Yoswa 4 - Mawu a Mulluku

Eniimesa malluku khumi ni meelli wi ekhalle echizindikiro

¹ Aisraele attheene ellapuwalle muhinje wa Yordani, Apwiya yaamulleella Yoswa wi,

² “Atthoolle allopwana khumi ni eelli, muthu mmodda mu nirive nlloko.

³ Vano waalamule wi, ‘Kusani malluku khumi ni meelli variyaririyari va muhinje wa Yordani, vanipuroni mvo viimellille allupa mukutho. Mutukhulle malluku yaayo nave muweena omisasani ddanyu nko munaakoneenyu mahiiyumva.’ ”

⁴ Yoswa aawiithana allopwana khumi ni eelli aatthoollillaayaalle, muthu mmodda munirive nlloko.

⁵ Nave ahaalleella wi, “Vollowani mu muhinje wa Yordanoolla vahoollo va nibokosi na Apwiya Mullukwaanyu. Arive muthu mwa nyuwaano atukhulle nlluku vanthurini, nlluku nimodda va nirive nlloko.

⁶ Malluku yaalla tti echizindikiro nave athu eneerewuupuwella. Aniinyu yaawuukohakani muhoollommu wi malluku yaalla tti tini?

⁷ Mwaalleelleke wi, ‘Maaddi a m'muhinjeni wa Yordani yahiimella ehineeta, nibokosi na echipangano na Apwiya nallapuwiiwa muhinjoolla.’ Malluku yaalla ekhalle omboni wa Aisraele.”

⁸ Athwaayo yaheera nnddo Yoswa aalamulalleeye. Yaatukhulla malluku khumi ni meelli variyaririyari va muhinje wa Yordani moollikana ni mmo Apwiya yamulamulalliiwa Yoswa, nlluku nimodda va nirive nlloko. Mallukwaayo yaallapuwana eyaana nko yakonilliiwa yawuukella wenko.

⁹ Yoswa ahiimesa malluku khumi ni meelli yaari variyaririyari va muhinje wa Yordani, vanipuroni valle viimellille allupa mukutho ootukhulla nibokosi na echipangano na Apwiyaalle. Malluku yaalla aakhallawo ophiyera ollello.

¹⁰ Allupa mukuthwaalle yahiimella variyaririyari va muhinje wa Yordani ophiyera ddimanlle ddittheddene Apwiya yamulamulalliiwa Yoswa wi aalleelle athu. Nndda tti ddennddo Mose amulleelleeye Yoswa. Vano athu yaallapuwa muhinje mwawaakuva.

¹¹ Vano athu yaallapuwa muhinjooyo mwawaakuva. Allupa mukutho etukhullalle nibokosi na echipangano na Apwiya yahaahoollella athu attheenaalle.

¹² Athu a nlloko na Rubeni ni a nlloko na Gadi ni hafu a athu a nlloko na Manase sika yallapuwalle vawaamba eri ookhozekella ekhoto moollikana ni mmo aalleellelleeye Mose.

¹³ Akhoto 40 yaallapuwa yiimella vakhopella mutapo mwa muzinda wa Yeriko eri ookhozekella ekhoto.

¹⁴ Nnddo yeerille Apwiya nllapo nenno ddaaweeriha Aisraele omuvaha olemu Yoswa. Vano yaamuvaha olemu wunchichi moollikana ni mmo avahelliwa olemu Mose enthawi ettheene ya okumaaye.

¹⁵ Attheene ellapuwalle, Apwiya yaamulleella Yoswa wi,

¹⁶ “Aalamule allupa mukutho ootukhulla nibokosi na echipangano wi ekhumemo m'maaddinimmo.”

¹⁷ Sika Yoswa ahaalamula wi ekhumemo.

¹⁸ Allupa mukuthwaalle yanyinganlliiwa mutunda mukhwipi mwa muhinje, muhinjooyo wahaamba weetattho ophiyera waasefukella wonanko mallapo mararu evirallaalle.

¹⁹ Aisraele yaallapuwa muhinje wa Yordani nllapo na khumi na mweeri wawaamba nave yaatthipella misasa ddiwa o Giligala, wookhuma nndduwa wa Yeriko.

²⁰ Wenko tti wulle Yoswa iimesilleeye malluku khumi ni meelli alle yaakusalliiwa o muhinje wa Yordani.

²¹ Vano aallota wa Aisraele wi, “Aniinyu yaawaakohaka makhollwiiwa muhoollommu wi, ‘Ethiyo mallukwaalla tti a tini?’

²² Nyuwaano mwaalleelleke wi, ‘Aisraele yaallapuwa muhinje wa Yordanoolla ori wawumma.’

²³ Apwiya Mullukwaanyu sika awummihalle maaddi a m'muhinjenimmu wi nyuwaano mullapuwe vawumma wonanko mmo ummihelleeye Enyanja Yoofiira, ophiyera attheene naallapuwa.

²⁴ Ekaamba ya yeella arive muthu va ellapo yavatthimva eneerodduwella masiva a Apwiya nave eneerowoova Apwiya Mullukwaanyu, wa enthawi yoohimalla.”