Yoswa 2 - Mawu a Mulluku

Yoswa anaaruma athu wi yazonde muzinda wa Yeriko

¹ Vano Yoswa, mwaana a Nuni, ahaaruma athu eelli wi yazonde mwawiipittheya ovenyera omisasani dda Shitimu, aalangiza wi, “Khaweni mwayizonde ellapweeyo, makamaka mwazonde muzinda wa Yeriko.” Sika athu oozondaayo yaayaawo yaphiya o enyumba ya hule nnddina naye Rahabu, yakona wenko.

² Mwene a muzinda wa Yerikooyo ahiiwa wi Aisraele amodda aaphiya m'muzindanimmo mahiiyu wi ezonde ellapweeyo.

³ Sika mwenooyo ahaaruma athu wa Rahabu yamulleella wi, “Athu ayo eri mpa mwawaayo eweelle ozonda ellapo ettheeneella, vano akhumihe.”

⁴ Koma enthawi yeeyo mutthiyana aari aakusalle athu eellaayo aavittha, sika aawaakhulla wi, “Ddawoona onyumbani waka wuno waawa athu amodda koma nginadduwella nko yavenyeriiwawo.

⁵ Wuno evenyillewo misikuwa, millako dda muzindoolla ddiyaaka ni owalliwa. Nginadduwella nko yayiiwa koma mwaathwara mwawaakuva ttuuwaaphwanya.”

⁶ Enthawi yeeyo aari aawellihalle vaddullu va enyumbaaye, aakhuneella ni miteekho.

⁷ Athu oorumiwa ni mwenaayo ekhumalle m'muzindanimmo millako ddaawalliwa. Nave yaaya omisewuni yawaashaashaka athu oozondaayo yaphiya vadoko va muhinje wa Yordani.

⁸ Vano oozondaayo ehinakone, Rahabu aawella vaddullu va enyumbeeyo,

⁹ aalleella wi, “Koodduwella wi Apwiya ahuuvahani ellapo ettheeneella nave attheenehi ninnoova, mirima ddahu ddinnatthukumella!

¹⁰ Nohiiwa mmo Apwiya yawelleellihelliiwa Enyanja Yoofiira nyu mwaphiyeenyu, mukhumaka mu ellapo ya Iguputo ni nnddo mwaweerelleenyu mamwene meelli Aamori, Sihoni ni Ogi, wookhuma nndduwa okhopella wa Yordani, ayo mwawoonongilleenyu.

¹¹ Niiwalle ddenndda, attheenehi naatathilla murima nave nahaamba owoovani nyuwaano. Ninnadduwella wi Apwiya Mullukwaanyu tti Mulluku ooddullu ni ellapo yavatthi ettheene.

¹² Vano mullupelle vamiitthoni va Apwiya vawi kooweerellani echifundo wi nyuttho mweerelle echifundo nibanja naka ni okinnya echizindikiro yawoona

¹³ wi, muneerewaasunga attiitthaaka, amoowaaka, arokoraka ni asinnaka ni mabanjiiwa, ni ovullusa okumaahu wuukhwaani.”

¹⁴ Athwaayo yaamwaakhulla wi, “Hi niri ookhozekella okhwa wi nuuvulluse weyaano. Waahiwulula nndda neerilleehu, hiyaanottho nineerosunga nnddo nilonjezilleehu wa weyaano moororomelleya, Apwiya yanivaha ellapweella.”

¹⁵ Vano Rahabu ahaakitthihella vatthi ni mukwe oweella vaniwindoni vawi enyumba ya Rahabu yaari vaddullu va mpanda wa muzindooyo.

¹⁶ Aari aalleelle wi, “Khaweni, muweelle omiyaangoni wi oowaashaashani ehuuphwanyeni. Mwiipitthe wenko mallapo ookwakhwana mararu ophiyera alliwaalle ehokollowille. Vano ttuuwora orowa.”

¹⁷ Vano athwaayo yaamulleella wi, “Khanilakwella ollupella nko onillupellihalleewe.

¹⁸ Navollowa ellapweeyo weyaano omake mukwe woofiiroolla vaniwindoni onaanikitthihelleewemva. Vano waatthukumanihe mpa mwawommu attiittho, amaayo, abalaawo ni attheene a munibanjani na attiittho.

¹⁹ Mmodda akhuma mpammo aneeteeta m'musewuni, nnddo anaawooneeye tti mullatu wa vamuru vaye. Hiyaano kheyiivo ninaalakweehu. Koma arive muthu oyo anaakhalle mpa mwawommo, oona otulli, mullatu onaakhalle vamuru vahu.

²⁰ Komattho wawulula nineereehunndda, hiyaano khanisunga nillupenlleehunndda.”

²¹ Rahabu aawaakhulla wi, “Ddikhalle wonanko mmo mullotelleenyu.” Rahabu ahaakhumiha nave athu oozondaayo yaavenyawo. Vano Rahabu aamaka mukwe woofiira vaniwindoni valle.

²² Vatulli viwa athu oozondaalle yaaya omiyaangoni yiipittha nave oorumiwa ni mwenaalle yaawaashaasha virive veko mallapo mararu koma khayaawaaphwannye, sika yaahokollowa.

²³ Oozonda eellaalle yaakittha omiyaangoni wulle nave yaallapuwa muhinjoolle yaphiya wa Yoswa mwaana a Nuni, emutthopoollella ddittheddene yakumanilliiwana.

²⁴ Yaamulleella Yoswa wi, “Hi noosimikiza wi Apwiya aanivaha ellapo ettheene. Athu attheene wenko mirima ddiwa ddinnoova.”