Yoswa 18 - Mawu a Mulluku

Okawiwa wa ezigawo ddoohalla

¹ Aisraele attheene yaatthukumana o Shilo emakawo musasa wamutthukumano nave ellapo yahaagonjella.

² Enthawi yeeyo malloko matthanu ni meelli a Aisraele yaari ehinavahiwe ezigawo ddiwa dda ellapweeyo wi ekhalle yoohallaniiwa.

³ Sika Yoswa ahaakoha Aisraele wi, “Ethiyo munatiyere ophiyera niini wi muvollowe mu ellapo eyo Apwiya Mulluku a makhollwaanyu, yuuvahilliiwani?

⁴ Kinnyeni allopwana araru oovenyera mu orive mulloko wi kaarumihe wi yeeteete mu ellapo ettheene nave yalembe phaama magawiiwa mattheene wi yayilembe moollikana ni yoohallaniiwa. Yeeddiiddo ewettho wa miyaano.

⁵ Ekawe ellapweeyo ezigawo dditthanu ni piilli. Yuda akhalle mu ellapwaaye ya omwera nave Yosefe akhalle mu ellapwaaye ya ompoto.

⁶ Mulembe mawu ootthopoolla dda ezigawo dditthanu ni piilli dda ellapo yeeyo nave mukinnye miyaano. Miyaano sika kinaawoombeselleni vamiitthoni va Apwiya Mullukwaahu.

⁷ Alevive sika ehinaakhellena echigawo ya ellapweeyo wi ekhalle yoohallaniiwa vawi echigawiiwa tti omullupa mukutho wa Apwiya. Nlloko na Gadi, na Rubeni ni hafu a nlloko na Manase yahaakhella khalle echigawiiwa okhopella wa muhinje wa Yordani, wookhuma nndduwa. Mose, oorumeyella a Apwiya sika aavahille.”

⁸ Vano athwaayo yaatimulla olendwiiwa nave Yoswa ahaalamulella anamalemba a ellapwaayo wi, “Khaweni mweeteete mwiillaponimmo, mwayilembe nave muwettho wa miyaano. Vano kineerowoombesellani vamiitthoni va Apwiya wuno o Shilo.”

⁹ Sika athwaayo yaatimulla yeeteeta mwiillaponimmo, yayilemba munibukhuni erive etawoni, ezigawo dditthanu ni piilli ehokollweella wa Yoswa omisasani dda o Shilo.

¹⁰ Vano Yoswa ahoombesa, vamiitthoni va Apwiya o Shilo. Nave nirive nlloko na Aisraele naakawelliwa echigawo ya ellapweeyo.

Echigawo ya Benjamini

¹¹ Mabanja a nlloko Benjamini yahaakhella ellapo ya variyari va Yuda ni Yosefe.

¹² Maliriiwa a ompoto yaambeelle o muhinje wa Yordani, ewella mutunda wa Yeriko ompoto ewella mu ellapo yamiyaango woovollowa nndduwa yakhumellella o echipululu ya Betaveni.

¹³ Vano maliraayo yaakhwaranyella o Luzi, museresere mwa mwaango wa Luzi (yooromolliwa Betele). Vano yaakitthella o Ataroti Adara, oweella o mwaango oyo waari omwera wa Betehoroni Oohito.

¹⁴ Nave maliraayo yahaapheella oyeella woovollowa nndduwa omwera, ovenyera o mwaango vahoollo va Betehoroni omwera wiwa yakhumellella o muzinda wa Kiriyati Baala (wooromolliwa Kiriyati Yearimu), muzinda wa nlloko na Yuda, woovollowa nndduwa.

¹⁵ Malire a omwera yaambeelle vakomelle Kiriyati Yearimu woovollowa nndduwa, eya yaphiya o aneetuutu a o Nefitowa.

¹⁶ Yaakitthella vakomenlle mwaango wa vahoollo va ntapo na Mwaana a Hinomu, sika wi ntapo na Refaimu ompoto ekitthella o ntapo na Mwaana a Hinomu, omwera wa Ayebusi, ekitthella o Enirogele.

¹⁷ Vano malire yaakhumellella ompoto yaphiya o Eneshimeshi nave yaphiyattho o Geliloti, owehana ni voowellella va Adumimu. Vano maliraayo yaakhoromanella o nlluku na Bohani, mwaana a Rubeni.

¹⁸ Yaawella ompoto wa mutunda wa Betaraba, ekitthella o Araba.

¹⁹ Maliraayo yaakhwaranyellattho o Betehogila ompoto nave yakhumellella ompoto wa wowiithella muhinje wa Yordani o Enyanja Yookhwa, omwera wiwa wa muhinje wa Yordani malire a omwera.

²⁰ Muhinje wa Yordani sika waari malire a wookhuma nndduwa, yoohallaniiwa ya athu a nlloko na Benjamini voollotani dda maliriiwa oowaapheella moollikana ni mabanjiiwa.

²¹ Mizinda dda nlloko na Benjamini moollikana ni mabanjiiwa ddaari Yeriko, Betehogila, Emekezizi,

²² Betaraba, Zemaraimu, Betele,

²³ Avimu, Para, Ofura,

²⁴ Kefaramoni, Ofini ni Geba mizinda khumi ni miilli ni matawoniiwa.

²⁵ Vaakhallattho Gibiyoni, Rama, Beeroti,

²⁶ Mizipa, Kefira, Moza,

²⁷ Rekemu, Iripele, Tarala,

²⁸ Zela, Haelefe, Yebusi (sika wi Yerusalemu), Gibea ni Kiriyati Yearimu, mizinda khumi ni misese ni matawoniiwa. Ella tti yoohallaniiwa ya nlloko na Benjamini moollikana ni mabanjiiwa.