Yona 4 - Mawu a Mulluku

Osha murima wa Yona ni echifundo ya Mulluku

¹ Ekaambeene yeella Yona aananariwa wunchichi navettho aasha murima.

² Sika aavekella wa Apwiya wi, “Nyu Apwiya, khe ddenndda kaakeeminndde kiri owaaniwulle? Miyaano kaheeseesa othawella o Tarishishi ekaambeene yeella. Kaadduwella wi nyuwaano tti Mulluku ooreera murima, awaata ni echifundo ni echisomo. Mookhalla ni echikondi yoohisintheya navettho munnakhululukella machimo enthawi ddittheddene.

³ Sika vano Nyuwaano Apwiya, koophara mwetwaanyu, kimalliheni. Tti waphaama wi kikhwe okhwaranya okhalla ni okumi.”

⁴ Apwiya yaamwaakhulla wi, “Ethiyo weyaano ori ni tini yooshella murima?”

⁵ Vano Yona aakhumamo m'muzindammo aya akeraatthi vatthi ohito wa wookhuma nndduwa wa muzindooyo. Aatthipella musasa mmo akeraatthilleeye m'muuthuuchini otiyerella wi oone nnddo ddineereye mu Nineve.

⁶ Vano Apwiya Mulluku yaamelliha mukhura wi ovelleelle muuthuuchi wa Yona ni wi murima omukhurumuwe. Murima waamweella Yona ekaamba ya mukhurooyo.

⁷ Koma ohinase wene, Mulluku aarumiha miingu wi ddache mukhurooyo nave waanyaalla.

⁸ Vookhumani nndduwa, Apwiya yaamurumihella Yona ephevo yooviha wunchichi. Nndduwa naamoosa vamuru vaye mookusa murima. Sika ahaambattho oveka okhwa wi, “Tti waphaama wi kikhwe okhwaranya okhalla ni okumi.”

⁹ Koma Mulluku aamwaakhulla Yona wi, “Ethiyo weyaano ori ni tini yooshella murima?” Navettho Yona aawaakhulla Apwiya wi, “Ee kinanariwelle ddawoona. Vawi onanariwa wene ttiwookhwana.”

¹⁰ Koma Apwiya yaamwaakhulla wi, “We onamoriwella ethakaraka mukhura wonanko wawumellihalle tti weyaano. Navettho khe weyaano wawaallille apaalle wunnuwihalle mukhurooyo. Wamenlle nllapo nimodda navettho okhwa ohinase wa nllapo noothwarellellanno.

¹¹ Nave ethiyo miyaano, nginaphwanella owumoriwella ethakaraka muzinda muullupalli olla wa Nineve? Mu Nineve mookhalla athu ookhwaranya 120,000 ayo enakhalla wonanko anamwani oohiwora ohiyaniha variyari va yaphaama ni yoonanara, mookhallattho eziweto ddinchichi.”