Yoswa 3 - Mawu a Mulluku

Aisraele enallapuwa muhinje wa Yordani

¹ Osaka wene ohinase Yoswa aatimulla olliye ni Aisraele attheene ekhuma m'misasani dda Shitimu eya o Yordani nave yaakona wenko.

² Viviralle mallapo mararu oohoollella yaheeteeta variyari va misasa ddittheddene,

³ yaalleella athu wi, “Moona nibokosi na echipangano na Apwiya Mullukwaanyu nitukhulliwe ni Alevi, allupa mukutho, mutimulle m'mapuroni mwanyu nave mwaathwareke.

⁴ Vano muneeroyidduwella ettilla yoophwanella oyithwara vawi ovenyera khalle wenko khamunaweellekewo. Muhinanaatamella nibokosi na echipanganonno koma nyuwaano murekamellane ni nibokosinno nikilomita nimodda.”

⁵ Yoswa ahaalleella athu attheenaalle wi, “Muddeellihe kaambiiwa osiisello Apwiya enapaalla yeere ddoottikhiniha vamiitthoni vanyu.”

⁶ Osaka wene Yoswa ahaalleella allupa mukutho wi, “Tukhullani nibokosi na echipangano na Apwiya, mullapuwe, mwaahoollelle athwaayo.” Alliwaayo yaheera moollikana ni mmo Yoswa allotelleeye.

⁷ Apwiya yaamulleella Yoswa wi, “Ddittheddene kinaaweereemi ollellonndda sika ddinaaweerihe Aisraele attheene okhalla ni murima wawuuvaha olemu wi weyaano ori muthu muullupalli. Nave eneerodduwella wi miyaano kiri ni weyaano wonanko mmo kakhallelleemi ni Mose.

⁸ Waalleelle allupa mukutho ayo enatukhulla nibokosi na echipangano wi yaphiya omuhinjeni wa Yordani, evollowe m'maaddini nave yiimelle museresere.”

⁹ Vano Yoswa ahaalleella athwaayo wi, “Waawoni wuno, mwiiwe nnddo Apwiya Mullukwaanyu enuulleelleewani.

¹⁰ Vano muneerodduwella wi Mulluku mukumi ari variyari vanyu. Nave olliye aneerowiikara Akanani, Ahiti, Ahivi, Aperezi, Agirigashi, Aamori ni Ayebusi.

¹¹ Vaavo nibokosi na echipangano na Apwiya a ellapo yavatthi ettheene nillapuwe muhinje wa Yordani vahoollo vanyu.

¹² Vano mwaatthoolle athu khumi ni eelli, mmodda mu nirive nlloko na Aisraele.

¹³ Allupa mukutho ootukhulla nibokosi na echipangano na Apwiya, Apwiya a ellapo yavatthi ettheene, yanyingalla maaddaayo, maaddi mattheene a muhinje wa Yordani oovenyera omwaako eneerohiya weeta nave eneerewiimella wonanko esiri.”

^14-15 Enthawi yeeyo yaari yoohata nave muhinje waari wooddalla wunchichi. Athu attheene yaavenya m'misasani wi yallapuwe muhinje wa Yordanoolle. Allupa mukutho sika yaari vahoollo etukhullalle nibokosi na echipangano na Apwiyanne. Allupa mukutho yaphiyiiwa mukhwipi mwa muhinje wa Yordani enakitthella m'maaddinimmo nave enaanyingalla,

¹⁶ maaddi mattheene yahiimella ehineeta. Maaddi a omwaako yahuukaana wonanko esiri yoorekama ovenyera o Adama vakhuviru ni muzinda wa Zaretani. Maaddi ooya mu enyanja ya Araba eyo yeeriwa Enyanja Yookhwa yaawelleella nave athu yaallapuwella ekhopella emodda vakhuviru ni muzinda wa Yeriko.

¹⁷ Enthawi ettheeneeyo allupa mukutho ootukhulla nibokosi na echipangano na Apwiyanne yaari yiimenlle vawumma variyaririyari va muhinje wa Yordanoolle ophiyera athu attheene ellapuwalle.