Yoswa 10 - Mawu a Mulluku

Aamoni aagonjihiwa

¹ Adonizedeki, mwene a o Yerusalemu iiwalleeye wi Yoswa ohaagonjiha athu a m'muzindani wa Ai nave wi ohoononga muzindooyo ni mweneene wonanko mmo eerelleeye ni muzinda wa Yeriko ni mweniiwa navettho wi athu a o Gibiyoni aapangana dda murendelle ni Aisraele enakhalla ni alliwa,

² ahoova wunchichi vawi Gibiyoni waari muzinda muullupalli wonanko orive muzinda wookhalla ni mwene nave waari muullupalli okhwaranya muzinda wa Ai navettho akhotwiiwa yaari amasiva.

³ Sika Adonizedeki aarumiha othenga wa Hohamu mwene a o Hebroni, wa Piramu mwene a o Yaramuti, wa Yafiya mwene a o Lakishi ni wa Debiri mwene a o Egiloni wi,

⁴ “Waawoni munikavihere owana ni Gibiyoni kaambiiwa aapangana dda murendelle ni Yoswa navettho ni Aisraele attheene.”

⁵ Mamwene matthanu a Aamori monga mwene a o Yerusalemu, mwene a o Hebroni, mwene a o Yaramuti, mwene a o Lakishi navettho mwene a o Egiloni, yaatthukumana eya ni akhotwiiwa yaapheella muzinda wa Gibiyoni ewanana.

⁶ Athu a o Gibiyoni yaarumiha mawu wa Yoswa omisasani o Giligala wi, “Apwiyaahu, muhinanitathilla hiyaano oorumeyellaanyu. Waawoni mwawaakuva wi munivulluse, munikavihere! Mamwene mattheene a Aamori ookhalla mu ellapo dda miyaango aanitthukumanella.”

⁷ Vano Yoswa ni akhotwaaye attheene ni athwaaye amasiva attheene yaatimulla ovenyera o Giligala.

⁸ Nave Apwiya yaamulleella Yoswa wi, “Ohiwoove vawi kohaavelleella m'mattani mwawo khaavo naari mmodda oyo anaawore ollipana ni weyaano.”

⁹ Yoswa ni akhotwaaye yaheeta mahiiyu mattheene ovenyera o Giligala nave yawanana mowaarurumusa.

¹⁰ Apwiya yaaweeriha adanaayo wi yoove yawoonilliiwa akhoto a Aisraelaalle. Aisraele yahaagonjiha Aamori o Gibiyoni. Yaawiikariha okittha mwaango wa o Betehoroni ni owiipha ophiya o Azeka ni o Makeda.

¹¹ Yaathawiiwa Aisraelaayo vookitthani mwaango wa Betehoroni ophiya o Azeka, Apwiya yaamoriha malluku a marallalla va alliwaayo ovenyera oddullu nave yaawiipha. Awiiphiwa ni marallalla yaari anchichi waakhwaranya awiiphiwa ni Aisraele.

¹² Vano Yoswa aallota ni Apwiya va nllapo nno yaavelleelliiwa Aamori m'mattani mwiwa. Vano aallota vamiitthoni va Aisraele wi, “We nndduwa, imella vaddullu va Gibiyoni, we mweeri, imella vaddullu va ntapo na Ayaloni.”

¹³ Sika nndduwa nahiimella va nipuro nimodda nave mweeri khawaaweetillettho ophiyera Aisraele yahaahokolloselle yoonanara adaniiwa. Ddenndda ddoolembiwa mu nibukhu na Yashara wi, “Nndduwa nahiimella nipuro nimodda muddullu, oohaakuva ovollowa wa nllapo namututha.

¹⁴ Ovenyera khalle, khaniivo nllapo wonanko nenna nno Apwiya yamwiiwellelliiwa muthu vawi yahaawanella ekhoto Aisraele.

¹⁵ Ddimanlle nndda Yoswa ni mullokwaaye wakhoto yaahokollweella omisasani o Giligala.”

Yoswa anaaphara mamwene matthanu Aamori

¹⁶ Mamwene matthanwaalle yaathawa yiipittha o nikhungu na o Makeda.

¹⁷ Vano aalleelliwa Yoswa wi, “Mamwenaalle yiipitthalle nikhungu na o Makeda.”

¹⁸ Vano Yoswa aalamula wi, “Phikirisellani malluku muullupalli o mullako wa nikhungunno nave mwaahiyevo alonda.

¹⁹ Koma nyu muhiimelle, wiikarihekeni adanaayo nave muwiipheke oohalla mutulli. Muhaakhullelle wi yaphiye omizindani ddiwa. Apwiya Mullukwaanyu ahaavelleella m'mattani mwanyu”

²⁰ Vano Yoswa ni Aisraele yaawiipha athwaayo ophiyera yaatthollowa. Yahiiphiwe tti yaayove yiipitthalle m'mizindani dda mpanda.

²¹ Vano athu attheene yaahokollowawo phaama yaphiya wa Yoswa omisasani o Makeda. Khaavo naari mmodda mu ellapweeyo aallikallettho Aisraele.

²² Vano Yoswa aallota wi, “Hullani mullako wa nikhungunno nave mamwene matthanwaayo muweena wuno.”

²³ Sika yaheera ddennddo, yaakhumiha mamwene matthanwaalle munikhunguni, mwene a o Yerusalemu, a o Hebroni, a o Yaramuti, a o Lakishi ni a o Egiloni.

²⁴ Ewiillena mamwene yaalla wa Yoswa, olliye aawiithana Aisraele attheene. Vano ahaalamula oohoollella ekhoto ayo athaananeeyena wi, “Waawoni wuno mwaanyingalle vanikohini mamwene yaalla.” Yahaatamella yaanyingalla makohiiwa.

²⁵ Vano Yoswa ahaalleella oohoollella ekhoto wi, “Muhoove apaalle otathilla murima. Khallani amasiva ni oollipa murima vawi Apwiya eneeroweerella ddenndda adanaanyu attheene.”

²⁶ Vano Yoswa aawiipha mamwene mattheenaayo aatthomeya vamiteekhoni mitthanu nave yaakhalla vamiteekhonimvo ophiyera misikuwa.

²⁷ Nndduwa nivollowaka, Yoswa aalamula wi ekitthihiwe vamiteekhonimvo nave wi yaavokhella munikhunguni yiipitthalliiwa mulle. Vano va mullako wa nikhungunno yawallevo ni malluku muullupalli nave aakhallavo ophiyera ollello.

Yoswa anavirellella waakha ellapo ya Aamori

²⁸ Nllapo nenno Yoswa aawana ni athu a muzinda wa Makeda aaphara ni mweniiwa. Aawiipha attheene a m'muzindanimmo nave khaavo naari mmodda avulluwalle. Yaamweerella mwene a o Makeda nnddo yamweerelliiwa mwene a o Yeriko.

²⁹ Vano Yoswa ni Aisraele attheene yaavenya o Makeda yaphiya o muzinda wa Libina yawuhella ekhoto muzindooyo.

³⁰ Vano Apwiya yaawuvelleella muzindooyo m'matani mwa Aisraele. Yaamwiipha arive muthu m'muzindanimmo ni masupada, khaavo naari muthu mmodda avulluwalle. Yaamweerella mwene a muzindooyo nnddo yamweerelliiwa mwene a o Yeriko.

³¹ Ddimanlle nndda Yoswa ni akhotwaaye yaavenyawo o Libina yaphiya o Lakishi. Yahaapheella muzindooyo nave yaawuhella ekhoto.

³² Apwiya yaawuvelleella m'mattani mwa Aisraele muzinda wa Lakishi va nllapo naneepiilli na ekhotweeyo. Yaawiipha athu a m'muzindanimmo ni nsupada nawiisha oohimuhiya ni okumi naari muthu mmodda wonanko mmo yeerelliiwa ni muzinda wa Libina.

³³ Mwene Horamu a o Gezere aawa akavihera muzinda wa Lakishi koma Yoswa aamugonjiha ni athwaayeene khaavo naari muthu mmodda avulluwalle.

³⁴ Ddimanlle nndda Yoswa ni akhotwaaye yaavenyawo o Lakishi yaphiya o Egiloni. Yahaapheella muzinda wa Egilonooyo nave yaawuhella ekhoto.

³⁵ Yaawaakha nllapo nenno ewiipha attheene a m'muzindanimmo ni nsupada nawiisha wonanko mmo yeerelliiwa ni muzinda wa Lakisi.

³⁶ Vano Yoswa ni akhotwaaye yaavenyawo o Egiloni yaphiya o muzinda wa Hebroni. Yaahella ekhoto,

³⁷ ophiyera yaawugonjiha. Yaamwiipha ni nsupada mwene ni athwaaye attheene a m'muzindanimmo ni athu attheene a m'matawoniiwa mattheene oohimuhiyawo naari mmoddeene wonanko mmo yeerelliiwa ni muzinda wa Egiloni. Khaavo naari muthu mmodda oyo avulluwalle.

³⁸ Vaavo Yoswa ni akhotwaaye yaarukunuwella muzinda wa Debiri nave yawuhella ekhoto.

³⁹ Yaamwiipha ni nsupada mwene ni athwaaye attheene a m'muzindanimmo ni athu attheene a m'matawoniiwa mattheene khaavo naari muthu mmodda avulluwalle. Yoswa aaweerella muzinda wa Hebroni wonanko mmo eerelleeye mizinda dda Debiri ni Libina ni mamweniiwa.

⁴⁰ Sika Yoswa aagonjiha ellapo ettheene yamiyaango, ellapo yoomwera, ellapo yamutapo ni mamweniiwa mattheene khaavo naari muthu mmodda avulluwalle koma ohoononga ddittheddene ddoovuma moollikana ni mmo yalamulelle Apwiya Mulluku a Aisraele.

⁴¹ Yoswa ahaagonjiha adanaaye attheene waambeella o Kadeshi Baranea ophiya o Gaza ni ellapo ettheene ya Gosheni ophiya o Gibiyoni.

⁴² Yoswa ahaagonjiha mamwene mattheenaalla ni ellapo ddiwa enthawi yeella ekaamba yawi Apwiya Mulluku a Aisraele sika aawanella ekhotweeyo.

⁴³ Ddimanlle ddenndda Yoswa ni akhotwaaye yaahokollweella omisasani ddiwa o Giligala.