Yoswa 6 - Mawu a Mulluku

Okumulliwa wa muzinda wa Yeriko

¹ Muzinda wa Yeriko waari woowalla millako ddiwa ddittheddene wi Aisraele ehivollowe. Khaarivo ookhuma naari oovollowa m'muzindanimmo.

² Apwiya yaamulleella Yoswa wi, “Ngoona, koomuvelleella m'mattani mwawo Yeriko, mwenaaye ni akhotwaaye amasiva.

³ Vano weyaano ni akhoto attheene mwaapheelleke muzinda omodda vanllaponi, mallapo matthanu ni nimodda.

⁴ Allupa mukutho atthanu ni eelli, arive muthu ari ni nipallapata na nnyaka na nankhoro a enkhosa, ehoollelleke nibokosi na echipangano. Va nllapo naneetthanu ni piilli, weyaano ni akhotwaawo, mwaapheelleke muzindooyo otthanu ni opiilli, allupa mukutho yiipaka mapallapataayo.

⁵ Vano yaawiipaka nipallapata na nnyaka nankhosa moohimaalliha ni mwamasiva nave athu yiiwa wiipa wa nipallapata, ekhuwe moollipiha nave esiri ya muzindooyo eneerokumuwa. Vaavo akhotwaawo attheene evollowa m'muzindanimmo.”

⁶ Vano Yoswa mwaana a Nuni aawiithana allupa mukutho aalleella wi, “Tukhullani nibokosi na echipangano nave allupa mukutho atthanu ni eelli etukhulle mapallapata amanyaka ankhosa, ohoollella nibokosi na echipangano ya Apwiya.”

⁷ Nave ahaalleella athu wi, “Khaweni mwaapheelleke muzindooyo, akhoto ehoollelle nibokosi na echipangano na Apwiya.”

⁸ Vano Yoswa allotille wa athwaalle, allupa mukutho atthanu ni eelli yaahoollella nibokosi na echipangano na Apwiya etukhullalle mapallapata amanyaka a nankhoro a enkhosa vamiitthoni va Apwiya, eniipa mapallapataayo nave nibokosi na echipangano ya Apwiya naathwaraka.

⁹ Vano akhoto yahaahoollella allupa mukutho awiipa nipallapata. Akhoto amodda yaari vatulli, enathwara nibokosi na echipanganonno, mapallapata yiipiwaka.

¹⁰ Koma Yoswa ahaalamula athu wi, “Muhikhuweke apaalle otokollolla, mawu ehikhume muwano mwanyu ophiyera kuulamulalleni wi, ‘Khuwani’ vano mukhuweke.”

¹¹ Sika yahaapheelliha nibokosinne muzindooyo omodda ehokollweella omisasani yakona.

¹² Yoswa aapeha ohinase nave allupa mukuthwaayo yaatukhullattho nibokosi na echipangano na Apwiya.

¹³ Allupa mukutho atthanu ni eelli ootukhulla mapallapata amanyaka a nankhoro a enkhosaalle, yaahoolla yiipaka mapallapataayo. Akhoto amodda yaari vatulli, enathwara nibokosi na echipanganonno, mapallapata yiipiwaka.

¹⁴ Va nllapo naneepiilli yahaapheellattho muzindooyo omodda, ehokollweella omisasani. Yaheera emoddamoddave yeeyo wa mallapo matthanu ni nimodda.

¹⁵ Va nllapo naneetthanu ni piilli yaapeha oyaaka ni osa nave yahaapheella muzindooyo otthanu ni opiilli. Tti va nllapo nennove yaapheelliiwa muzindooyo otthanu ni opiilli.

¹⁶ Waapheella wa otthanu ni opiilli omanlle, allupa mukuthwaalle yiipalle mapallapata, Yoswa ahaalleella athu wi, “Khuwani! Apwiya ahuuvahani muzindoolla.

¹⁷ Muzindoolla ni ddittheddene ddiri mwemmo muddoononge wi ddikhalle wonanko mukutho woovelleella wa Apwiya. Koma Rahabuve mutthiyana ooraruwoolle ni attheene a mpa mwaye mwaasunge vawi aawiipitthiha oozondaalle.

¹⁸ Koma nyuwaano muhisunge erive ello yoophwanella woonongiwa. Mwakusa erive ello yoophwanella woonongiwa muneerottatthamulla ddoohoosa nave misasa dda Aisraele ddineerewoonongiwa.

¹⁹ Koma ddittheddene ddasiliva ni ddagolide navettho ezipangizo ddittheddene ddamukuwa ni ddamikoko ddikhalle ddoopatuleya dda Apwiya, ddiye moosungellamo eyuuma ya Apwiya.”

²⁰ Sika allupa mukutho yahiipattho mapallapataalle. Athu yiiwalle, yaakhuwa wunchichi nave esiri ya muzindooyo yaakumuwa. Vano akhoto attheene yaawa evollowa m'muzindanimmo, yaakha muzindooyo.

²¹ Vano yaavollowa m'muzindani, masupada eri m'mattani mwiwa, ewiipha attheene ni masupada awiisha allopwana ni atthiyana, attekweene ni anamwani, eng'ombe, enkhosa ni abulu.

²² Yoswa ahaalleella athu eelli yazondille ellapwaalle wi, “Khaweni o enyumba ya mutthiyana ooraruwoolle nave olliye ni attheene a munibanjani naye muweena wuno moollikana ni mmo mwallupellelleenyu.”

²³ Sika oozondaayo yaaya yamukusa Rahabu, attiitthinnya, amennya, arokoriye ni attheene a munibanjani naye. Yaawaana attheene a munibanjani nayenno yaahiya otte wa misasa dda Aisraele.

²⁴ Vano yaahella munllo muzindooyo nave erive ello yaari mwemmo yaasha. Koma ddeko nnddo ddapangiwe ni golide, siliva navettho ezipangizo ddamukuwa ni ddamikoko nnddo yaddikusalliiwa yaaddisunga moosungellamo eyuuma ya mu enyumba ya Apwiya.

²⁵ Koma Yoswa aamuhiya ni okumi Rahabu mutthiyana ooraruwoolle ni abalaaye attheene vawi tti olliye awiipitthihalle oozonda alle Yoswa aarumalleeye wi yazonde muzinda wa Yeriko. Edduullu dda Rahabu ddookhallavove variyari va Aisraele ophiyera ollello.

²⁶ Enthawi yeeyo Yoswa aallupella mowaatembelela wi, “Arive muthu oyo anaamakettho muzinda wa Yeriko atembeleliwa. Arive muthu oyo anaamake matthipellellwaaye, mwanaye awaamba aneerokhwa. Arive muthu anaamake millako ddaye, ethwakwaaye eneerokhwa.”

²⁷ Sika Apwiya yaakhalla ni Yoswa nave epillaaye yaavuwa ellapo ettheeneeyo.