Yohane 5 - Mawu a Mulluku

Yesu anamuchiriha muthu vanthiyani

¹ Ddimallille nndda Yesu aaya o Yerusalemu o Ehakallallo ya Ayuda.

² Mu Yerusalemu vakhuviru ni mullako wa Enkhosa vaakhalla nthiya nooromolliwa Betisaida mu ellotello ya Eheberi naakhalla ni makhote matthanu.

³ Mukhotemmo mwaakonaatthi athu oovoriiwa anchichi, amodda yaari oohoona amodda yaari ookhwa meto amodda oorakalla.

⁵ Vano vaakhalla muthu mmodda avoriiwalle miyakha 38.

⁶ Yesu aamoona olliyooyo vaavo nave aadduwella wi muthooyo aavoriiwa enthawi yoorekama, sika aamukoha wi, “Munnapaalla ochirihiwa?”

⁷ Muthu oovoriiwoolle ahaakhulla wi, “Mi nginna ookiiyaatthi munthiyanimmu maaddi yattanusiwa. Nave kapaalla wi kivollowemo, kinamuphwanya muthu mmodda avollowillemo khalle.”

⁸ Yesu aallota wi, “Venya, kusa mwinllaawo weete.”

⁹ Nave enthawi yeeyo muthooyo aachirihiwa, akusa mwinllaaye, aamba weeta. Nllapo nenno naari na Sabata.

¹⁰ Vano attekweene a Ayuda* yaamulleella muthu oochirihiwoolle wi, “Nna tti nllapo na Sabata nave malamulwaahu khenawaakhullella weyaano okusa mwinllaawo.”

¹¹ Nave ahaakhulla wi, “Muthu oyo aakichirihalle sika akilleelle wi kikuse mwinllaaka keeteke.”

¹² Yaamukoha wi, “Muthooyo ttaani uulleelle wi okuse mwinllaawo weeteke?”

¹³ Koma muthu oochirihiwoolle khaamudduwenlle kaambiiwa Yesu aavollweella muwari mwa mulloko wa athu anchichi ayo yaari vaavo.

¹⁴ Ddimallille nndda Yesu aakumanana mu enyumba ya Mulluku amulleella wi, “Ngoona, woochira vano, ohichimwettho wi yoonanara yookhwaranya eretaawo eheereye wa weyaano.”

¹⁵ Muthooyo aavenya aalleella attekweene a Ayuda wi tti Yesu aamuchirihalle.

¹⁶ Sika Ayuda yahaamba omuhoosa Yesu kaambiiwa aachiriha nllapo na Sabata.

¹⁷ Koma Yesu awaakhulla wi, “Attiitthaaka ennaphara orive mutteko. Nave miyaanottho kinapaalleya wi kiphareke mutteko.”

¹⁸ Ekaamba ya yeella Ayuda yahaanjerera opaalla omwiipha vawi khaathwanre lamulo na nllapo na Sabata navettho aanamweera Mulluku wi tti Attiitthinnya wiillikaniha yeekhaaye ni Mulluku.

Olamulello wa Mwaana a Mulluku

¹⁹ Yesu awaakhulla alliwaayo wi, “Ddawoona, kinimuulleellani wi, miyaano Mwaana ngiwora weera ddeko mwa meekhaaka koma kineera yeeyo kinooneemi Attiitthaaka yeeraka. Nnddo eneeriiwa, emoddamoddave yeeyo miyaano kinneerattho ddennddo.

²⁰ Vawi Attiitthaaka ennakikonda miyaano nave ennakooniha miyaano ddittheddene eneeriiwa. Nave eneerokooniha ddeko ddookhwaranya nndda wi muttikhine.

²¹ Vawi Attiitthaaka ennaavenyiha athu ookhwa enaavaha okumi, emoddamoddave yeeyo miyaano kinnavaha okumi wa ayo kinaapaalleemi.

²² Attiitthaaka khenamweeruza arive muthu koma aakivaha miyaano olamulello ottheene waweeruza,

²³ wi attheene yakititimihe miyaano emoddamoddave yeeyo enaatitimiheriiwa Attiitthaaka. Oohikititimiha miyaano khenaatitimiha Attiitthaaka ayo yaakirumalle.

²⁴ “Ddawoona, kinimuulleellani wi, oyo aniiwa ni wiiwellella mawaaka nave anakhulupilila mwa yooyo aakirumalle ookhalla ni okumi woohimalla. Yoolla kheeruziwa koma ookhuma khalle wa ookhwa avollowa mu okumi.

²⁵ Ddawoona, kinimuulleellani wi, enthawi enimawa nave yoophiya khalle yawi athu ookhwa mu munepa eneerewiiwa okhuwa wa miyaano Mwaana a Mulluku nave ayo eniiwe ni wiiwellella eneerokhalla ni okumi.

²⁶ Vawi Attiitthaaka aakhalla ni masiva owaavaha athu okumi, emoddamoddave yeeyo alliwaayo aakivaha miyaano masiva owaavaha athu okumi.

²⁷ Nave aakivaha miyaano olamulello waweeruza kaambiiwa miyaano tti Mwaana a Muthu.

²⁸ Muhittikhine ni ddenndda, enthawi enimawa yawi ookhwa attheene eneerewiiwa okhuwa waka.

²⁹ Nave eneerokhumamo mu mahame mwiwa. Ayo yeerille ddaphaama eneerovenyihiwa wa ookhwa nave yaayo yeerille ddoonanara eneerovenyihiwa wi yeeruziwe.

Oomweerella omboni Yesu

³⁰ “Nginawora weera ello miyaano meekhaaka. Kinaweeruza moollikana ni mmo Attiitthaaka yakilleellelliiwa, sika echiweruzwaaka eri yawoona kaambiiwa ngineera nnddo kinapaalleemi koma ddennddove anapaalla oyo aakirumalle.

³¹ “Kakhalla mboni meekhaaka, ombonaaka khororomelleya.

³² Vookhalla mmodda anakhalla mboni a miyaano nave kinnadduwella wi ombonaaye tti woororomelleya.

³³ Nyuwaano mwaanaarumiha oorumiwaanyu wa Yohane nave olliye aari mboni a yawoona.

³⁴ Miyaano nginapaalla omboni wa muthu nave kinallota ddenndda wi nyuwaano mwavullusiwe.

³⁵ Yohane aari wonanko enyali ni yoowala nave nyuwaano mwaatthoolla ohakallallana owalanko enthawi yoyeva.

³⁶ Koma miyaano kookhalla ni mboni oopaalleya wunchichi ohiyana ni Yohane. Vawi Attiitthaaka aakivaha mitteko wi kimallihe nave mitteko ddennddo kineereemi tti omboni wawi Attiitthaaka aakiruma.

³⁷ Nave Attiitthaaka yaakirumihallaayo, tti mboni. Okhuwa waye khamwaawiwalle nave wooneya waye khamwaawoonille.

³⁸ Nave khamunasunga mawiiwa m'murimani mwanyu kaambiiwa khamunakhulupilila mwa oyo aakirumalle.

³⁹ Munahuddera mawu a Mulluku kaambiiwa munaganiza wi mwemmo muneerophwanyamo okumi woohimalla. Nave tti mawu a Mulluku yaalla eri mboni,

⁴⁰ koma khamunapaalla owa wa miyaano wi mwaakhelle okumi.

⁴¹ “Mi nginaashaasha otitimihiwa ni athu.

⁴² Koma kinnadduwella makhallellwaanyu nave kinnadduwella wi khamunna echikondi ya Mulluku m'murimani mwanyu.

⁴³ Koowa miyaano mu olamulello wa Attiitthaaka koma khamunakaakhella. Koma mmodda awa mu olamulello waayewaaye, yoolla munnamwaakhella.

⁴⁴ Nyuwaano munnatitimihana koma khamunaashaasha ntitimiho noovahiwa ni Mullukuve. Vano munaakhulupilile mwawiidde?

⁴⁵ Muhiganize wi miyaano kineerewuuvaanyihani vamiitthoni va Attiitthaaka. Mose, oyo munamutiyereenyu, sika anaawuuvaanyiheni.

⁴⁶ Mwamukhulupililalleke Mose, mweerokikhulupilila miyaano kaambiiwa olliye aalemba dda miyaano.

⁴⁷ Koma mwaahikhulupililaka ddoolemba ddaye, munaawore mwawiidde okhulupilila mawaaka?”