Yoswa 17 - Mawu a Mulluku

Nlloko na Manase na wookhuma nndduwa

¹ Echigawo emodda ya ellapweeyo yaavahiwa wa Manase oyo aari mwaana awaamba a Yosefe. Makiri, nikhollo na athu ookhalla o Giliyadi sika aari mwaana awaamba a Manase. Makiri aarittho akhoto wawi ezigawo dda Giliyadi ni Bashani ddaavahiwa wa olliye.

² Athu oohalla a nlloko na Manase ayo yavahiwe yoohallaniiwa moollikana ni mabanjiiwa yaari Abiyezere, Heleki, Asiriele, Shekemu, Hefere ni Shemida. Yaalla sika edduullu dda Manase, mwaana a Yosefe moollikana ni mabanjiiwa.

³ Vano Zelofehadi, mwaana a Hefere, mwaana a Giliyadi, mwaana a Makiri, mwaana a Manase, khaarina mwaana aamullopwana koma aatthiyanave. Manddina a anamwanaayo tti Mala, Nowa, Hogola, Milika ni Tiriza.

⁴ Alliwaalla yaawa vamiitthoni va Eleazara, mullupa mukutho, va Yoswa mwaana a Nuni ni va oohoollella ellota wi, “Apwiya yaamulamula Mose anivahe yoohallanaahu variyari va abalaahu sika ekaambiiwa yaavahilliiwa moollikana ni mmo yalamulelle Apwiya, yoohallaniiwa variyari va attiitthiiwa.

⁵ Sika woonjerera va ellapo ya Giliyadi ni Bashani ntthella na muhinje wa Yordani, a nlloko na Manase yahaakhellattho ezigawo khumi,

⁶ vawi anaaye aatthiyana ni aallopwana yahaakhella yoohallaniiwa. Ellapo ya Giliyadi yaari ya oohalla mwa edduullu dda Manase.”

⁷ Malire a Manase yavenyenre o Ashere yaphiya o Mikimetati wookhuma nndduwa wa Shekemu. Vano yaaphiya omwera wa aneetthi a o Enitapuwa.

⁸ Ellapo ya Tapuwa yaari ya Manase koma muzinda wa Tapuwa ophiya omalireni wa Manase waari wa anamwani a Efuremu.

⁹ Vano maliriiwa yaakitthella omuhinjeni wa Kana. Mizinda ddoomwera wa mwanamuhinje yooyo ddaari ya nlloko na Efuremu naari yaari ya Manase. Malire a Manase yahaapheella ompoto wa muhinje yakomella o Enyanja Yuullupalli.

¹⁰ Efuremu aari omwera, Manase aari ompoto nave Enyanja Yuullupalli yaari malire. Malire yaaphiya o Ashere ompoto wa woovollowa nndduwa ni o Isakara ompoto wa wookhuma nndduwa

¹¹ Mu ellapo ya Isakara ni ya Ashere mwakhalla echigawo ya Manase yooromolliwa wi Betesheani vamodda ni matawoni oowaapheella. Vaakhallattho Akanani ayo yakhalla o Ibleamu, o Dori muzinda wa mukhwipi mwa enyanja, o Endori, o Taanaki ni o Megido ni matawoniiwa oowaapheella.

¹² Koma athu a nlloko na Manase kheyaawonre owiikariha Akanani ookhalla m'mizindaninnddo. Sika Akanani yaavirellella okhalla mwiillaponimmo.

¹³ Naari Aisraelaayo yaariiwa ni masiva mwiillaponimmo, kheyaawiikarihalle Akanani attheene koma yaatthattusalle athu oophara mitteko ddathangata.

Efuremu ni Manase a woovollowa nndduwa enaveka wi ewoonjerere ellapo

¹⁴ Edduullu dda Yosefe ddaamukoha Yoswa wi, “Kaambiiwa tini munikawenlleenyu echigawo emodda ya ellapo wi ekhalle yoohallanaahu? Hiyaanothi nohaata vawi Apwiya yaanidalisa.”

¹⁵ Yoswa aawaakhulla wi, “Mwaarimi muri awaata nave wi ellapo yamiyaango ya Efuremu yohuuyevellani, vollowani muutthakoni muuhe miteekho nave wi mwiikhozere nipuro nawi mukhallekemo mu ellapo ya Aperezi ni Arefaimu.”

¹⁶ Vano edduullu dda Yosefennddo ddaallota wi, “Ddawoona ellapo yamiyaangweeyo khenikwakhwanelle hiyaano komattho Akanani ayo eri mu ntapo aakhalla ni magareta a mikoko ni ayo eri o Betesheani ni matawoni oowaapheella navettho ayo eri mu ntapo na Yezireele.”

¹⁷ Yoswa aalleella edduullu dda Yosefe, dda nlloko na Efuremu ni na Manase wi, “Nyu mohaata nave nyuwaano muri amasiva muneerewaakhella ezigawo ddimoddattho.

¹⁸ Muneerewaakhella ellapo yamiyaango naari eri ni otthako, nyuwaano muuhe miteekho nave muneerewaakhella ellapweeyo wi ekhalle yaanyu. Akananaayo muneerowiikariha naari eri ni magareta amikoko navettho naari alliwaayo eri amasiva.”