Yohane 8 - Mawu a Mulluku

Mutthiyana aaphariwe araruwaka

¹ [Nave Yesu aaya o mwaango wa Olivi.

² Osaka wene ohinase aahokollweella o enyumba ya Mulluku. Athu attheene yaatthukumana moomwaapheella nave akeraatthi aamba waahuddiha.

³ Ahuddihi a malamulo* ni Afarisi* yaawaana mutthiyana oophariwa araruwaka nave yaamwiimesa variyari viwa.

⁴ Yaamulleella Yesu wi, “Ahuddihi, mutthiyanoolla aaphariwa araruwaka.

⁵ Mu malamulwaahu Mose aalamulella wi mutthiyana awi ddiidda iiphiwe voomuvokhani malluku. Vano nyuwaano munihina tini?”

⁶ Yaallotille ddenndda wi emweese Yesu wi emphwanyelle mullatu woomuvaanyihera. Koma Yesu aawaramella vatthi analemba vatthi ni eyaallaaye.

⁷ Vano yavirellelliiwa omukoha ahiinuwa allota wi, “Aarivo mmodda a nyuwaano ahinachimweke waambeella khalle aambe omuvokha nlluku.”

⁸ Eerille nndda aawaramattho analemba vatthi.

⁹ Nave yiiwalliiwa nndda yaavenyavo mmoddammodda waambeella ni attekweene. Yesu ahaanllevo yeekhaaye nave mutthiyanoolle iimenlle vaavo.

¹⁰ Ahiinuwa allota wa olliyooyo wi, “Mutthiyana we, eri wuuwi yaalle? Khaavo mmodda ahanlle wi awiipe mullatu?”

¹¹ Ahaakhulla wi, “Khaavo.” Yesu aallota wi, “Nameenettho nginawiipa mullatu. Rowa koma ohichimwe wiilli.”]

Yesu, owala wa ellapo yavatthi

¹² Yesu aallotattho wi, “Mi tti owala wa ellapo yavatthi. Oyo anakithwara miyaano aneerokhalla ni owala woovaha okumi nave kheetattho mwiipiphini.”

¹³ Afarisi yaallota wi, “Oniivelleellella omboni weekhaawo, sika ombonaawo tti woohiroromelleya.”

¹⁴ Yesu ahaakhulla wi, “Naari kiivelleellellaka omboni meekhaaka, ombonaaka tti woororomelleya kaambiiwa kinnadduwella nko kinavenyereemi ni nko kinayeemi.

¹⁵ Nyuwaano muneeruza wonanko mmo athu eneeruzelliiwa koma miyaano nginamweeruza arive muthu.

¹⁶ Koma kaarimi keeruzaka, echiweruzwaaka tti yawoona kaambiiwa khe miyaano meekhaaka kineeruza koma miyaano ni Attiitthaaka ayo yaakirumalle.

¹⁷ Nave ddoolembiwa m'malamulwaanyu wi omboni wa athu eelli tti woororomelleya.

¹⁸ Miyaano kinniivelleellella omboni meekhaaka nave Attiitthaaka ayo yaakirumalle miyaano tti ombonittho.”

¹⁹ Vano yaamukoha wi, “Attiitthaanyu eri wuuwi?” Yesu ahaakhulla wi, “Khamunakidduwellesesa miyaano naari Attiitthaaka. Mwaakidduwelleseseke miyaano, mwawerewaadduwellattho Attiitthaaka.”

²⁰ Yesu aallotille nndda ahuddiheeye mu enyumba ya Mulluku vakhuviru ni moosungellamo ddoovelleella. Nave khaavo muthu amphanre kaambiiwa enthawaaye yaari ehinaphiye.

Khamuwora oyaawo nko kinayeemi

²¹ Yesu aallotattho wi, “Kinimavenyavo miyaano nave muneerokaashaasha koma muneerokhwa ekaamba ya machimwaanyu nave khamuwora oyaawo nko kinayeemi.”

²² Vano attekweene a Ayuda* yaallota wi, “Anallota wi khaniwora oyaawo nko anayeeye. Apaalle anaaka addiiphe yeekhaaye?”

²³ Yesu ahaakhulla wi, “Nyu munavenyera va ellapo yavatthimva nave miyaano kinavenyera oddullu. Nyuwaano tti a ellapo yavatthimva koma miyaano khe a ellapo yavatthimva.

²⁴ Sika kahuulleellani wi muneerokhwa ekaamba ya machimwaanyu vawi mwaahikhulupilila wi miyaano tti meene, muneerokhwa ekaamba ya machimwaanyu.”

²⁵ Yaamukoha wi, “We ttaani?” Yesu ahaakhulla wi, “Oyo kuulleelleemini ovenyera vawaamba.

²⁶ Kookhalla ni ddeko ddinchichi ddawi killote dda nyuwaano dda wuuvaanyihani. Koma oyo aakirumalle miyaano tti awoona nave kinalleella ellapo yavatthi ddennddove kiiwalleemi wa olliye.”

²⁷ Kheyaawiiwesesa wi Yesu allota dda Attiitthinnya.

²⁸ Sika aallota wi, “Mwakitthomeya vamutandani mi Mwaana a Muthu, muneerodduwella wi miyaano tti meene. Vano muneerodduwellattho wi ngineera ddeko ni olamulello wa meekhaaka koma kinallota nnddo Attiitthaaka yaakihuddihalliiwa wi killote.

²⁹ Nave oyo aakirumalle miyaano ari ni miyaano, khaakihiyalle meekhaaka kaambiiwa kinneera ddennddove ddinamuhakallalliha olliye.”

³⁰ Attheene yamwiiwalle Yesu allotaka ddeko ddenndda, yaakhulupilila mwa olliye.

Yawoona eneerewuuttaphullani

³¹ Vano Yesu aallota ni Ayuda alle yaakhulupilila mwa olliye wi, “Mwaasungaka mawaaka m'murimani mwanyu ndithu nyuwaano tti oohudderaakathi

³² muneerodduwella yawoona nave yawooneeyo eneerewuuttaphullani.”

³³ Yaamwaakhulla wi, “Hi niri edduullu dda Abrahamu nave khannakhallekevo akaporo a arive muthu. Munaaka tini voollotani wi, ‘Muneerottaphulliwa?’ ”

³⁴ Yesu ahaakhulla wi, “Ddawoona, kinimuulleellani wi, oyo anachimwa tti kaporo a machimwaayo

³⁵ Kaporo khanakhalla mmodda a athu a mpa mmo anaphareeyemo mutteko koma mwaana sika anakhalla mmodda a athu a enyumba yeeyo enthawi yoohimalla.

³⁶ Sika miyaano mwaana a Mulluku kuuttaphullani, muneerottaphulliwathi.

³⁷ Koodduwella wi nyuwaano muri edduullu ya Abrahamu. Naari mupaallaka okiipha miyaano kaambiiwa khamunapaalla osunga mawaaka m'murimani mwanyu.

³⁸ Kinallota dda nnddo koonilleemi wa Attiitthaaka nave nyuwaano muneera nnddo mwiiwalleenyu wa attiitthaanyu.”

³⁹ Yaamwaakhulla wi, “Attiitthiihu tti Abrahamu.” Yesu ahaakhulla wi, “Mwaariki anamwani a Abrahamu mwaawerekeweera wonanko mmo Abrahamu eerelleeye.

⁴⁰ Koma munapaalla okiipha miyaano, kuulleelleemini yawoona eyo kiiwalleemi wa Mulluku. Koma Abrahamu khaaweerille wonanko nyuwaano!

⁴¹ Nyuwaano muneera wonanko attiitthaanyu.” Yahaakhulla wi, “Hi khanaayariwe muuraruwani, nookhalla ni Attiitthiihu mmodda, Mulluku.”

⁴² Yesu aallota wi, “Mulluku akhanlleke Attiitthaanyu, mwaawerokikonda miyaano kaambiiwa kaavenyenre wa Mulluku vano kiri wuno. Miyaano ngaawiille mwa olamulello wa meekhaaka koma Mulluku sika aakirumalle.

⁴³ Khamuniiwesesa ddoollota ddaka kaambiiwa tini? Kaambiiwa khamunapaalla wiiwa mawaaka.

⁴⁴ Nyuwaano tti anamwani a attiitthaanyu, Satana nave munapaalla weera minkhella dda attiitthaanyu. Yooyo aari mullupa awiipha ovenyera vawaamba nave khaari mwa yawoona kaambiiwa mwa yooyo kheyaamo yawoona. Analloteeye ddawoottha, anallota ovenyera m'murimani mwaye kaambiiwa tti awoottha ni attiitthiiwa a awoottha attheene.

⁴⁵ Koma miyaano kaambiiwa kinallota ddawoona, khamunakikhulupilila.

⁴⁶ Ttaani a nyuwaano anakeera miyaano wi tti oochimwa? Kaallotaka ddawoona, khamunakikhulupilila miyaano kaambiiwa tini?”

⁴⁷ Oyo anavenyera wa Mulluku anniiwa mawu a Mulluku. Koma nyuwaano khe oovenyera wa Mulluku sika ekaambiiwa muhiniiweenyu.

Yesu ni Abrahamu

⁴⁸ Ayuda yaamukoha Yesu wi, “Ethiyo ninnoottha voollotani wi, nyuwaano tti Musamariya* nave mookhalla ni munepa woonanara?”

⁴⁹ Yesu ahaakhulla wi, “Nginna munepa woonanara. Kinaatitimiha Attiitthaaka koma nyuwaano munnakinyaambusa miyaano.

⁵⁰ Miyaano nginaashaasha ntitimiho nameekhaaka koma vookhalla mmodda ananaashaasha nave yooyo sika anaaweeruze.

⁵¹ Ddawoona, kinimuulleellani wi, oyo anasunga mawaaka m'murimani mwaye khawa akhwa.”

⁵² Ayudaalle yaallota wi, “Vano noodduwella wi mookhalla ni munepa woonanara. Abrahamu aakhwa nave anamallotella yaakhwa. Sika nyuwaano munihina, ‘Muthu anasunga mawaaka m'murimani mwaye khawa akhwa.’

⁵³ Ethiyo nyuwaano tti muullupalli ohiyana ni Abrahamu oyo akhwille? Nave anamallotella yakhwillettho? Vano nyuwaano munaddeesa aani?”

⁵⁴ Yesu ahaakhulla wi, “Kaariki kiititimiheke meekhaaka, ntitimiho naka khanaakhalle ni mutteko. Attiitthaaka ayo munalloteenyu wi tti Mullukwaanyu sika enakititimiha miyaano.

⁵⁵ Nave nyuwaano khamunadduwella koma miyaano kinnamudduwella. Nave kallota wi nginamudduwella kinaakhalle awoottha wonanko nyuwaano. Koma miyaano kinnamudduwella nave kinnasunga mawaaye m'murimani mwaka.

⁵⁶ Attiitthaanyu Abrahamu aanatiyerella wi oone nllapo na ophiyera waka vano ahoona nave aahakallalla.”

⁵⁷ Vano Ayudaalle yaallota wi, “Ethiyo vawi khamunna miyakha ddookwakhwana 50, moomoona Abrahamu?”

⁵⁸ Yesu ahaakhulla wi, “Ddawoona, kinimuulleellani wi, Abrahamu ahinayariwe, miyaano kaari kiriwo khalle.”

⁵⁹ Vano yaatota malluku wi emuvokhe Yesu. Koma Yesu ahiipittha yeekhaaye nave akhumamo mu enyumba ya Mullukweelle.