Yoswa 8 - Mawu a Mulluku

Woonongeya wa muzinda wa Ai

¹ Apwiya yaamulleella Yoswa wi, “Ohoove apaalle otathilla murima. Akuse akhoto attheene ethaanane ni weyaano, venya oye o Ai. Kineeroweerihani wi mumugonjihe mwene a o Ai ni athwaaye attheene. Muzindooyo ni ellapweeyo, ddittheddene ddinaakhalle ddaanyu.

² Mweere ni muzinda wa Ai ni mweneene wonanko mmo mweerelleenyu ni muzinda wa Yeriko ni mweniiwa. Koma katundu a m'muzindanimmo ni enama muddaakhe wi ddikhalle ddaanyu. Muwiipitthelle muzindooyo nave muwanena oweella otulli wiwa.”

³ Sika Yoswa aakhozeka ni akhotwaaye oya o Ai. Ahaatthoolla amodda oollipa murima 30,000 nave ahaaruma mahiiyu.

⁴ Aawinnya malamulo awi, “Khaweni mwiipitthe otulli wa muzindooyo. Muhinarekamellana ni muzindooyo koma mwakhozekelle owana ekhoto.

⁵ Miyaano ni athwaaka sika ninaawullike muzindooyo owiitthoni wiwa. Vano yakhuma wi ellipane ni hiyaano, nineerohokollowella mutulli wonanko mmo neerelleehu nllaponne. Nineerothawa vamiitthoni viwa.

⁶ Eneeroniikariha mwawi ddiidda ophiyera noonille wi aarekamella ni muzindooyo nave alliwaayo eneerekollota wi, ‘Enimathawa wonanko khalle valle.’

⁷ Vano mutthupulluwe nko munaawiipittheenyu nave mwaakhe muzindooyo. Apwiya Mullukwaanyu, eneerewuuvahani muzindooyo.

⁸ Mwaakha muzindooyo, muwuhelle munllo moollikana ni mmo Apwiya elamulelliiwa. Alla sika malamulo ayo kiwinnyalleemini.”

⁹ Sika Yoswa ahaaruma nave alliwaayo yaaya onipuroni nawiipitthellawo yatiyerellaka woononga muzindooyo. Nipuronno naari woovollowa nndduwa wa muzinda wa Ai, variyari va muzinda wa Ai ni wa Betele. Koma Yoswa ni mullokwaaye wakhoto waahalla m'musasani mahiiyu mattheene.

¹⁰ Ohinase, Yoswa aavenya awiithana akhotwaaye attheene. Vano olliye, oohoollella ni akhoto a Aisraele yaaya o Ai.

¹¹ Akhoto ayo yaari ni olliye yaahoolla, yatthipella misasa ompoto mwawaatamana ni mullako wa muzindooyo. Variyari va alliwa ni Ai vaakhalla ntapo.

¹² Yoswa ahaavukulla athu 5,000, awiipitthiha woovollowa nndduwa wa muzindooyo, variyari va Ai ni Betele.

¹³ Ahaatthatta akhoto mookhozekella ekhoto nave mulloko muullupalli waatthipella misasa ompoto wa muzinda koma mulloko mmodda wamakille woovollowa nndduwa nave mahiiyu yaayo Yoswa aavollowa variyari va ntapo.

¹⁴ Mwene a muzinda wa Ai awoonille athu a Yoswa, aheera ddeko mwawaakuva, apeha ohinase olliye ni athwaaye eya onipuroni noowehana ni ntapo na Yordani wi yawane ni Aisraele wonanko khalle. Olliye khaadduwella wi aamwiipitthella mutulli mwaye.

¹⁵ Yoswa ni Aisraelaayo yakhalla wonanko enimathawa, enaya ohakani.

¹⁶ Athu attheene a m'muzindanimmo yahiithaniwa wi yaathwareke vatulli nave voomwiikarihani Yoswa, yaanarekamellana ni muzindooyo.

¹⁷ Sika allopwana attheene a m'muzindani wa Ai yaakhumamo enawiikariha Aisraele ewuhiya muzindooyo weekhiiwa oohikhallavo oowuteteza.

¹⁸ Vano Apwiya yaamulleella Yoswa wi, “Tthoonyiha nivaka nawo o Ai. Muzindoolla kohuuvaha.” Yoswa aatthoonyiha nivaka o muzindooyo.

¹⁹ Vano atukhullalle nnatta naye, athu alle yiipitthalle yaatthupulluwa mwawaakuva, ethamakella m'muzindanimmo ewugonjiha. Nave enthawi yeeyo yaawuhella munllo.

²⁰ Athu a o Ai erukunuwalle oweha mutulli yahoona mwiisi oyaaka muddullu. Khayaarina woothawella kaambiiwa Aisraele alle yathawella ohakani yaahokollowa enawiipha athu a o Ai.

²¹ Yoswa ni Aisraele aariiyena yoonille wi awiipitthaalle ahaakha muzindooyo nave wi mwiisi orina othuwa, yaarukunuwa yaamba owiipha athu a o Ai.

²² Aisraele ayo yaari m'muzindanimmo yaawa enallipana ni akhoto a o Ai. Sika athu a o Ai yahaapheelliwa ni Aisraele nave khaavo ni mmoddeene athawille.

²³ Koma mwene a o Ai yaamuphara mukumi emuvelleella wa Yoswa.

²⁴ Vano Aisraele yaawiipha adaniiwa mutapo ni muhakani mmo yawiikarihelliiwamo. Nave yaahokollweella o Ai ewiiphattho oohalla attheene ayo yaari mwemmo.

²⁵ Waata wa athu a o Ai ayo yiiphiwe va nllapo nenno yaari 12,000, allopwana ni atthiyana vamodda.

²⁶ Yoswa aanatthoonyave ni nivaka naye o Ai, oohikitthiha nnatta naye ophiyera arive muthu m'muzindani wa Ai iiphiwe.

²⁷ Nave Aisraele yahaakha eziweto ni katundu muttheene m'muzindanimmo moollikana ni mmo Apwiya yamulleellelliiwa Yoswa.

²⁸ Enthawi yeeyo Yoswa aawuhella munllo muzinda wa Ai awutthattusa ntepe ophiyera ollello.

²⁹ Mwene a m'muzindanimmo yaamutthomeya vamuteekhoni emuhiya vaavo ophiyera misikuwa. Nndduwa nivollowaka Yoswa aalamula wi yakitthihe mutembooyo nave yeerille ddiiddo yaawutathillella vatthi va mullako va muzindooyo. Vaddullu va mutembooyo yahuukellavo malluku. Mallukwaayo aakhallavove ophiyera ollello.

Malamulo eneerengiwa va mwaango wa Ebala

³⁰ Vano Yoswa ahaamakella Apwiya Mulluku a Aisraele nikuwa va mwaango wa Ebala.

³¹ Aanimaka moollikana ni malangizo ayo Mose oorumeyella a Apwiya awinnyalleeye Aisraele ni moollikana ni ddoolembiwa mu nibukhu na malamulo a Mose oollota wi, “Nikuwa nikhalle namalluku oohisema ni ezipangizo dda mikoko.” Va nikuwanno yaavelleellavo mikutho ddooshellelliha wa Apwiya nave yaavelleella mikutho ddamurendelle.

³² Wenko Aisraele attheene yoonaka, Yoswa aalemba vamallukuni moophwanaphwana ni malamulo alle Mose aalembilleeye.

³³ Aisraele attheene ni oohoollelliiwa, attekweeniiwa, aweeruziiwa ni alleto ayo yaari variyari viwa, yahiimella va embali piilli dda nibokosi na echipanganonne moowehana ni allupa mukutho Eelevi ayo yatukhulla nibokosinno. Hafu a mulloko wa athwaayo ahiimella moowehana ni mwaango wa Gerizimu nave hafu mmodda a mulloko wa athwaayo ahiimella moowehana ni mwaango wa Ebala. Vawaambawaamba Mose oorumeyella a Apwiya ahaalamula alliwaayo wi yeereke ddenndda yaapaallaka waakhella madaliso.

³⁴ Vano Yoswa aaweerenga mawu mattheene a malamulo, madaliso ni matembelelo, moollikana ni mmo ddalembeliwe mu malamulo a Mose.

³⁵ Yoswa aheerenga nirive lamulo na Mose wa Aisraele attheene ayo yatthukumanne. Atthiyana ni anamwani ni alleto ayo yaari variyari viwa yaari vaavo.