Yoswa 1 - Mawu a Mulluku

Mulluku anamulamula Yoswa wi aagonjihe Akanani

¹ Mose, oorumeyella a Apwiya, akhwilleeye, Apwiya yaallota ni ookavihera a Mosooyo, Yoswa, mwaana a Nuni wi,

² “Mose oorumeyellaaka ookhwa. Vano, khozeka weyaano ni Aisraele attheenaalla, mullapuwe muhinje wa Yordani nave muvollowe mu ellapo eyo kinaawaavaheemi Aisraele.

³ Virive veko vinaanyingalle nnyallo nanyu, kohuuvahani moollikana ni mmo kamulonjezelleemi Mose.

⁴ Ovenyera o echipululu, omwera ophiya o miyaango dda Lebanoni, ompoto ovenyerattho o muhinje muullupalli wa Yufurate wookhuma nndduwa ophiya o Enyanja Yuullupalli woovollowa nndduwa ni ellapo ettheene ya Ahiti enaakhalle ellapwaanyu.

⁵ We Yoswa khaavo anaawore wuugonjiha mu okumaawo muttheene. Miyaano kineerokhalla ni weyaano wonanko mmo kakhallelleemi ni Mose, ngiwa kuuhiya.

⁶ Khalla amasiva ni oollipa murima kaambiiwa oneerewaahoollella athu attheenaalla yaawaakhellaka ellapo eyo kallupellelleemi makhollwiiwa.

⁷ Komathi khalla amasiva ni oollipa murima wunchichi. Ochenjere wi wiiwellelleke malamulo mattheene ayo Mose oorumeyellaaka uulleelleeye. Oohirukunuwella onnattanatta apaalle wuunyotthoni wi orive weko onaayeekeewe ddiweetelleke phaama.

⁸ Weerengeke nibukhu namalamulonna nave otthaana ni mahiiyu opwatheke ddoolembiwa mwemmo wi oddisunge ddittheddene. Vano waaweeraka ddiiddo oneerokhalla phaama nave oneeropambana.

⁹ Valle kahuulamula wi okhalle amasiva. Ohooveke apaalle otathilla murima vawi mi Apwiya Mullukwaawo, kineerokhalla ni weyaano orive weko onaayeekeewewo.”

Yoswa anaalamula athu

¹⁰ Vano Yoswa ahaalamula oohoollella a Aisraele wi,

¹¹ “Khaweni omisasani ddittheddene, mwaalleelle athu wi, ‘Mwiikhozere phooso kaambiiwa vavira mallapo mararu, muneerollapuwa muhinje wa Yordani ni waakhella ellapo eyo Apwiya Mullukwaanyu enuuvaheewani.’ ”

¹² Nave Yoswa aalleella nlloko na Rubeni, na Gadi ni hafu a nlloko na Manase wi,

¹³ “Upuwellani nndde Mose, oorumeyella a Apwiya, uulleelleeyeni wi, ‘Apwiya Mullukwaanyu, eneerewuuvahani nipuro nawiithuuwellamo ellapo eyo enaakhalle yaanyuyaanyu.’

¹⁴ Vano awarinyu, aniinyu ni eng'ombe ddanyu ddihalle mu ellapo ya wookhuma nndduwa, ekhopella ella ya muhinje wa Yordani, Mose uuvahilleeyeni koma akhotove sika enaallapuwe ekusalle ezida oya muhoollo waakhwaranya Aisraele akhwiinyu wi yaakavihere.

¹⁵ Nave alliwa yaakhella ellapo eyo Apwiya Mullukwiiwa yaavahilliiwa nave yiithuuwamo, nyuwaano muneerohokollowa wi mukeraattheye mu ellapo eyo uuvahilleni Mose, oorumeyella a Apwiya wuno wookhuma nndduwa okhopella wa Yordani.”

¹⁶ Nave yaamwaakhulla Yoswa wi, “Ddittheddene nnddo munilleelleenyu nineereweera nave orive weko munaanirumeenyu nineeroyaawo.

¹⁷ Nineerowiiwellellani wonanko mmo namwiiwellelleehu Mose. Apwiya Mullukwaanyu, ekhalle ni nyuwaano wonanko mmo yakhallelliiwa ni Mose!

¹⁸ Arive muthu anaawukile mawaanyu apaalle ohiwiiwellella malamulwaanyu, aneerewiiphiwa. Nyuwaano khallani ni amasiva ni oollipa murima wunchichi.”