Yoswa 7 - Mawu a Mulluku

Ochimwa wa Akani

¹ Koma Aisraele amodda kheyaawiiwellelle malamulo a Apwiya awi ehikuse erive ello mu Yeriko yoophwanella woonongiwa. Vano Akani aavittha ddeko ddimodda. Olliyoolla aari mwaana a Karimi, mwaana a Zabidi, mwaana a Zera, a nlloko na Yuda. Sika Apwiya yahaashella murima wunchichi Aisraele attheene.

² Egonjihalle muzinda wa Yeriko, Yoswa ahaaruma athu amodda wi yazonde muzinda wa Ai. Muzinda yooyo waari wookhuma nndduwa wa muzinda wa Betele vakhuviru ni Betaveni. Aarumalle wi yazonde muzindooyo, athwaalle yaheera ddiiddo o muzinda wa Ai.

³ Ehokollweelle wa Yoswa, athwaayo yaamulleella wi, “Khe woopaalleya wi attheene niyeewo. Arumeni athu 2,000 apaalle 3,000 wi yawane ekhoto ni athu a muzinda wa Ai. Muhaatopihe athu attheene wenko vawi a wenko tti aweerengeya.”

⁴ Sika Yoswa ahaaruma athu 3,000. Koma yahaathawa athu a o Ai.

⁵ Athu o Ai yaawiikariha Aisraele ovenyera vamullakoni va muzindooyo ophiya o Shebarimu. Aisraele 36 yahiiphiwa vookitthella mwaango, sika Aisraele attheene yaatathilla murima nave yahoova wunchichi.

⁶ Yoswa ni attekweene a Aisraele yiiwalle ddenndda yaamoriwa ethakaraka wunchichi nave yahaahulla ddoowara ddiwa, yiivokhella vatthi moopopheya ekhove vahoollo va nibokosi na echipangano na Apwiya ophiyera misikuwa, yiihella nthupi omuruni wiwa.

⁷ Vano Yoswa aallota wi, “Nyu Apwiya Mulluku! Kaambiiwa tini munillapusalleenyu muhinje wa Yordani munivelleella m'mattani mwa Aamori wi enoononge? Mwahinihiya okhopella wa muhinje wa Yordani weewulle?

⁸ Killote tini vano nyu Apwiya vawi Aisraele aarukunuwa enaathawa ni adaniiwa ddiidda?

⁹ Akanani ni athu amodda attheene ookhalla mwiillaponimmu eneerewiiwa nave eneeronaapheella ni oniipha attheene. Ethiyo vano nyuwaano munaaweere tini oteteza nnddina nanyu nuullupalli?”

¹⁰ Apwiya yaamulleella Yoswa wi, “Venya kaambiiwa tini wiivokhenlleewe vatthi moopopheya ekhove ddiidda?

¹¹ Aisraele aachimwa, aapwesa echipanganwaaka. Aakusa nnddo kaalleelleemi wi tti ddoophwanella woonongiwa. Yahiiyattho nave yaallekattho, epweserera ni ddeko ddiwa.

¹² Ekaamba ya yeella Aisraele khewora ollipana ni adaniiwa. Aathawa vamiitthoni va adaniiwa kaambiiwa aaphwanella woonongiwa. Ngiwa kikhalla ni alliwa ophiyera woonongille ddeko nnddo kuulamulalleemi wi ohikuse.

¹³ Venya, weellihe athu ollote wi ddeelliheni osiisello kaambiiwa miyaano Apwiya Mulluku a Aisraele, kineerewaalleella wi, ‘Nyu Aisraele, variyari vanyu vookhalla ddeko nndde kuulleelleemini wi ddoophwanella woonongiwa. Nyuwaano khemuwora ollipana ni adanaanyu ophiyera muvenyihallevo ddeko ddenndda.’

¹⁴ Sika ohinase, attheenenyu mukhumellelle vaweella nlloko nimodda nimodda. Nlloko nno kinaanithoolleemi nihoolle erukullu emodda emodda. Erukullu eyo kinaayithoolleemi ehoollenibanja nimodda nimodda. Nibanja nno kinaatthoolleemi mullopwana mmodda mmodda.

¹⁵ Oyo anaaphwanyeye ni ddeko ddennddo aneerewoosiwa ni nibanja naye nittheene ni ddittheddene nnddo ariiyena kaambiiwa aatathilla echipangano ya Apwiya nave kaambiiwa aheera yoowulliha muru mu Israele.”

¹⁶ Sika Yoswa aavenya ohinase, awaana Aisraele, nlloko nimodda nimodda nave nlloko na Yuda naatthoolliwa.

¹⁷ Erukullu ddittheddene dda nlloko na Yuda aaddikhumihella vaweella nave erukullu ya Zera yaaphariwa. Vano mabanja a Zera yaakhumihelliwa vaweella nave nibanja na Zabidi naaphariwa.

¹⁸ Ahaakhumiha allopwana attheene a nibanja na Zabidi nave Akani aaphariwa. Olliyooyo aari mwaana a Karimi, mwaana a Zabidi, mwaana a Zera, a nlloko na Yuda.

¹⁹ Vano Yoswa aamulleella Akani wi, “We mwanaka, atitimihe Apwiya Mulluku a Aisraele nave waavahe olemu. Killeelle naanweene vaava nnddo weerilleewe. Ohivitthe wa miyaano.”

²⁰ Akani aamwaakhulla Yoswa wi, “Ddawoona miyaano kohaachimwella Apwiya Mulluku a Aisraele nave nndda sika keerilleemi.

²¹ Variyari va eyuumeelle, kahoonavo mukanjo wooreera wa o Babiloni ni makilogaramu meelli a siliva navettho mwitthi wa golide woollemella hafu kilogaramu. Ddittheddenenndda kaaddipaalla wunchichi nave kaaddaakha. Muneeroddiphwanya variyari va musasaaka mvo kiddivitthalleemi. Muneeromuphwanya siliva vatthi va ddeko ddimoddannddo.”

²² Yoswa ahaaruma athu amodda wi eye omusasaninko nave yaaphwanya ddittheddene addivitthalleeye wenko wawi siliva aamuvitthalle vatthi viwa.

²³ Yaaddikhumiha m'musasani eyaana wa Yoswa ni wa Aisraele attheene, eddihiya vamiitthoni va Apwiya.

²⁴ Yoswa ni Aisraele attheene yaamukusa Akani mwaana a Zera, siliva, mukanjo ni mwitthi wa golidoolle. Yahaakusattho anaaye aallopwana ni aatthiyaneene, eng'ombe ddaye, abulwaaye, enkhosa ni musasaaye ni ddeko ddittheddene aariiyena eyaana o ntapo na Akori.

²⁵ Vano Yoswa aallota wi, “Onikatamihelle tini? Apwiya eneerewuuhoosa ollello!” Vano Aisraele attheene yaamuvokha malluku, yaahella munllo, yaavokha malluku.

²⁶ Yahuukella malluku manchichi va olliyooyo nave mallukwaayo aakhallawo ophiyera ollello. Apwiya yaarukunuwa ehiya osha murima wuullupalli. Sika ekaambiiwa ntapo nenna ophiyera ollello ninaromolliwiiwa wi ntapo na Akori.