Yona 2 - Mawu a Mulluku

Ovekella wa Yona

¹ Vano Yona ari m'mirimani mwa ehomba, ahaamba waallapella Apwiya Mullukwaaye.

² Aallota wi, “Nyu Apwiya, kaariimi mu mahame kaawiithanani, nave mwaakaakhulla. Mi vookhallani mu ellapo ya ookhwa kahinllella wa nyu wi mukikavihere, nave mwahaakhella nivekello naka.

³ Mwaakivokhella mu enyanja yoowallamella, muwariwari mwa enyanja, navettho mapimbili a mu enyanja yaakuupa.

⁴ Sika kaallota ni murima wi, ‘Mookitathillella woorekama ni nyuwaano. Ethiyo kinoonettho mwawiidde enyumbaanyu yaweella?

⁵ Maaddi yaakikomella munikohini enyanja yoowallamella yaakuupa. Manasi a maduvi yakivillika m'muruni.

⁶ Kaakitthella muhitohito, m'mamellello a mwaango, o ellapo ya machiwi oowalliwa ni maloko oohihulleya wa enthawi yoohimalla.

⁷ Vawoonani murimaaka okitthellaka o mahame, kaawupuwellani nyu Apwiya, ollapella waka wahiiweya mu Enyumbaanyu Yaweella.

⁸ Athu oollapella milluku ddawoottha kheyiivo enaphuriiwa.

⁹ Koma mi kineerovelleella moororomelleya mikutho ddaka wa Apwiya ni mawu oothokoza.’ ”

¹⁰ Vano Apwiya yaalamula ehombeelle wi emurapheyelle Yona o mutundani.