Yoswa 11 - Mawu a Mulluku

Yoswa anamugonjiha Yabini ni akhwaaye

¹ Yabini mwene a o Hazori iiwalleeye ddenndda aarumiha mawu wa Yobabu mwene a o Madoni, mwene a o Shimironi, mwene a o Akishafu

² ni wa mamwene ookhalla omiyaangoni ompoto, o ntapo na omwera wa Kineroti, o ntapo ni o mitunda dda o Dori woovollowa nndduwa.

³ Aarumihattho mawu wa Akanani a wookhuma nndduwa ni woovollowa nndduwa, wa Aamori, wa Ahiti, wa Aperezi ni wa Ayebusi o ellapo yamwaango, ni wa Ahivi ayo yakhalla museresere mwa mwaango wa Heremoni mu ellapo ya Mizipa.

⁴ Mamwenaayo yaawa ni akhotwiiwa attheene nave waata wiwa wa akhotwaayo waari wonanko mihava dda mukhwipi mwa enyanja. Yaakhalla ni akavalo ni magareta manchichi.

⁵ Mamwene mattheenaalla yaatthukumana vamodda, etthipella misasa omuhinjeni wa Meromu wi ewane ni Aisraele.

⁶ Apwiya yaamulleella Yoswa wi, “Ohinawoova yaayo. Osiisello enthawi wonanko yeella, attheene eneerewiiphiwa vamiitthoni va Aisraele. Akavalwiiwa mwaaphoriihe nave muwoose magaretiiwa.”

⁷ Sika Yoswa ni athwaaye yaawanana moorurumusa o muhinje wa Meromu.

⁸ Apwiya yahaavelleella m'mattani mwa Aisraele wawi yahaahella ekhoto ewiikariha yaphiya ompoto wa Sidoni muullupalli ni o Misirefoti Maimu navettho wookhuma nndduwa yaphiya o ntapo na Mizipa. Yaawiipha attheenaayo, khaavo naari muthu mmodda avulluwalle.

⁹ Yoswa aheera nnddo Apwiya yalamulalliiwa. Yahaaphoriiha akavalo attheene, ewoosa magareta.

¹⁰ Vano Yoswa aahokollweella mutulli agonjiha muzinda wa Hazori amwiipha mweniiwa ni nsupada. Enthawi yeeyo muzinda wa Hazori waari wamasiva, muullupalli wa moomwene mattheene.

¹¹ Yaamwiipha arive muthu mukumi nave khaavo naari mmodda ahiyiwe ari oovuma. Vano muzinda wa Hazori yaawuhella munllo.

¹² Yoswa ahaaphara mamwene mattheene ni mizinda ddiwa ddene awiipha ni nsupada nawiisha, awoononga attheenaayo moollikana ni mmo Mose oorumeyella a Apwiya alamulelleeye.

¹³ Koma Aisraelaayo kheyaahenlle munllo mizinda ddoomakiwa va asimiyaango opatula muzinda wa Hazori oyo Yoswa awuhenlleeye munllo.

¹⁴ Vano Aisraele yahaakha ddeko ddittheddene ddaphaama dda m'mizindani ddennddo monga eng'ombe eddisunga wi ddikhalle ddayiwa. Koma yaawiipha ni nsupada niwa nawiisha adaniiwa oohimuhiya naari muthu mmodda oovuma.

¹⁵ Moollikana ni mmo Apwiya yamulamulalliiwa oorumeyelliiwa Mose, tti mwemmo Mose amulamulelleeye Yoswa nave aheera ddittheddene Apwiya yamulamulalliiwa Mose oohihiyavo naari mawu mamodda.

Ellapo eyo Yoswa aakhilleeye

¹⁶ Yoswa aagonjiha ellapo ettheene, ellapo yamiyaango, ellapo ettheene yoomwera, ellapo ettheene ya Gosheni, ntapo nittheene, ellapo ya Araba, ellapo ettheene yamiyaango ni matapo a Israele,

¹⁷ ovenyera omwaangoni wa Halaki vakhuviru ni Seiri ophiya o Baala Gadi mu ntapo na Lebanoni museresere mwa mwaango wa Heremoni. Ahaaphara mamweniiwa mattheene awiipha.

¹⁸ Yoswa aawana ni mamwene yaalla mattheene wa enthawi yinchichi.

¹⁹ Khawiivo naari muzinda mmodda oyo wapanganne dda murendelle ni Aisraele, opatula Ahivi ayo yakhalla o Gibiyoni. Koma amodda attheene aari aagonjihalle ni ekhoto.

²⁰ Apwiya yaawummiha murima alliwaayo wi ellipane ni Aisraele wi vaweerani ddiiddo yoonongeye attheene. Nave wi yiiphiwe mooheerelliwa echifundo koma ewoononge moollikana ni mmo Apwiya yamulamulalliiwa Mose.

²¹ Vano enthawi yeeyo Yoswa aawoononga Aanaki. Alliwaayo yakhalla mu ellapo dda miyaango dda Hebroni, Debiri, Anabu ni ellapo ddittheddene dda miyaango dda Ayuda ni dda Aisraele.

²² Khaavo naari mmodda Aanaki oyo ahanlle mu ellapo ya Aisraele. Koma ooyeva yahallille o Gaza, o Gati ni o Ashidodi.

²³ Sika Yoswa ahaakha ellapo ettheene moollikana ni mawu mattheene Apwiya yamulamulalliiwa Mose. Vano Yoswa aakawa ellapo wa Aisraele wi ekhalle yoohallaniiwa, nirive nlloko echigawo yayiwa. Sika ellapo yahiithuuwa owana ekhoto.