Yohane 4 - Mawu a Mulluku

Yesu ni mutthiyana a o Samariya

¹ Afarisi* yahiiwa wi Yesu annaakopa ni waabatiza oohuddera anchichi omukhwaranya Yohane.

² (Naari Yesu ahimubatizalle arive muthu koma oohudderaaye sika yaabatiza.)

³ Sika Yesu iiwalleeye dda Afarisinnddo aavenyawo o echigawo ya Yudeya ahokollweella o echigawo ya Galileya.

⁴ Nave voolendonooyo aphwanenlle wi avirelle o echigawo ya Samariya.

⁵ Mu Samariyammo aaphiya mu etawoni ya Sikari vakhuviru ni nipuro nenno khallekhalle Yakobo aamuvahilleeye mwanaye Yosefe.

⁶ Wenko waakhalla ehime ya Yakobo nave vawi Yesu aatopa ni olendwaaye aakeraatthi mukhwipi mwa ehimeeyo. Yeella yaari enthawi yaatamenlle 12 koloko otthaana.

⁷ Vano mutthiyana a o Samariya aawa wi arike maaddi nave Yesu aallota wa yooyo wi, “Kivahe maaddi kiwirye.”

⁸ (Oohudderaaye yaari ekelle o etawoni wookulla yoocha.)

⁹ Mutthiyanoolle ahaakhulla wi, “Nyu tti Muyuda. Kaambiiwa tini munakivekeenyu maaddi miyaano Musamariya?”* (Vawi Ayuda khenaphariha mutteko makapu ni embale ddimoddamodda ni Asamariya.)

¹⁰ Yesu ahaakhulla wi, “Waadduwenlleke emphaso ya Mulluku ni yooyo anuuveka maaddi, waaweromuveka nave aawerowuuvaha maaddi ookumi.”

¹¹ Mutthiyanoolle aallota wi, “Nyu, yoorikella maaddi khamunna nave ehimeella tti yoowallamella, munaakuse wuuwi maaddi ookumi?

¹² Yakobo, nikhollo nahu, sika aanivahille ehime yeella nave aawiryamo, olliye ni anaaye ni eziweto ddaye. Nyuwaano tti oomukhwaranya Yakobo?”

¹³ Yesu ahaakhulla wi, “Arive muthu anawirya maaddi yaalla aneerovolliwattho nthona.

¹⁴ Koma oyo anaawirye maaddi kinamuvaheemi khavolliwattho nthona. Maaddi yaayo kinamuvaheemi enaakhalle mwa olliyooyo wonanko neetuutu amaaddi ookumi woohimalla.”

¹⁵ Mutthiyanoolle aallota wi, “Kivaheni maaddi yaayo wi kihivolliwettho nthona navettho kihihokollweelle wuno orika maaddi.”

¹⁶ Yesu aamulleella wi, “Khawe wamwiithane mamuno nave mwawe attheene wuno.”

¹⁷ Mutthiyanoolle ahaakhulla wi, “Nginna mamunaka.” Yesu ahaakhulla wi, “Woollota ddawoona voollotani wi, ‘Nginna mamunaka.’

¹⁸ Vawi wookhalla otthelliwaka ni allopwana atthanu nave mullopwana onakhalleewenoolla khe mamuno. Wookilleella ddawoona.”

¹⁹ Mutthiyanoolle allota wi, “Kohoona wi nyuwaano tti namallotella.

²⁰ Makhollwaaka a o Samariya yaamullapella Mulluku vamwaangonoolla koma nyuwaano Ayuda munallota wi o Yerusalemu sika ninaphwanellaahu omullapellawo Mulluku.”

²¹ Yesu aallota wi, “Moowe Kiiwellelleni, enthawi eneerokwakhwana yawi athu khewa yaallapella Attiitthiiwa naari vamwaangonoolla apaalle o Yerusalemu.

²² Nyuwaano Asamariya khamunamudduwella oyo munamullapelleenyu koma hiyaano Ayuda ninnamudduwella oyo nnamullapelleehu kaambiiwa ovullusa onavenyera wa Ayuda.

²³ Nave enthawi enimawa nave yoophiya khalle yawi oollapella mwawoona eneerewaallapella Attiitthiiwa moohoollelliwa ni Munepa Waweella ni mwawoona vawi Attiitthinnya enaapaalla athu awi ddiidda ekhalle oomullapella.

²⁴ Mulluku tti Munepa nave ayo enamullapella enaphwanella emullapelleke m'masivani a Munepa Waweella ni mwawoona.”

²⁵ Mutthiyanoolle aallota wi, “Kinnadduwella wi Mesiya* animawa oyo aneeriwa Khrisitu. Olliyooyo awa, aneeronilleella ddeko ddittheddene.”

²⁶ Yesu aamulleella wi, “Mi kinallota ni weyaano tti meene.”

²⁷ Enthawi yeeyo oohuddera a Yesu yaawa nave yaattikhina wi aanallota ni mutthiyana koma khaavo mmodda aamukohille wi, “Munapaalla tini?” Apaalle “Munallota ni yoolla kaambiiwa tini?”

²⁸ Vano mutthiyanoolle aahiya munwaaye, ahokollweella o etawoni wulle nave ahaalleella athu wi,

²⁹ “Hankoni mwamoone muthu akilleelle ddittheddene kenreemi. Yoolla khahiyo Mesiya?”

³⁰ Sika yaatimulla ovenyera o etawoni wulle oya wa Yesu.

³¹ Va enthawi yeeyo oohudderaalle yaamuveka Yesu wi, “Ahuddihi, chani!”

³² Koma ahaakhulla wi, “Kookhalla ni yoochaaka muhinadduwellaanyu.”

³³ Sika oohudderaalle yahaamba okohana wi, “Ethiyo ookhallavo mmodda awinnyalle yoocha wi eche?”

³⁴ Koma Yesu aallota wi, “Yoochaaka tti yawi keere opaalla wa oyo aakirumalle ni omalliha mutteko aakivahilleeye wi keere.

³⁵ Khamunallota nyuwaano wi, ‘Vavira miyeri misese enthawi yoohata ennaphiya?’ Nave kinimuulleellani wi, muwehesese m'matani, mmiddo ddoowaraalla khalle wi ddihatiwe!

³⁶ Oohata annallivelliwa nave annatthukumaniha ezipaso o okumi woohimalla. Vano awaalla ni oohata eneerohakallalla vamodda.

³⁷ Yoollotiwa yeella tti yawoona yawi, ‘Awaalla tti mmodda, oohata tti mmoddattho.’

³⁸ Kahuurumani wi mwahate yeeyo mwahipharelleenyu mutteko. Amoddeene sika yaphanre mutteko wenko nave nyuwaano muphiyere waakhella ddoohata ddiwa.”

³⁹ Vano Asamariya anchichi mutawoni mulle yaakhulupilila mwa Yesu ekaamba ya omboni wa mutthiyana wawi, “Aakilleella miyaano ddeko ddittheddene kenreemi.”

⁴⁰ Sika Asamariyaalle yaphiyalliiwa wa olliye, yaamuveka wi akhalle ni alliwaayo nave aakhallawo mallapo meelli.

⁴¹ Anchichi yaavirellella waanjerereya okhulupilila ekaamba ya mawu a Yesu.

⁴² Yaamulleella mutthiyanoolle wi, “Ninnakhulupilila vano ohiri ekaamba ya mawaawo koma kaambiiwa noomwiiwa weekhiihu nave ninnadduwella wi yoollathi tti Oovullusa a ellapo yavatthi.”

Yesu anamuchiriha mwaana aamullopwana a muttekweene a o boma

⁴³ Viviralle mallapo meellaalla, Yesu aatimulla oya o Galileya.

⁴⁴ Vawi aallota yeekhaaye wi, “Namallotella khanavahiwa olemu mu ellapo yoowaniwa.”

⁴⁵ Aphiyalleeye o Galileya, athu a wenko yaamwaakhella vawi yahoona ddittheddene eerilleeye mu Yerusalemu va Ehakallallo ya Paska vawi alliwattho yaayaawo o ehakallallweeyo.

⁴⁶ Vano Yesu aahokollweella o Kana mu Galileya nko khalle aatthattusalleeye maaddi okhalla vinyo. Wenko waakhalla muttekweene a o boma o Kaperenao nave mwanaye aamullopwana aanavoriiwa.

⁴⁷ Iiwalleeye wi Yesu aaphiya o Galileya ovenyera o Yudeya, aaya wa olliye amuveka wi aye o Kaperenao amuchirihe mwanaye vawi aari vakhuviru okhwa.

⁴⁸ Yesu aamulleella wi, “Khamuwa mukhulupilila mwaahoona ezizindikiro ni ddoottikhiniha.”

⁴⁹ Muttekweene a o boma aallota wi, “Apwiya, hankoni owaani mwanaka ahinakhwe.”

⁵⁰ Yesu allota wi, “Khaweni, mwaninyu oochira!” Olliyooyo aakhulupilila nnddo Yesu allotilleeye nave aahokollweella owaniwa.

⁵¹ Aroweeye owaniwa, aakumana ni allupa muttekwaaye nave yaamulleella wi, “Mwaninyu oochira!”

⁵² Sika ahaakoha enthaweene aambilleeye ochira nave yahaakhulla wi, “Oviha mwiillinko waamalla oddillo enthawi ya 1 koloko otthaana.”

⁵³ Attiitthinnyaayo yahuupuwella wi enthaweene yaari yeeyo Yesu aallotilleeye wi, “Mwaninyu oochira.” Sika olliye ni a munibanjani naye attheene yaakhulupilila.

⁵⁴ Ella sika yoottikhiniha yaneepiilli Yesu eerilleeye aphiyalle mu Galileya ovenyera o Yudeya.