Yoswa 22 - Mawu a Mulluku

Yoswa anaahokollosella owaniwa malloko a wookhuma nndduwa

¹ Vano Yoswa aawiithana athu a nlloko na Rubeni ni na Gadi ni hafu a nlloko na Manase.

² Nave ahaalleella wi, “Moosunga ddittheddene nnddo Mose, oorumeyella a Apwiya uulamulalleeyeni nave mohiiwella malamulwaaka mattheene.

³ Khamwaahiyalle Aisraele akhwiinyu enthawi ettheeneella ophiyera ollello nave mookhalla musungaka malamulo mattheene a Apwiya Mullukwaanyu.

⁴ Vano Apwiya Mullukwaanyu, aawiithuuwiha Aisraele akhwiinyu moollikana ni mmo yaalonjezelliiwa. Sika hokollweellani owaninyu o yoohallanaanyu, ellapo eyo eri vakhopella va muhinje wa Yordani, eyo Mose oorumeyella a Apwiya uuvahilleeyeni.

⁵ Mupwatheke phaama wiiwellella malamulo ni malangizo ayo Mose oorumeyella a Apwiya uuvahilleeyeni, waakonda Apwiya Mullukwaanyu ni weeta mu ettilla ddittheddene ni osunga malamulwiiwa ni waawanddeellella alliwa nave mwaarumeyelleke ni murimaanyu muttheene ni okumaanyu muttheene.”

⁶ Sika Yoswa ahaadalisa athwaayo aalleella wi eroweke. Vano athwaayo yaarowa owaniwa.

⁷ Mose aari aavahille o Bashani athu a hafu a nlloko na Manase koma athu a hafu mmodda Yoswa ahaavaha yoohallaniiwa variyari va abaliiwa vakhopella va muhinje wa Yordani woovollowa nndduwa. Yoswa aarumiheeye athwaayo owaniwa ahaadalisa,

⁸ aalleella wi, “Hokollweellani omisasani wanyu ni eyuuma yinchichi, eziweto ddinchichi, siliva, golide, mukuwa, mikoko ni ddoowara ddinchichi. Nndda mwaakhilleenyu wa adanaanyu, mwaakawelle aballiinyu.”

⁹ Sika athu attheene a nlloko na Rubeni ni na Gadi owaaka hafu a nlloko na Manase yaahokollweella owaniwa yaahiya Aisraele amodda attheene a o Shilo mu ellapo ya Kanani eya o ellapo ya Giliyadi, yoohallaniiwa eyo yaakhenlliiwa moollikana ni malamulo a Apwiya oweella mwa Mose.

Nikuwa na mukutho o Yordani

¹⁰ Vano ephiyalle o echigawo ya woovollowa nndduwa wa muhinje wa Yordani mu ellapo ya Kanani, Arubeni, Agadi ni hafu a nlloko na Amanase yaamakawo nikuwa nuullupalli vakhwipi va muhinjooyo.

¹¹ Vano Aisraele yaawiiwa athu ellotaka wi, “Ngoonani Athu attheene a nlloko na Rubeni ni na Gadi ni hafu a nlloko na Manase yaamaka nikuwa malire ni ellapo ya Kanani, ekhopella ya muhinje wa Yordani o embali ya Aisraele.”

¹² Vano Aisraele yiiwalle ddenndda, attheene yaatthukumana o Shilo wi eye yawanena ekhoto.

¹³ Vano Aisraelaayo yaamuruma Finehasi, mwaana a mullupa mukutho Eleazara wa athu a nlloko na Rubeni ni na Gadi ni wa hafu a nlloko na Manase ayo yakhalla o ellapo ya Giliyadi.

¹⁴ Finihasooyo aayaayo ni oohoollella khumi, mmodda o nirive nlloko na Aisraele. Arive muthu mwa alliwaayo aari oohoollella a nibanja nimodda na mallokwaayo.

¹⁵ Ephiyalle o ellapo ya Giliyadi, yaallota ni athu a nlloko na Rubeni, na Gadi ni hafu a nlloko na Manase wi,

¹⁶ “Athu attheene a Apwiya enakoha wi ‘Kaambiiwa tini nyuwaano muchimwalleenyu mwawi ddiidda, voovaanyihanani ni Mulluku a Aisraele vawi mohaawukila Apwiya vawiimakellani nikuwa na mukutho nenna ni ovaanyihana ni Apwiya ollellova?

¹⁷ Upuwellani ochimwa wa o Peori wulle nko Apwiya yaallakilliiwana athwiiwa vawaarumihella mullilli wawoopiha. Ophiyera ollello khannaddeelliheve. Ethiyo ochimwa weewulle tti wooyeva?

¹⁸ Ethiyo vano moohiya waathwara Apwiya Mullukwaanyu? Mwaawukila ollello alliwa eneeronanariwella mutundu muttheene wa Aisraele osiisello.

¹⁹ Vano yoohallanaanyu yaarimi eri yooripihiwa, muye o yoohallana ya Apwiya nko onakhalla musasa wa Apwiya mwakawane ni hiyaano ellapwaahu. Koma muhinaawukila Apwiya apaalle opikisana ni hiyaano vawiimakellani nikuwa ohikhalla nikuwa na Apwiya Mullukwaahu.

²⁰ Upuwellani wi Akani, mwaana a Zera, aakhoota wiiwellella malamulo a ddeko ddoophwanella woonongiwanndde nave osha murima wahaamorella Aisraele attheene, ahoonongeya yeekhaayeve muthooyo ekaamba ya ochimwa wayenko.’ ”

²¹ Vano nlloko na Rubeni, na Gadi ni hafu mmoddoolle a nlloko na Manase, yaawaakhulla oohoollella a mabanja a Aisraelaayo wi,

²² “Mulluku Amasiva Mattheene tti Apwiya. Mulluku Amasiva Mattheene tti Apwiya. Annadduwella nave Aisraele eneerodduwella naarimi naavaanyihaka apaalle naachimwellaka Apwiya

²³ naarimi nihiwiiwellelle Apwiya vawiimakellani nikuwa nawoosellavo mukutho apaalle ovelleella ddoovelleella dda tirigu apaalle ddoovelleella dda murendelle, Apwiya yeekhiwa sika enaanillake.

²⁴ Neerille ddenndda woova ddamuhoollo wi edduullu ddanyu ddihillotelleke edduullu ddahu wi, ‘Kheyiivo eyo munaaweereenyu ni Apwiya Mulluku a Aisraele.

²⁵ Apwiya yahiikaatthi muhinje wa Yordani wi ekhalle malire variyari va hiyaano ni nyuwaano, athu a nlloko na Rubeni ni Gadi khamunna echigawo ni Apwiya.’ Sika edduullu ddanyu ttuuhiiha edduullu ddahu waallapella Apwiya.

²⁶ Ella sika ekaambiiwa namakelleehu nikuwa oohikhalla wi noosellekevo mukutho apaalle ovelleellellavo ddoovelleella,

²⁷ koma wi ekhalle omboni variyari va hiyaano ni nyuwaano. Nave ekhalle echizindikiro wa mibado ddinaaweeke mutulli mwahu wi ddidduwelle wi naanaarumeyella Apwiya ni mikutho ddahu ddooshellelliha, ddoovelleella navettho mikutho ddamurendelle. Sika edduullu ddanyu ddihiwe ddillota wa edduullu ddahu muhoollommu wi, ‘Khamunna echigawo ni Apwiya.’

²⁸ Yaalla sika yaari maganizwaahu wi ddenndda ddawa ddeereya hiyaano nillote wi, ‘Ngoonani, makhollwaahu yaamaka nikuwa noophwanaphwana ni nikuwa na Apwiya. Nenna khanaahiyo noovelleellella mikutho ddawoosa apaalle wiiphellavo enama dda mukutho koma naari mboni variyari va hiyaano ni nyuwaano.’

²⁹ Khaniwora waawukila Apwiya. Khaniworattho ohiya waathwara ollellova ni omaka nikuwa na mukutho wooshellelliha apaalle yoovelleella ya yoocha apaallettho na mikutho ddimodda wi nipikisaneke ni nikuwa na Apwiihu nno niri vahoollo va nipuro noopatuleya mmo Apwiya enakhalliiwamo.”

³⁰ Mullupa mukutho muullupalli Finehasi ni attekweene ayo aariiyena ayo yaari oohoollella a mabanja a Aisraele yiiwalle nnddo yallonte athu a nlloko na Rubeni, Gadi ni Manase yaahakallalla wunchichi.

³¹ Mullupa mukutho Finehasi, mwaana a Eleazara ahaalleella athu a malloko a Rubeni, Gadi ni Manase wi, “Vano noodduwella wi Apwiya eri ni hiyaano vawi khamwaawukilalle ovaanyihana ni Apwiya. Mohaavullusa Aisraele o ollaka wa Apwiya.”

³² Vano mullupa mukutho Finehasi ni oohoollellaayo yaavenyamo mu ellapo ya Giliyadi yaahiya athu a nlloko na Rubeni ni na Gadi, ehokollweella mu ellapo ya Kanani wa Aisraele nave yahaatthopoollella ddittheddenennddo.

³³ Mawu yallotiwaayo yahaahakallalliha Aisraele attheene. Yaamutitimiha Mulluku nave kheyaallotillettho ddoowana ekhoto wi yoononge ellapo eyo yakhalla athu a malloko a Rubeni ni Gadi.

³⁴ Sika athu a malloko a Rubeni ni a Gadi yaanivaha nikuwanno nnddina nawi Omboni kaambiiwa alliwaayo yaallota wi, “Yoolla tti omboni wa attheenehi wi Apwiya tti Mullukwaahu.”