Yohane 9 - Mawu a Mulluku

Yesu anamuchiriha muthu oohoona

¹ Nave Yesu eeteeye m'musewuni aamoona muthu oohoona eyariwellwaaye.

² Oohudderaaye yaamukoha wi, “Ahuddihi, achimwalle ttaani wi muthu olla ayariwe oohoona, olliyoolla apaalle attiitthinnya ni amennya?”

³ Yesu ahaakhulla wi, “Khe wi muthu olla aachimwa apaalle attiitthinnya ni amennya koma ayariwe oohoona wi mitteko dda Mulluku ddooneye mwa olliye.

⁴ Ninaphwanella weera mitteko dda yooyo aakirumalle miyaano ori otthaana. Mahiiyu onimawa nave vano khaavo muthu anaawore ophara mutteko.

⁵ Miyaano vookhallani mu ellapo yavatthi, kiri owala wa ellapo yavatthi.”

⁶ Aallotilleeye nndda aattaphera vatthi eettheya ethaya ni maraalle nave amara matokwaayo vaddullu va miittho a muthooyo,

⁷ nave aamulleella wi, “Khawe wasuusulle owiitthoninko mu nthiya na Shilowamu.” (Ottaphullella wi, Oorumiwa.) Sika muthoolle aayaawo asuusulla owiitthoni waye nave aawaawo oonaka.

⁸ Vano akhwaaye ni athu yamonne khalle wi aari oovekaveka yaallota wi, “Ethiyo khe yoolle aakeraatthi vatthi avekavekaka?”

⁹ Amodda yaallota wi, “Tti yooyo.” Nave amodda yaallota wi, “Khe olliye koma animoonophwanaphwanana.” Sika muthoolle yeekha aallota wi, “Tti meene.”

¹⁰ Yaamukoha wi, “Vano ddiworeyille mwawiidde wi wooneke?”

¹¹ Ahaakhulla wi, “Muthu ooromolliwa Yesu aheettheya ethaya amara vaddullu va miitthwaaka nave akilleella wi kiye o Shilowamu kasuusule owiitthoni waka. Sika kaayaawo kasuusulla nave kahoona.”

¹² Yaamukoha wi, “Ari wuuwi yooyo?” Ahaakhulla wi, “Nginadduwella.”

Afarisi enamukohesesa muthu achirihiwoolle

¹³ Muthu olle khalle aari oohoona aakuselliwa wa Afarisi.*

¹⁴ Nllapo nno Yesu eettheyilleeye ethaya ni omuchiriha oohoonoolle naari nllapo na Sabata.

¹⁵ Vano Afarisi yaamukohattho muthoolle wi, “We woonillettho mwawiidde?” Nave ahaakhulla wi, “Aheettheya ethaya amara vaddullu va miitthwaaka, kaasuusulla owiitthoni waka vano kinnoona.”

¹⁶ Amodda a Afarisi yaallota wi, “Muthu amuchirihalloolla khe oovenyera wa Mulluku kaambiiwa khanathwara malamulo a nllapo na Sabata.” Koma amodda yaallota wi, “Muthu oochimwa ttuuwora mwawiidde weera ddoottikhiniha ddawi ddiidda?” Nave waari ovaanyihana mwa yaayo.

¹⁷ Sika Afarisi yaamukohattho wi, “Onallota wi ahuuchiriha ohoona wawo, vano weyaano onallota tini dda olliyoolla?” Muthoolle ahaakhulla wi, “Tti namallotella.”

¹⁸ Attekweene a Ayuda* kheyaakhulupililalle wi aari oohoona nave wi vano ohoona ophiyera yaawiithana makhollwaaye.

¹⁹ Yaakoha wi, “Olla tti mwaninyu munalloteenyu wi aayariwe oohoona? Vano yeereyille tti tini wi ooneke?”

²⁰ Makhollwaaye yahaakhulla wi, “Ninnadduwella wi olla tti mwanihu ni wi aayariwe oohoona.

²¹ Nave khaninadduwella wi anawora woona mwawiidde nave khaninamudduwella oyo amuchirihalle. Mukoheni, ohunnuwa, aneerowaakhullani yeekhaaye.”

²² Makhollwaayaayo yaallotille ddenndda kaambiiwa yawoova attekweene a Ayuda vawi Ayudaayo yahiiwanana khalle wi arive muthu oyo anaallote wi annakhulupilila wi Yesu tti Mesiya* ahaakhullelliweke ovollowa mu enyumba yamavekello

²³ Ella sika ekaambiiwa makhollwaaye yallotille wi, “Olliye ohunnuwa, mukoheni!”

²⁴ Vano yaamwiithana wiilli muthoolle khalle aari oohoona ellota wi, “Llupella vamiitthoni va Mulluku, ninnadduwella wi muthu uuchirihalloolla tti oochimwa.”

²⁵ Muthooyo ahaakhulla wi, “Nginadduwella aari muthu oochimwa apaalle iyaayi. Koma ello emodda kinadduwelleemi tti yawi, kaari oohoona koma vano kinnoona.”

²⁶ Yaamukoha wi, “Aaweerenlle weyaano tini? Uuchirihalle mwawiidde?”

²⁷ Vano ahaakhulla wi, “Kohuulleellani khalle koma khamwiiwalle. Munapaallella tini wiiwattho? Apaalle nanyeenettho munapaalla okhalla oohudderaaye?”

²⁸ Yaamunyaambusa ellota wi, “We tti oohudderaaye koma hiyaano tti oohuddera a Mose.

²⁹ Ninnadduwella wi Mulluku aallota ni Mose koma dda muthu yoolla khannadduwella anavenyereeye.”

³⁰ Muthoolle ahaakhulla wi, “Ddinnanittikhinihathi ddenndda, nyuwaano khamunadduwella nko anavenyereeyewo komave aakichiriha.

³¹ Ninnadduwella wi Mulluku khanawiiwellella athu oochimwa. Koma muthu mmodda aamullapellaka Mulluku nave aneera opaalla waye vano Mulluku annamwiiwellella.

³² Waambeella ephatuwello ya a ellapo yavatthi khaddiniiweyeke wi muthu mmodda oomooniha muthu oohoona eyariwellwaaye.

³³ Muthu yoolla aariki oohivenyera wa Mulluku khaawore weera ello yeella.”

³⁴ Yaamwaakhulla wi, “We waari khalle oochimwa wayariweewe. Nave weyaano ttuunihuddiha hiyaano?” Vano kheyaamwaakhullenlle ovollowa mu enyumba yamavekello ovenyera nllapo nenno.

Oohoona wa m'murimani

³⁵ Yesu iiwalleeye ddeereyillennddo, aamuphwanya muthu achirihiwoolle nave aamukoha wi, “We onnakhulupilila mwa Mwaana a Muthu?”

³⁶ Muthoolle ahaakhulla wi, “Killeelleni, ttaani yooyo wi kakhullupilile mwa olliye!”

³⁷ Yesu aallota wi, “Woomoona khalle nave tti yooyo anallota ni weyaano.”

³⁸ Muthoolle aallota wi, “Apwiya, kinnakhulupilila.” Sika aamukokhorella Yesu.

³⁹ Yesu aallota wi, “Kaawa mu ellapo yavattheella wi keeruze wi ayo ehinoona yoone nave ayo enoona ekhalle oohoona.”

⁴⁰ Afarisi amodda yamwaatamenlle yaamwiiwa alloteeye ddenndda nave yaamukoha wi, “Hittho khaninoona?”

⁴¹ Yesu ahaakhulla wi, “Mwakhanlleke oohoona, khamwaakhalle ni mullatu ekaamba ya machimo. Koma vano kaambiiwa munallota wi munnoona, mullatwaanyu wookhallavove.”