Yoswa 15 - Mawu a Mulluku

Ellapo eyo avahiwe Yuda

¹ Athu a nlloko na Yuda moollikana ni mabanjiiwa echigawiiwa yaaphiya omwera wa malire a Edomu, omwera wa echipululu ya Zini omamallihello a omwera.

² Maliriiwa a omwera yaambeelle omwera wa Enyanja Yookhwa,

³ eweella omwera wa Akarabimu ekhwaranyella o Zini. Ovenyera wenko yaawella omwera wa Kadeshi Baranea ekhwaranyella o Hezironi ophiya o Adara yaapheella o Karaka.

⁴ Yaakhwaranyella o Azimoni yakhumellella muhinje wa m'malireni a Iguputo ophiya o enyanja. Yaayo sika malire a omwera.

⁵ Malire a wookhuma nndduwa yaari Enyanja Yookhwa ophiyera nko Yordani iithellellaaye mu Enyanja Yookhwa. Vano malire a ompoto yaambeelle o enyanjeeyo,

⁶ ewella yaphiya o Betehogila evirellella ompoto wa Betaraba, ekhwaranyella o nlluku na Bohani mwaana a Rubeni.

⁷ Nave maliraayo yaawellattho o ntapo na Akori yaphiya o Debiri yaphiyattho ompoto ekhoromanella o Giligala moowehana ni mutunda wa Adumimu embali ya omwera wa ntapo. Vano yaakhwaranyellattho o aneetuutu a Eneshimeshi, yakhumellella o Enirogele,

⁸ Nave yaawella oweella o ntapo na Mwaana a Hinomu embali ya omwera wa Ayebusi, (sika wi o Yerusalemu). Makuthullellwaayo yaakhwaranya yaphiya omwera wa mwaango wa vahoollo va ntapo na Mwaana a Hinomu woovollowa nndduwa, omamallihello a ntapo na Refaimu ompoto.

⁹ Vano yaavenyerattho vaddullu va mwaango yaphiya o aneetuutu o Nefitowa, yakhumellella o mizinda dda mwaango wa Efuroni. Ovenyera wenko yaakitthella o Baala, (sika wi Kiriyati Yearimu)

¹⁰ Nave maliraayo yahaapheella waambeella Baala woovollowa nndduwa, o mwaango wa Seiri evirirellella o embali ya mwaango wa Yearimu ompoto (sika wi Kesaloni), ekitthella o Beteshemeshi ekhwaranyella o Timna.

¹¹ Vano maliraayo yaakhumellella wookitthella mwaango wa Ekeroni ompoto ephiya o Shikeroni, ekhwaranyella o mwaango wa Baala ekhuma o Yabinele yamallella o enyanja.

¹² Malire a woovollowa nndduwa yaari Enyanja Yuullupalli. Yaalla sika yaari malire awaapheella nlloko na Yuda ni mabanjiiwa.

Kalebe anagonjiha mizinda dda Hebroni ni Debiri

¹³ Moollikana ni mmo Apwiya yamulamulalliiwa Yoswa, echigawo emodda ya ellapo ya Yuda yaavahiwa wa Kalebe, mwaana a Yefune. Yoswa aamuvaha Kiriyati Araba, sika wi Hebroni. (Araba aari mwaana a Anaki).

¹⁴ Kalebe aawiikariha malloko mararu a anamwani a Anaki mwiillaponimmo. Manddiniiwa yaari Sheshai, Ahimani ni Talimai.

¹⁵ Ovenyera wenko yaaya yawana ni athu a o Debiri. Muzinda yoolla khalle waromolliwa wi Kiriyati Sefere.

¹⁶ Vano Kalebe aallota wi, “Akhoto muullupalli oyo anaawane ni athu a muzinda wa Kiriyati Sefere nave aagonjiha, kineeromwinnya mwanaka Akisa wi akhalle mwaariye.”

¹⁷ Mwanamunne Kalebe, Otiniyele, mwaana a Kenazi, Ahaagonjiha athu a muzinda yoolla. Sika Kalebe aamwinnya mwanaye, Akisa wi akhalle mwaariye.

¹⁸ Nllapo nimodda, Akisooyo aphiyalle, Otiniyele aamuwatihera mwaariyoolle wi aveke emata wa Kalebe attiitthinnya. Akisa akitthalle vabulunaaye, Kalebe aamukoha wi, “Ethiyo onapaalla tini?”

¹⁹ Vano aallota wi, “Kinapaalla wi mukivahe madaliso. Vawi mookivaha ellapo yoomwera, kivahenittho aneetuutu.” Sika aamuvaha aneetuutu a omutundani ni a mutapo.

Mizinda dda Yuda

²⁰ Ella tti yoohallana eyo mabanja a nlloko na Yuda yaakhenlliiwa.

²¹ Mizinda ddoomwera nnddo yaakhenlliiwa malire ni ellapo ya Edomu ddaari Kabizeele, Edere, Yaguru,

²² Kina, Dimona, Adada,

²³ Kedeshi, Hazori, Itinani,

²⁴ Zifi, Telemu, Bealoti,

²⁵ Hazori Hadata, Keriyoti Hezironi, (sika wi Hazori),

²⁶ Amama, Shema, Molada,

²⁷ Hazara Agada, Heshimoni, Betepeleti,

²⁸ Hazara Shuwala, Beeresheba, Biziyotiya,

²⁹ Baala, Iyimu, Ezemu,

³⁰ Elitoladi, Kesili, Horoma,

³¹ Zikilagi, Madimana, Sanisana,

³² Lebaoti, Shilihimu, Aini ni Rimoni. Mizinda ddittheddene vamodda ddaari 29 ni matawoni oowaapheella.

³³ Mizinda dda museresere mwa Eshitaoli, Zora, Ashina,

³⁴ Zanowa, Enganimu, Tapuwa, Enamu,

³⁵ Yaramuti, Adulamu, Soko, Azeka,

³⁶ Shaaraimu, Aditaimu, Gedera ni Gederotaimu. Ddittheddene vamodda ddaari mizinda 14 ni matawoni oowaapheella.

³⁷ Vaakhallattho Zenani, Hadasha, Megidali Gadi,

³⁸ Dileani, Mizipa, Yokotele,

³⁹ Lakishi, Bozikati, Egiloni,

⁴⁰ Kaboni, Lahamasi, Kitilishi.

⁴¹ Gederoti, Betedagoni, Naama navettho Makeda. Mizinda ddittheddene vamodda ddaari 16 ni matawoni oowaapheella.

⁴² Vaakhallattho Libina, Eteri, Ashani,

⁴³ Ifuta, Ashina, Nezibu,

⁴⁴ Keila, Akizibu ni Maresha. Mizinda ddittheddene vamodda ddaari dditthanu ni misese ni matawoni oowaapheella.

⁴⁵ Vaakhallattho Ekeroni ni matawoniiwa.

⁴⁶ Ddittheddene ddaari mukhwipi mwa Enyanja Yuullupalli ovenyera o Ekeroni ophiya o Ashidodi vamodda ni matawoni oowaapheella.

⁴⁷ Yahaakhellattho mizinda dduullupalli dda Ashidodi ni matawoni oowaapheella, Gaza ni matawoni oowaapheella. Makuthullellwiiwa yaaphiya o muhinje wa Iguputo ni o Enyanja Yuullupalli.

⁴⁸ O ellapo yamiyaango aari Shamiri, Yatiri, Soko,

⁴⁹ Dana, Kiriyati Sana, (sika wi Debiri),

⁵⁰ Anabu, Eshitemowa, Animu,

⁵¹ Gosheni, Holoni ni Gilo. Ddittheddene vamodda ddaari khumi ni mmodda ni matawoni oowaapheella.

⁵² Vaakhallattho Arabu, Duma, Eshani,

⁵³ Yanimu, Betetapuwa, Afeka,

⁵⁴ Humata, Kiriyati Ariba (sika wi Hebroni) Ziyori. Ddittheddene vamodda ddaari mitthanu ni misese ni matawoni oowaapheella.

⁵⁵ Vaakhallattho Mawoni, Karimele, Zifi, Yuta,

⁵⁶ Yezireele, Yokodeamu, Zanowa,

⁵⁷ Kaini, Gibea ni Timna. Mizinda ddittheddene vamodda ddaari khumi ni matawoni oowaapheella.

⁵⁸ Vaakhallattho Halahulu, Betezuri, Gedori,

⁵⁹ Maarati, Betanoti ni Elitekoni. Mizinda ddittheddene vamodda ddaari mitthanu ni mmodda ni matawoni oowaapheella.

⁶⁰ Vaakhallattho Kiriyati Baala (sika wi Kiriyati Yearimu) ni Raba. Mizinda ddittheddene vamodda ddaari miilli ni matawoni oowaapheella.

⁶¹ Mizinda dda muchipululuni ddaari Betaraba, Midini, Sekaka,

⁶² Nibishani, muzinda wa Mwiinyu ni Engedi. Mizinda ddittheddene vamodda ddaari mitthanu ni mmodda ni matawoni oowaapheella.

⁶³ Koma athu a nlloko na Yuda kheyaawonre owiikariha Ayebusi, aneetthi a Yerusalemu. Nave ophiyera ollello Ayebusaayo enakhalla o Yerusalemu ni athu a nlloko na Yuda.