Yoswa 5 - Mawu a Mulluku

¹ Mamwene mattheene Aamori ookhalla woovollowa nndduwa wa muhinje wa Yordani ni mamwene Aakanani ookhalla museresere mwa enyanja yiiwalliiwa wi Apwiya yahummiha muhinje wa Yordani Aisraele yallapuwiiwa yahoova nave yaatathilla murima ekaamba ya Aisraelaayo.

Yoswa anaaphadda Aisraele o Giligala

² Vano enthawi yeeyo Apwiya yaamulleella Yoswa wi, “Sema mipeni dda malluku wi waaphaddena Aisraelaalla.”

³ Sika Yoswa aasema mipeni ddamalluku, aaphadda Aisraele attheene o Gibea Naraloti.

⁴ Nndda ddaheereya ekaamba yawi akhoto attheene yaakhwa muchipululuni ekhumalle o Iguputo.

⁵ Athu attheene yakhumalle o Iguputo yaari ephaddiwe khalle. Koma attheene yayarelliwe muchipululuni va enthawi yookhuma o Iguputo kheyaaphaddiwe.

⁶ Aisraele yaaneeta muchipululuni wa miyakha 40 ophiyera mutundu muttheene, akhoto attheene, yakhumalle mu Iguputo etthollowille ekaamba yoohiiwellella mawu a Apwiya. Apwiya yahaallupellella wi khevollowamo mu ellapo eyo yallupellelliiwa waavaha makhollwiiwa, ellapo yaweeta mukaka ni enwi.

⁷ Koma aniiwa ayo yavollowille munipuroni mwiwa kheyaaphaddiwe yaariiwa muchipululunimmo nave tti ayo Yoswa aalamulalleeye wi ephaddiwe.

⁸ Ophaddiwanko omanlle athu yaakhalla m'misasanimmo otiyerella wi makhwata evolle.

⁹ Vano Apwiya yaamulleella Yoswa wi, “Ollello kohuuvenyiherani ovevulla wa Iguputo.” Sika ekaambiiwa nipuronno yaniromonlliiwa Giligala ophiyera ollello.

¹⁰ Aisraele yaariiwa m'misasani yaaneera Ehakallallo ya Paska o Giligala mu ntapo na Yeriko, misikuwa va nllapo naneekhumi ni sese mweeri wawaamba.

¹¹ Osaka wene emanlle Ehakallallo ya Paska yaacha yoocha ya mwiillaponimmo, buledi oohikhalla ni yisiti ni tirigu awaarika nllapo nenno.

¹² Ddimanlle ddenndda manaalle yaahiya omora nave khayaphwanyeyillettho mu Israele. Sika ovenyera nllapo nenno yahaamba ocha ddoocha dda o Kanani.

Masomphenya a Yoswa

¹³ Nllapo nimodda Yoswa ari vakhuviru ni muzinda wa Yeriko, moorurumusa aamoona muthu iimenlle muhoollo mwaye, nsupada noohullullahullulla niri m'mattani mwaye. Vano Yoswa aaya vaari muthumvo amukoha wi, “Ethiyo weyaano tti mmodda a akhotwaahu apaalle ori mudanaahu?”

¹⁴ Muthoolle ahaakhulla wi, “Mi tti oohoollella a mulloko wa akhoto wa Apwiya wuno.” Sika Yoswa ahiimoriha moopopheya vatthi ekhove allota wi, “Apwiya miyaano kiri oorumeyellaanyu. Vano munapaalla keere tini?”

¹⁵ Oohoollella mulloko wa akhotoolle ahaakhulla wi, “Ohiphiye vakhuviru. Rulla esapato ddawonnddo vawi vanipuroni wiimenlleewemvo tti vaweella.” Yoswa aheera nnddo alleelliweeye.