Yona 3 - Mawu a Mulluku

Yona anawiiwellella Apwiya

¹ Mawu a Apwiya yaawa wa Yona waneepiilli wi,

² “Khawe o Nineve, o muzinda muullupalloolle. Waahumullulle ni othenga olla kinawinnyeemi.”

³ Sika Yona aatimulla olendo wooya o Nineve wonanko mmo Apwiya yallotelliiwa. Muzindooyo waari muullupalli wunchichi, woopaalleya mallapo mararu wi oviremo.

⁴ Vano Yona aavollowa m'muzindammo. Eetille olendo wa nllapo nimodda, ahaamba ollalleya wi, “Voomallani mallapo 40, Nineve aneerotthollosiwa!”

⁵ Athu o Nineve yaakhulupilila othenga wa Mulluku. Sika yaallalleya wi arive muthu, waambeella muullupalli ophiyera mung'onong'ono, athute ddoocha nave aware echiguduli wooniha olapa.

⁶ Mwene o Nineve vawiiwani ddennddo, aakittha va vampandoni vaye woomwene nave aarullattho mukanjwaaye. Aawara echiguduli nave ahiiyeviha vookeraatthi vaddallani.

⁷ Vano mwenooyo aallalleya o Nineve wi, “Iwani lamulo noovenyera wa mwene ni enduna ddaye: ‘Arive muthu ahiche erive ello navettho enama ddittheddene dduullupalli ni dding'onong'ono ddene ddihiche erive ello apaalle owirya maaddi.

⁸ Athu attheene eware mathumba. Enamattho ddikhuneelliwe ni mathumba. Arive muthu avekelle ni murima muttheene wa Mulluku. Ddawoona, arive muthu ahiye weera makhallellwaaye oonanara ni akhoto.

⁹ Anadduwella ttaani apaalle Mulluku ttuurukunusa maganizwaaye, onikhululukella wi nitthollosiwe.’ ”

¹⁰ Mulluku ahoona mmo athwaayo yeerelliiwa ni mmo yahiyeriiwa makhallellwiiwa oonanara. Sika aarukunusa maganizwaaye, ahaakhululukella athwaayo, khaatthollonse wonanko mmo allotelleeye.