Yoswa 19 - Mawu a Mulluku

Echigawo ya Simeoni

¹ Woombesa waneepiilli waamorella nlloko na Simeoni moollikana ni mabanjiiwa. Yoohallaniiwa yaari muwariwari mwa yoohallaniiwa ya nlloko na Yuda.

² Yoohallaniiwa yaari Beeresheba, apaalle Sheba, Molada,

³ Hazara Shuwala, Bala, Ezemu,

⁴ Elitoladi, Betuli, Horoma,

⁵ Zikilagi, Betemara Kaboti, Hazara Susa,

⁶ Betelebaoti ni Sharuheni, mizinda khumi ni miraru ni matawoniiwa.

⁷ Vaakhallattho Aini, Rimoni, Eteri ni Ashani, mizinda misese ni matawoniiwa,

⁸ ottakanyiheravo matawoni oowaapheella mizindannddo ophiya o Baalati Bere, sika wi Rama a omwera. Ella sika yoohallaniiwa ya nlloko na Simeoni moollikana ni mabanjiiwa.

⁹ Echigawo ya Simeoni yavahulliwe o yoohallaniiwa ya Yuda vawi echigawo ya Yuda yaawunnuwella. Sika ekaambiiwa yoohallaniiwa ya Simeoni yaariiwa variyari va yoohallaniiwa ya nlloko na Yuda.

Echigawo ya Zebuloni

¹⁰ Woombesa waneeraru waamorella nlloko na Zebuloni moollikana ni mabanjiiwa. Malire a yoohallaniiwa yaaphiya o Saridi.

¹¹ Vano maliraayo yaawella yaphiya woovollowa nndduwa ni o Mareyala yaphiyattho o Dabesheti ni o muhinje vahoollo va Yokoneyamu.

¹² O embali emodda ya Saridi yahaapheella yaphiya wookhuma nndduwa o malire a Kisiloti Tabori eya o Daberati yaphiya o Yafiya.

¹³ Ovenyera wenko yaakhumellella wookhuma nndduwa yaphiya o Gatihefere, o Etikazini, erukunuwella o Rimoni ayo yaphiya o Neya.

¹⁴ Ompoto malire yaayo yahaapheella yaphiya o Hanatoni yakhumellella o ntapo na Ifutahele.

¹⁵ Yaattakanyiheravo Katati, Nahalala, Shimironi, Idala ni Betelehemu, mizinda khumi ni miilli ni matawoniiwa

¹⁶ Ella yaari yoohallaniiwa ya nlloko na Zebuloni moollikana ni mabanjiiwa, mizinda ddenndda ni matawoniiwa.

Echigawo ya Isakara

¹⁷ Woombesa waneesese waamorella nlloko na Isakara moollikana ni mabanjiiwa.

¹⁸ Echigawiiwa yaari Yezireele, Kesuloti, Shunemu,

¹⁹ Hafaraimu, Shioni, Anaharati,

²⁰ Rabiti, Kishiyoni, Ebezi,

²¹ Remeti, Enganimu, Enihada ni Betepazezi.

²² Maliriiwa yaaphiya o Tabori, Shahazuma ni o Beteshemeshi yakhumellella o Yordani, mizinda 16 ni matawoniiwa.

²³ Ella sika yoohallaniiwa ya nlloko na Isakara moollikana ni mabanjiiwa, mizinda ni matawoniiwa.

Echigawo ya Ashere

²⁴ Woombesa waneetthanu waamorella nlloko na Ashere moollikana ni mabanjiiwa.

²⁵ Echigawiiwa yaattakanyihera Helekati, Hali, Beteni, Akishafu,

²⁶ Alamumeleki, Amada ni Mishala. Woovollowa nndduwa yaaphiya o Karimele ni o Shihori Libinati

²⁷ Yaakhoromanella wookhuma nndduwa evollowella o Betedagoni yaphiya o ellapo ya Zebuloni ni o ntapo na Ifutahele ompoto o Betemeke ni o Neiyeli, ekhwaranyella o Kabulu wuunyotthoni,

²⁸ Ebdoni, Rehobu, Hamoni ni Kana yaphiya o Sidoni muullupalli.

²⁹ Vano maliraayo yaakhoromanella o Rama yaphiya o Tiro, muzinda wa mpanda. Vaavo yaakhoromanellattho o Hosa, yakhumellella o enyanja ovenyera o Mahalabu yaphiya o Akizibu,

³⁰ Uma, Afeki ni Rehobu mizinda 22 ni matawoniiwa.

³¹ Ella sika yoohallaniiwa ya nlloko na Ashere moollikana ni mabanjiiwa, mizinda ni matawoniiwa.

Ellapo ya Nafutali

³² Woombesa waneetthanu ni omodda waamorella nlloko na Nafutali moollikana ni mabanjiiwa.

³³ Maliriiwa yaambeelle o Helefe ovenyera o muteekho wamuthundu wa o Zaananimu, Adami Nekebu ni o Yabinele yaphiya o Lakumu yakhumellella o muhinje wa Yordani.

³⁴ Vano maliraayo yaakhoromanella woovollowa nndduwa o Azinoti Tabori, ekhumellella o Hukoko yaphiya o Zebuloni omwera ni o Ashere wookhuma nndduwa ni omuhinjeni wa Yordani.

³⁵ Mizinda dda mpanda ddaari Zidimu, Zeri, Hamati, Rakati, Kinereti,

³⁶ Adama, Rama, Hazori,

³⁷ Kedeshi, Ederei, Enihazori,

³⁸ Yironi, Migidalele, Horemu, Betanati ni Beteshemeshi, mizinda 19 ni matawoniiwa.

³⁹ Ella sika yoohallaniiwa ya nlloko na Nafutali moollikana ni mabanjiiwa, mizinda ni matawoniiwa.

Ellapo ya Dani

⁴⁰ Woombesa waneetthanu ni wiilli waamorella nlloko na Dani moollikana ni mabanjiiwa.

⁴¹ Echigawiiwa yaari Zora, Eshitaoli, Irishemeshi,

⁴² Shaalabini, Ayaloni, Itila,

⁴³ Eloni, Timna, Ekeroni,

⁴⁴ Eliteke, Gibetoni, Baalati,

⁴⁵ Yehudi, Beneberaki, Gatirimoni,

⁴⁶ Meyarikoni ni Rakoni navettho ellapo yoowehana ni Yopa.

⁴⁷ Athu a nlloko na Dani yaakhenlliiwa ellapwiiweeyo, yaaya yawana ekhoto ni Leshemu, yaagonjiha ni owoononga adaniiwa attheene. Vano yahaakha muzindooyo, ekeraattheya wenko. Muzindooyo yaawuvaha nnddina nawi, Leshemu, Dani, nnddina na nikhollo niwa Dani.

⁴⁸ Ella sika yoohallaniiwa ya nlloko na Dani moollikana ni mabanjiiwa, mizinda ni matawoniiwa.

Enakawa ellapo wookomihera

⁴⁹ Vano Aisraele emanlle okawana ezigawo ddoohiyanahiyana dda ellapweeyo. Yaamukawellawo Yoswa mwaana a Nuni echigawo emodda ya ellapweeyo wi ekhalle yoohallanaaye.

⁵⁰ Moollikana ni nnddo Apwiya yalamulalliiwa, yaamuvaha Yoswa muzinda wa Timnati Sera, oyo Yoswa mwaneenaaye avekilleeye, oyo waari mu ellapo yamiyaango ya Efuremu. Sika nko amakilleeye muzindaaye, akeraattheyawo.

⁵¹ Mullupa mukutho, Eleazara, Yoswa mwaana a Nuni ni oohoollella a mabanja a Aisraele sika yakawille ellapo yeella ekhalle yoohallaniiwa vawoombesani vamiitthoni va Apwiya o Shilo, o mullako wa musasa wamutthukumano. Sika yaamalliha okawa ellapo.