Yoswa 14 - Mawu a Mulluku

Okawiwa wa ellapo ya wookhuma nndduwa wa Yordani

¹ Nndda tti ellapo nnddo Aisraele yaakhenlliiwa mu ellapo ya Kanani nnddo mullupa mukutho Eleazara, Yoswa mwaana a Nuni, oohoollella a mabanja a malloko a Aisraele yaakawenlliiwa Aisraele.

² Moollikana ni nnddo Apwiya yamulamulalliiwa Mose, ellapo ettheene yaakawiwa wa malloko matthanu ni masese owaaka hafu mwawoombesa.

³ Mose ahaakawella malloko meelli ni hafu ezigawo ddiwa o ellapo ya wookhuma nndduwa okhopella wa Yordani wi ekhalle yoohallaniiwa koma Alevi khaawaakawelle.

⁴ Vano nlloko na Yosefe naakawiwa veelli, Manase ni Efuremu. Alevi kheyaakawelliwe erive echigawo ya ellapo koma mizinda wi ekhallekemo ni mapuro awi echihekemo enama ddiwa.

⁵ Aisraelaayo yaakawana ellapweeyo moollikana ni nnddo Apwiya yamulamulelliiwa Mose.

Hebroni anavelleelliwa Kalebe

⁶ Athu a nlloko na Yuda yaawa wa Yoswa o Giligala. Kalebe mmodda a alliwaayo, mwaana a Yefune a o Kenizi aamulleella Yoswa wi, “Munnadduwella nnddo Apwiya yamulleelliiwa Mose muthu a Mulluku dda miyaano mu Kadeshi Baranea.

⁷ Enthawi yeelle kaari ni miyakha 40 Mose oorumeyella a Apwiya akirumalleeye ovenyera o Kadeshi Baranea wi kazonde ellapweelle nave kiwiillewo, kaamulleella ddawoona ddittheddene kaddoonilleemi.

⁸ Koma athu ayo yaari ni miyaano voolendonooyo yaaweeriha athu wi yoove. Koma miyaano kaawiiwellella Apwiya Mullukwaaka ni murimaaka muttheene.

⁹ Vano Mose aallupella nllapo nenno wi, ‘Ekaamba yawi waawiiwellella moororomelleya Apwiya Mullukwaaka ni murimaawo muttheene, weyaano ni anaawo, oneerewaakhella ellapo onyinganlleewe wi ekhalle yoohallanaawo.’ ”

¹⁰ Kalebe aavirellella ollotattho wi, “Koma vano voomalla miyakha 45 Apwiya emulleelle khalle Mose ddenndda. Enthawi eyo Aisraele yeetiiwa muchipululuni nave moollikana ni mmo yalonjezelliiwa Apwiya aakisunga miyaano ni okumi, vano kiri ni miyakha 85.

¹¹ Koma ollellova kookhalla ni masiva wonanko mmo kakhallelleemi enthawi yeelle Mose akirumeeye. Kookhalla ni masiva wawi ttuuwora owanana ekhoto nave ttuuwora weera erive ello.

¹² Vano mukikawelle ellapo yamiyaango moollikana ni mmo Apwiya yakilonjezelliiwa. Valle mwahiiwa wi Aanaki, athu amasiva, aakhallawove wenko m'mizindani dduullupalli ni ddamipanda. Koma apaalle Apwiya ttuukhalla ni miyaano nave kineerowiikariha moollikana ni mmo Apwiya yallotelliiwa.”

¹³ Enthawi yeeyo Yoswa aamudalisa Kalebe, mwaana a Yefune, amuvaha ellapo ya Hebroni wi ekhalle yoohallaniiwa.

¹⁴ Ophiyera ollello ellapo ya Hebroni tti yoohallaniiwa ya edduullu dda Kalebe, mwaana a Yefune a o Kenizi vawi aawiiwellella Apwiya Mulluku a Aisraele ni murimaaye muttheene.

¹⁵ Ddihineereye nndda Hebroni aromolliwa wi Kiriyati Araba. Araba aari muthu oovuwa wunchichi variyari va Aanaki. Vatulli viwa ellapo ettheeneeyo yahiithuuwa o ekhoto.