Yoswa 23 - Mawu a Mulluku

Ollaanya wa Yoswa

¹ Vano viviralle enthawi yoorekama ovenyera mvo Apwiya yakeraatthihalliiwa murendelle variyari va Aisraele ni adaniiwa oowaapheella, Yoswa ahuulluvalla wunchichi.

² Yoswa aawiithana Aisraele attheene, attekweene, oohoollella, oweeruza ni akapitawo a athwaayo, aalleella wi, “Vano miyaano kohuulluvalla nave kookhalla ni miyakha ddinchichi.

³ Mooddoona ddittheddene Apwiya yeerelliiwa mitundu ddimodda ekaamba ya nyuwaano vawi Apwiya Mullukwaanyu sika yuuwanelleni ekhoto.

⁴ Ngoonani, koovelleella wa nyuwaano mitundu nnddo muhiddigonjihalleenyu wi ddikhalle yoohallanaanyu ya mallokwaanyu o muhinje wa Yordani, mitundu ddittheddene kaddoonongilleemi ni Enyanja Yuullupalli woovollowa nndduwa.

⁵ Vano Apwiya Mullukwaanyu eneerowiikariha vamiitthoni vanyu ni waakha ellapwiiwa wi ekhalle yoohallanaanyu moollikana ni mmo Apwiya Mullukwaanyu yuulonjezilliiwani.

⁶ Sika mullipe murima wunchichi, osunga ni weera ddittheddene ddilembiwe mu nibukhu na malamulo a Mose, oohihapuwella onnattanatta apaalle nnatta noonyottho.

⁷ Nave muhiniiwananaka ni athu alla ehanlle nave eri ni nyuwaano. Muhinaromollaka manddina a milluku ddiwa apaalle oyiromolla voollupellani apaalle oyirumeyella apaallettho oyikokhorella.

⁸ Vano mwaawanddeellelle Apwiya wonanko mweerelleenyu ophiyera ollello.

⁹ Apwiya yaawiikarihellani mitundu dduullupalli nave ddamasiva. Ophiyera ollello khaavo naari mmodda anawora ollipana ni nyuwaano.

¹⁰ Arive muthu a nyuwaano ttuuwora owiikariha athu 1,000 kaambiiwa Apwiya sika enuuvaddellani ekhoto moollikana ni mmo yalonjezelliiwa.

¹¹ Vano muchenjere nave mwaakondeke Apwiya Mullukwaanyu.

¹² Mwahokollowella mutulli nave mwattakanyiherana ni mitundu ddoohalla nndda ddiri variyari vanyu munaatthella nave alliwa enuutthellani,

¹³ mudduwelle wi Apwiya Mullukwaanyu kheyiikariha mitundu ddenndda vamiitthoni vanyu. Koma athwaayo enaakhalle wonanko musampha wa nyuwaano apaallettho wonanko nikwekwe. Enaakhallettho wonanko muwashullo woovoreya vamutthanani vanyu apaalle wonanko miiwa ddawuuhomani m'mwiitthoni mwanyu. Ddenndda ddineerekeweereya ophiyera nyuwaano mutthollowille mu ellapo yaphaameella eyo Apwiya Mullukwaanyu yuuvahilliiwani.

¹⁴ “Vano miyaano enthawaaka yookwakhwana wi kikhwe. Arive muthu a nyuwaano annadduwella phaama ddene m'murimani mwaye nave m'munepani mwaye wi Apwiya Mullukwaanyu, ahuuvahani ddeko ddaphaama nnddo yalonjezilliiwa. Ddittheddene nnddo yalonjezilliiwa ddoheereya. Kheyiivo naari emodda eyo yalonjezilliiwa eheereyille.

¹⁵ Moollikana ni mmo Apwiya Mullukwaanyu yaweerelliiwani ddaphaama ddittheddene nnddo yallotilliiwa wi eneereweera, sika ttuuwora oweerellani yoonanara, ophiyera wuuvenyihani mu ellapo eyo alliwa yuuvahilliiwani.

¹⁶ Mwayitathilla echipangano eyo Apwiya yuulamulalliiwani, mwaayaaka nave mwaarumeyellaka milluku ddimodda ni oddikokhorella, osha murima wa Apwiya oneerewuumorellani nave muneerotthollowa mu ellapo yaphaama yuuvahilliiwaneella.”