Yoswa 24 - Mawu a Mulluku

Wuupusiwa wa echipangano o Shekemu

¹ Vano Yoswa aatthukumaniha malloko mattheene a Aisraele o Shekemu. Aawiithana attekweene, oohoollella, oweeruza ni akapitawo a Aisraele nave attheenaayo yaaphiya vamiitthoni va Mulluku.

² Ahaalleella athu attheenaayo wi, “Nnddo Apwiya Mulluku a Aisraele enallotiiwa tti ddawi, ‘Khalle makhollwaanyu yakhalla okhopella wa muhinje wa Yufurate enallapella milluku ddimodda. Mmodda mwa makhollo yaalla aari Tera, attiitthinnya a Abrahamu ni Nahori.

³ Vano kaamukusa Abrahamu nikhollo nanyu okhopella wa muhinje wa Yufurate kimweetiha mu ellapo ettheene ya Kanani, kiruuwiha edduullu ddaye nave kaamuvaha Isaki.

⁴ Nave Isakooyo kaamuvaha Yakobo ni Esau. Kaamuvaha Esau ellapo yamiyaango ya Seiri wi ekhalle yoohallanaaye koma Yakobo ni anaaye yaakitthella o Iguputo.

⁵ Vano kaamuruma Mose ni Aroni o Iguputonko nave kahaahoosa wunchichi athu a o Iguputwaayo nave kahuukhumihani.

⁶ Kahaakhumiha makhollwaanyu mu ellapo ya Iguputo, kahaaphiyiha o Enyanja Yoofiira koma a Iguputo oowella vamagaretani ni vaakavaloni yahaathwara makhollwaanyu yaphiya o enyanja.

⁷ Vano yinllelle wa miyaano, kaahiya murapo wooripa variyari va nyuwaano ni Aiguputo nave enyanja yahaamirya. Mwahoona ni miitthwaanyu nnddo kaweerelleemi Aiguputo nave mwaakhalla enthawi yoorekama muchipululuni.

⁸ “ ‘Vano kahuuphiyihani mu ellapo ya Aamori, ayo yakhalla okhopella wa muhinje wa Yordani. Alliwaayo yaallipana ni nyuwaano koma miyaano kahaavelleella m'mattani mwanyu nave mwahaakha ellapwiiwa kaambiiwa miyaano kaawoononga nyuwaano mwaphiyeenyu.

⁹ Vano Balaki, mwaana a Zipori, mwene a Amowabu aawana ni nyu Aisraele. Aarumiha othenga amwiithana Balamu mwaana a Beori wi uutembeleleni.

¹⁰ Koma miyaano ngaamwiiwellelle Balamooyo, sika olliyooyo ahuudalisani nave kahuuvullusani m'mattani mwa Balaki.

¹¹ Mwaallapuwa muhinje wa Yordani mwaphiya o Yeriko. Athu a o Yeriko yaawana ni nyuwaano, owaaka Aamori, Aperezi, Akanani, Ahiti, Agirigashi, Ahivi ni Ayebusi nave kahaavelleella m'matani mwanyu.

¹² Tti miyaano karumihalle ddoollumanndde wi ddaahoose mamwene Aamoraalle nave attheenaayo yahiikarihiwa vamiitthoni vanyu. Khehiyo masupadaanyu apaalle miira ddanyu ddeerihalle ddenndda.

¹³ Kahuuvahani ellapo eyo muhiyipharelleenyu mutteko nave mizinda nnddo mwahiddimakilleenyu. Munakhalla wenko munacha ezipaso ddampesa ni dda olivi, nnddo mwahiddaallilleenyu.’

¹⁴ “Vano nyuwaano, mwaavahe olemu Apwiya nave mwaarumeyelleke mwawoona nave moororomelleya. Venyihani milluku nnddo makhollwaanyu yaddillapelliiwa okhopella wa mihinje wa Yufurate ni o Iguputo nave mwaarumeyelle Apwiya.

¹⁵ Vano waarumeyella Apwiya waawukatamihakani, mumutthoolle ollello oyo munaamurumeyellekeenyu apaalle milluku nnddo yaddirumeyelle makhollwaanyu ookhalla okhopella wa muhinje apaalle milluku dda Aamori ayo munakhalleenyuna mu ellapwiiwa. Koma miyaano ni a vanibanjani vaka ninaawaarumeyelleke Apwiya.”

¹⁶ Vano athwaayo yahaakhulla wi, “Khaniwa naahiya Apwiya wi narumeyelleke milluku ddimodda.

¹⁷ Apwiya Mullukwaahu sika ayo yaakhumihalle makhollwaahu ni hiyaanweene mu okaporo, ellapo ya Iguputo. Navettho nahoona ni miitthwaahu ddoottikhiniha nnddo yaneerelliiwa. Yaanisunga mu ettilla ddittheddene neeteehumo nave variyari va athu attheene navireehu variyari viwa.

¹⁸ Hiyaano naphiyeehu, Apwiya yaawiikariha athu attheene naari Aamori ayo yakhalla mwiillaponimmu. Sika ekaambiiwa hiyaano ninaawarumeyelleke Apwiya vawi tti Mullukwaahu.”

¹⁹ Yoswa ahaalleella athwaayo wi, “Mwaamodda nyuwaano khamuwora waarumeyella Apwiya kaambiiwa tti Mulluku aweella nave eehache. Khuuhiyani wi mumuwukileke nave mumuchimwelleke.

²⁰ Mwaahiya Apwiya Mullukwaanyu munarumeyella milluku ddeelleto, eneerewuurukunuwellani ni oweerellani yoonanara nave eneerewuutthollosani naari khalle yaweerelleni ddaphaama.”

²¹ Nave athwaayo yaamulleella Yoswa wi, “Hi ninaawarumeyelleke Apwiya.”

²² Vano Yoswa ahaalleella wi, “Nyu munaddeerella nyookha omboni wi mutthoollille waarumeyella Apwiya.” Athwaayo yahaakhullella wi, “Ee amboni tti yeekhiihu.”

²³ Yoswa aallotattho wi, “Venyihanivoni milluku ddeelleto ddiri variyari vanyu nave mwaallapelleke Apwiya Mulluku a Aisraele, moororomelleya.”

²⁴ Athwaayo yaamulleella Yoswa wi, “Nineerekewaarumeyella Apwiya Mullukwaahu nave nineerekowiiwellella.”

²⁵ Sika Yoswa aapanganana echipangano ni athu a nllapo nenno nave o Shekemu wenko Yoswa ahaavaha athwaayo malamulo ni malangizo.

²⁶ Yosooyo aalemba malamulo yaalla mu nibukhu na malamulo a Mulluku nave aakusa nlluku nuullupalli aniimesa vatthi va muteekho wa muthundu vanipuroni noopatuleya na Apwiya.

²⁷ Nave ahaalleella athwaayo wi, “Nlluku nenna nikhalle omboni woonivaanyiha. Mawu ayo Apwiya ellotilliiwa ni hiyaanwaalla nllukunna nohiiwa. Sika nllukunna ninaakhalle omboni wowuuvaanyihani mwamukhoota Mullukwaanyu.”

²⁸ Vano Yoswa ahaalleella athwaayo wi arive muthu aroweke o yoohallanaaye.

Okhwa wa Yoswa ni Eleazara

²⁹ Ddimanlle ddenndda Yoswa, mwaana a Nuni, oorumeyella a Apwiya aakhwa. Aari ni miyakha 110.

³⁰ Yaamuvittha mu yoohallanaaye o Timnati Sera, mu ellapo yamiyaango ya Efuremu, ompoto wa mwaango wa Gaashi.

³¹ Aisraele yahaarumeyella Apwiya enthawi ettheene Yoswa aariiye mukumi nave athu yaavirellella waarumeyella enthawi ya oohoollella akhwille Yoswa ayo yaari yoonille mitteko nnddo Apwiya yaweerelliiwa Aisraele.

³² Vano makhuva a Yosefe ayo Aisraele yaakusalliiwa o Iguputo yahaavittha o Shekemu o echigawo eyo Yakobo akullalleeye wa edduullu dda Hamori, attiitthinnya a Shekemu, va mutengo wa makobiri manchichi. Nave ellapweeyo yaatthattuwa yoohallana ya edduullu dda Yosefe.

³³ Eleazara mwaana a Aroni aakhwattho nave yaamuvittha o Gibea mu etawoni ya mwanaye Finehasi, eyo yamuvahilliiwa mu ellapo yamiyaango ya Efuremu.