mwallote wi ‘Hiyaano akaporwaanyu noogonja, pepaani mwiiwanane ni hiyaano ddamurendelle.

¹² Ngamooneni buledoolla. Navenyeehu owanihu buledi yoolla aari avihaka koma ngamooneni ohumma nave ookhalla ni enguwi.

¹³ Namuhellamwaahu vinyo, mathumbaalla yaari masha koma vano ngoonani ahaahuwa. Ddoowara ddahu nave esapato ddahu ddohaahuwa, ekaamba ya orekama wa olendo.’ ”

¹⁴ Aisraele yaallawiha ddoocha ddiwannddo ehaakohille Apwiya.

¹⁵ Sika Yoswa aapanganana dda murendelle, allota wi khawiipha. Oohoollella a Aisraelaayo yaallupella ni osimikiza echipanganweeyo.

¹⁶ Viviralle mallapo mararu epanganille, Aisraele yahiiwa wi athwaayo yaari athu awaatamanana nave yakhalla variyari viwa.

¹⁷ Vano Aisraele yaavenya eya owaniwa wa athwaayo nave omuroto wiwa yaaphiya o mizinda ddiwa nnddo ddaari Gibiyoni, Kefira, Beeroti ni Kiriyati Yearimu.

¹⁸ Komathi Aisraele kheyaawonre owiipha athwaayo vawi oohoollelliiwa yaari ellupenlle wa Apwiya Mulluku a Aisraele dda athu yaalla. Sika Aisraele attheene yahaamba okhupanya wa oohoollelliiwa dda ddenndda.

¹⁹ Koma oohoollellaayo yahaakhulla wi, “Hi naallupella wa Apwiya Mulluku a Aisraele sika khaniwora owiipha.

²⁰ Hankoni naahiye ekhalle ni okumi wi osha murima ohinimorelle ekaamba ya ollupella nko nallupenlleehu wa alliwa

²¹ Ahiyeni ekhalle akumi” sika yaatthattuwa oowaashella ekhuni ni owaarikella maaddi moollikana ni mmo yallotelle oohoollellaalle.

²² Yoswa aawiithana Agibiyonaayo aakoha wi, “Kaambiiwa tini mwanillekilleenyu wi munavenyera wuuteete koma muri amukhuviru mwemmu?

²³ Vawi moheera ddenndda Mulluku ohuutembelelani khaavo mmodda a nyuwaano anaattaphuwe wuukaporoni. Erive enthawi nyuwaano sika munanaashereke ekhuni ni onirikella maaddi o enyumba ya Mulluku.”

²⁴ Alliwa yahaakhulla wi, “Apwiyaahu, hiyaano naheera ddenndda kaambiiwa nahiiwa wi Apwiya Mullukwaanyu, yaamulamula oorumeyelliiwa Mose wi uuvaheni ellapo ettheeneella nave wi muwiiphe athu attheene orive weko nko munawaphwanyeenyu. Sika naheera ddenndda vawi naawoovani wunchichi nave napaalla ovullusa okumaahu.

²⁵ Vano niri m'mattani mwanyu, oonilamulella tti nyuwaano nave muneerelle eyo enuuddivellani.”

²⁶ Sika Yoswa ahaateteza athwaayo wi Aisraele ehiweerelle ddoonanara apaalle owiipha.

²⁷ Koma enthawi yeeyo, yaatthattuwa oowaashella ekhuni navettho owaarikella maaddi athu a vamutthukumanonimvo ni o nikuwani na mukutho na Apwiya. Ophiyera ollello, enneerave ddenndda o orive nipuro nko Apwiya enaatthoolliiwa.