Yoswa 20 - Mawu a Mulluku

Mizinda ddoovulluwellamo

¹ Apwiya yaamulleella Yoswa wi,

² “Alleelle Aisraele wi, ‘Tthoollani mizinda ddoovulluwellamo, nnddo mi kuulleelleemini oweella mwa Mose.

³ Sika arive muthu oomwiipha mukhwaaye, oohikhalla mwaphudda, ttuuthawellawo nave ttuuvulluwa wa muthu oyo anapaalla omuhokollosella ddoonanara.

⁴ Muthu athawella nave aphiya va muzinda mmodda mwa mizinda ddennddo, vanipuroni naweeruzella nno niri va mullako, aatthopoollelle mullatwaaye attekweene. Vano emwaakhullelle ovollowa m'muzindanimmo nave emuvahe nipuro nawi akhallekemo.

⁵ Muthu oopaalla omuhokollosella ddoonanara amuthwara wenko, athu a m'muzindanimmo ehimuvelleelle muthu awiiphooyo wa olliyooyo. Koma emuteteze kaambiiwa eerille ddiiddo ohikhalla mwaphudda, voomwiiphani mu Israele mukhwaaye ekaamba yawi kheerille phudda omwiipha mukhwaaye nave khaawiitanena ovenyera khalle.

⁶ Oomwiipha mukhwaayooyo aneerokhalla m'muzindanimmo ophiyera eeruziwe vamiitthoni va athu attheene navettho ophiyera mullupa mukutho muullupalli a enthawi yeeyo akhwille. Vano muthooyo ttuuwora ohokollweella owaniwa, muzinda oyo avenyenreeye voothawani.’ ”

⁷ Sika yaapatula muzinda wa Kadeshi mu echigawo ya Galileya, ellapo yamiyaango ya Nafutali, ellapo yamiyaango ya Efuremu, muzinda wa Shekemu ni muzinda wa Kiriyati Ariba (sika wi Hebroni) o ellapo yamiyaango ya Yuda.

⁸ Okhopella wa muhinje wa Yordani, wookhuma nndduwa wa muzinda wa Yeriko muchipululuni mulle, yaapatula muzinda wa Bezeri, o ntapo, variyari va mizinda dda nlloko na Rubeni. Variyari va mizinda dda nlloko na Gadi o Giliyadi yaapatula muzinda wa Ramoti. Nave variyari va mizinda dda nlloko na Manase o Bashani yaapatula muzinda wa Golani.

⁹ Ddenndda tti mizinda nnddo ddatthoolliwe wi ddikhalle ddoothawellamo Aisraele attheene naarittho alleto ookhalla variyari viwa. Arive muthu oomwiipha muthu oohikhalla mwaphudda avulluwellewo. Oomuthwara wi amuhokolloselle yoonanara ahimwiiphe mullatwaaye ohiniipiwe vamiitthoni va attheene.