Yohane 7 - Mawu a Mulluku

Asinne a Yesu khenamukhulupilila

¹ Ddimallille nndda Yesu aheetella mu Galileya. Khaapanlle weetella mu Yudeya kaambiiwa attekweene a Ayuda* yapaalla omwiipha.

² Nave enthawi ya Ehakallallo ya Ayuda ya Misasa yahaatamella.

³ Sika asinne a Yesu yaamulleella wi, “Venyaniwoni wuno muye o Yudeya wi oohudderaanyu ni alliwattho yoone mitteko ddanyu nnddo muneereenyu.

⁴ Vawi khaavo muthu aneera ddeko mwawiipittha apaalla okhalla oovuwa. Sika mwaaweeraka ddeko ddenndda, muddoonihelle nyookha va ellapo yavatthi.”

⁵ Vawi naari asinnaayo kheyaamukhulupilila.

⁶ Yesu aallota wi, “Enthawaaka khenaphiye koma wa nyuwaano erive enthawi tti yaphaama.

⁷ Athu a ellapo yavattheella khewiitani nyuwaano koma ennakiita miyaano kaambiiwa kinnavelleella omboni wawi mitteko ddiwa tti ddoonanara.

⁸ Nyuwaano yaaniwoni o ehakallallo. Koma miyaano ngiyaawo kaambiiwa enthawaaka khenaphiye.”

⁹ Aallotilleeye nndda aahalla mu Galileya.

Yesu o Ehakallallo ya Misasa

¹⁰ Asinne a Yesu eyiille o ehakallallo wulle, Yesu nayeenettho aayaawo ohiri mwawooneya koma mwawiipittheya.

¹¹ Attekweene a Ayuda yaamwaashaasha va ehakallallweelle. Yaakoha wi, “Ari wuuwi yoolla.”

¹² Nave athu yaanong'ona mmodda ni mukhwaaye dda olliyooyo. Amodda yaallota wi, “Olla tti muthu aphaama.” Koma amodda yaallota wi, “Iyaayi, yoolla anawoottottha athu.”

¹³ Koma khaavo muthu aallotille dda olliye mwawooneya ekaamba yoowoova attekweene a Ayuda.

¹⁴ Vano yaphiyalliiwa variyari va ehakallallo, Yesu aavollowa mu enyumba ya Mulluku aamba ohuddiha.

¹⁵ Attekweene a Ayuda yaattikhina ellota wi, “Muthu yoolla, anadduwella mwawiidde ddeko ddinchichi ahinahuddere?”

¹⁶ Yesu ahaakhulla wi, “Ehuddihwaaka khe yaaka koma enavenyera wa Mulluku oyo aakirumalle.

¹⁷ Arive muthu anapaalla weera opaalla wa Mulluku aneerodduwella wi ehuddihwaaka enavenyera wa Mulluku apaalle wi kinallota ddoovenyera m'muruni mwaka.

¹⁸ Muthu oyo anallota dda m'muruni mwaye anapaalla ntitimiho na yeekha. Koma oyo anapaalla ntitimiho na oyo aamurumalle, olliye tti awoona nave kheyiivo yawoottha mwa olliyooyo.

¹⁹ Mose ahuuvahani malamulo, khe ddiiddo? Koma khaavo a nyuwaano anathwara malamulwaalla. Muneeseesella tini okiipha?”

²⁰ Mulloko waathoolle wahaakhulla wi, “Wookhalla ni munepa woonanara! Ttaani aneesesesa owiipha?”

²¹ Yesu ahaakhulla wi, “Kaheera yoottikhiniha emodda nave attheene mwaattikhina.

²² Mose ahuulamulani wi mwaaphaddeke aniinyu aallopwana. Naari khe Mose koma makhollwaanyu sika yaambille. Vano munnaaphaddattho aniinyu aallopwana nllapo na Sabata.

²³ Mwaana aamullopwana munnamuphadda va nllapo na Sabata wi malamulo a Mose ethwariwe koma munakishella murima kaambiiwa kaanamuchiriha muthu nllapo na Sabata?

²⁴ Muhineeruzaka vawoonani makhallello koma mweeruzeke mwawoona.”

Athu enaganiza wi Yesu tti Mesiya

²⁵ Athu amodda o Yerusalemu yaallota wi, “Olla khahiyo oyo attekweene eneeseesiiwa omwiipha?

²⁶ Ngamooneni annallota vawooneya koma attekweene khenallota ello wa olliyoolla. Apaalle alliwaalla ennadduwella wi yoolla tti Mesiya?*

²⁷ Nave Mesiya awa, khaavo anaadduwelle nko anaavenyereeye. Koma attheene ninnadduwella nko muthu yoolla anavenyereeye.”

²⁸ Yesu ahuddihaka mu enyumba ya Mulluku, aallota mookhuwa wi, “Munnakidduwella miyaano nave munnadduwella nko kinavenyereemi. Ngiwiille mwa olamulello wa meekhaaka. Oyo aakirumalle tti awoona nave nyuwaano khamunamudduwella.

²⁹ Koma miyaano kinnamudduwella kaambiiwa kavenyenre wa olliyoolla nave aakiruma.”

³⁰ Vano athu amodda yaapaalla omphara koma khaavo aworille weere ello va olliye kaambiiwa enthawaaye yaari ehinaphiye.

³¹ Nave anchichi yaamukhulupilila ellota wi, “Ethiyo Mesiya ninamutiyerehooyo, aneereweera ddoottikhiniha ddinchichi omukhwaranya muthu yoolla?”

Akhoto enarumiwa wi yammake Yesu

³² Afarisi* yiiwalliiwa athu enong'onaka dda Yesu m'mullokoni mulle, alliwaayo ni allupa mukutho uullupalli yahaaruma akhoto a o enyumba ya Mulluku wi yammake.

³³ Yesu aallota wi, “Kinaakhalle ni nyuwaano o enthawi yooyeva nave vano kineerohokollweella wa yooyo aakirumalle.

³⁴ Muneerokaashaasha koma khamukiphwanya navettho khamuwora oyaawo nko kinaakhallekeemiwo.”

³⁵ Attekweene a Ayuda yaakohana wi, “Anaaye wuuwi wi hiyaano nihimuphwanye. Apaalle anaaye o mizinda dda athu ayo ehiri Ayuda wi aahuddiheke yaayo, nko athwaahu epallalleyelliiwawo?

³⁶ Anallota wi, ‘Muneerokaashaasha koma khamukiphwanya navettho khamuwora oyaawo nko kinaakhallekeemiwo.’ Anaaka tini?”

Muhinje wa maaddi ookumi

³⁷ Va nllapo noomallihella navettho nuullupalli na ehakallallo Yesu ahiimella allota mookhuwa wi, “Muthu avolliwa nthona anaphwanella awe wa miyaano wi awirye.

³⁸ Nave muthu anakikhulupilila miyaano awirye wonanko mmo mawu a Mulluku enallotiiwa wi, ‘Mihinje dda maaddi ookumi ddineerokhuma ovenyera mwa muthu yooyo.’ ”

³⁹ Yesu alloteeye ddenndda allota dda Munepa oyo ookhulupilila mwa olliyooyo eneeriiwa yaakhelle. Va enthawi yeeyo Munepa Waweellooyo waari ohinavahiwe kaambiiwa Yesu aari ahinatitimihiwe.

Athu ennavaanyihana

⁴⁰ Athu amodda m'mullokonimmo yamwiiwalliiwa allotaka ella yaallota wi, “Olla sika namallotella!”

⁴¹ Amodda yaallota wi, “Olla sika Mesiya!” Koma amodda Yaallota wi, “Mesiya khavenyera o Galileya.

⁴² Mawu a Mulluku enallota wi, Mesiyooyo anaakhalle edduullu ya mwene Davide nave anaayariwelle mu Betelehemu, m'muzi mmo mwakhalla Davide.”

⁴³ Sika waakhalla ovaanyihana m'mullokonoolle ekaamba ya Yesu.

⁴⁴ Amodda mwa yaayo yapaalla omuphara koma khaavo oyo aworille weera ello va olliye.

Ohikhulupilila wa attekweene a Ayuda

⁴⁵ Akhotwaalle yahokollowilliiwa, allupa mukutho uullupalli ni Afarisi yahaakoha wi, “Khamuwiillena kaambiiwa tini?”

⁴⁶ Akhotwaalle yahaakhulla wi, “Khaavo anallota wonanko muthu yoolla!”

⁴⁷ Afarisaalle yahaakoha wi, nanyeenettho owoottotthani?

⁴⁸ “Moodduwella wi khaavo naari mmodda a attekweene a Ayuda naari Mufarisi mmodda oyo amukhulupililalle olliyoolle.

⁴⁹ Koma athu ayo ehinadduwella malamulo a Mose ennamukhulupilila sika tti ootembeleliwa!”

⁵⁰ Mmodda a Afarisaayo aari Nikodemo, muthu oyo aayiillewo khalle woomoona Yesu. Olliye aallota wa amoddaayo wi,

⁵¹ “Ethiyo malamulwaahu ennamuvaanyiha muthu nihaambille omwiiwa olliye wi nidduwelle eyo enreeye?”

⁵² Yaamwaakhulla olliye wi, “Wettho onavenyera o Galileya?” Huddera mawu a Mulluku nave oneerodduwella wi khaavo namallotella anavenyera o Galileya.

⁵³ Vano arive muthu aarowa owaniwa.