Yoswa 16 - Mawu a Mulluku

Ellapo eyo yavahiwe a Efuremu ni a Manase a wookhuma nndduwa

¹ Ellapo eyo yavahiwe wa edduullu dda Yosefe yaambeelle omuhinjeni wa Yordani vakhuviru ni muzinda wa Yeriko, wookhuma nndduwa wa aneetuutu a muzinda wa Yeriko nave yaaphiya muchipululuni. Yahaambeellattho o Yeriko nave yaavollowa mu ellapo yamiyaango embali ya woovollowa nndduwa yaaphiya mu echipululu ya Betele.

² Ovenyera o Betele yaaphiya o Luzi, ekhwaranyella o Ataroti nko wakhalla Aariki.

³ Vano yaakhwaranyella woovollowa nndduwa, oweella o Ayafaleti, ophiyera ohito wa Betehoroni. Ovenyera wenko maliraaye yaayeella o Gezere, yakomella o enyanja.

⁴ Sika anamwani a Yosefe, Manase ni Efuremu yahaakhella yoohallaniiwa.

Malire a ellapo ya Efuremu

⁵ Malire a Efuremu moollikana ni mabanjiiwa yaari ovenyera o malire a yoohallaniiwa ya wookhuma nndduwa o Ataroti Adara ophiya omutundani wa Betehoroni.

⁶ Ovenyera wenko maliriiwa yaakitthella o enyanja. Nave ompoto wiwa waakhalla Mikimetati. Malire a wookhuma nndduwa yaakhoromanella o Taanatishilo ekhwaranya mapuro yaayo yaphiya wookhuma nndduwa wa Yanowa.

⁷ Vano ovenyera o Yanowa, yaakitthella o Ataroti ni o Naara. Yaaphiya o Yeriko yakomella mu Yordani.

⁸ Maliraayo yaavolloweella woovollowa nndduwa ovenyera o Tapuwa yaphiya omuhinjeni wa Kana nave yaakhumellella o Enyanja Yuullupalli. Ella sika yaari yoohallaniiwa ya Aefuremu moollikana ni mabanjiiwa,

⁹ ottakanyiheravo mizinda ddoopatulelliwa wa Aefuremu variyari va yoohallaniiwa ya a Manase, matawoni mattheene ni mizi ddiwa.

¹⁰ Koma Aefuremu kheyaawiikanre Akanani ookhalla o Gezere koma wi Akanani yaalla aakhallavove variyari va Aefuremu ophiyera ollello nave ennaawatihera ophara mutteko wathangata.