Yohane 3 - Mawu a Mulluku

Yesu ni Nikodemo

¹ Vaakhalla muttekweene a Ayuda,* nnddina naye Nikodemo, oyo aari a mulloko wa Afarisi.*

² Nave aawa wa Yesu mahiiyu nave aallota wa yooyo wi, “Ahuddihi, ninnadduwella wi nyuwaano tti muhuddihi oorumihiwa ni Mulluku. Khaavo muthu anawora weera ddoottikhiniha muneereenyu Mulluku aahikhalla ni olliye.”

³ Yesu ahaakhulla wi, “Ddawoona, kinimuulleellani wi, khaavo muthu anaawore woona omwene wa Mulluku aahiyariwa wiilli.”

⁴ Nikodemo ahaakoha wi, “Muthu anaayariwe wiilli mwawiidde ari unnuwalle? Olliyooyo khawora ovollowa m'mirimani mwa amennya ni oyariwa wiilli!”

⁵ Yesu ahaakhulla wi, “Ddawoona, kinimuulleellani wi, khaavo muthu anaawore ovollowa mu omwene wa Mulluku aahiyariwa mwa maaddi ni Munepa Waweella.

⁶ Athu enaayara athu, Munepa Waawella ttuuwora ovaha okumi wa minepa ddiwa.

⁷ Ohittikhine kaambiiwa kohuulleella wi, ‘Onaphwanella wi muyariwe wiilli.’

⁸ Ephevo enoopella nko enapaalliiwa nave onniwa moopellwiiwa koma khonadduwella nko enavenyeriiwa naari nko enayiiwawo. Emoddamoddave yeeyo enaphwanaphwana ni arive muthu oyo anayariwa wiilli mwa Munepa Waweella.”

⁹ Nikodemo ahaakoha wi, “Nndda ddineereye mwawiidde?”

¹⁰ Yesu ahaakhulla wi, “We ori muhuddihi muullupalli mu Israele nave khonadduwella nndda?

¹¹ Kinimuulleella ddawoona wi, ninallota yeeyo ninadduwelleehu nave ninavelleella omboni dda yeeyo nonneehu koma nyuwaano khamunamukhulupilila ombonaahu.

¹² Kuulleellani dda ddeko ddaweereya vatthimva khamunakhulupilila, munaakhulupilile mwawiidde kuulleellani ddeko ddaweereya oddullu?

¹³ Khaavo muthu awenlle oddullu koma miyaanove Mwaana a Muthu, sika kakitthalle ovenyera oddullu.”

¹⁴ Nave Mose aatthomeya niphwanaphwaniho na enowa vamuteekhoni muchipululuni, emoddamoddave yeeyo mi Mwaana a Muthu kinaphwanella wi kitthomeyiwe vamutandani,

¹⁵ wi arive muthu anaakikhulupilile miyaano akhalla ni okumi woohimalla.

¹⁶ Vawi Mulluku aakonda ellapo yavatthi wunchichi, sika aavaha Mwanaye mmoddave yooyo wi arive muthu anakhulupilila mwa olliyooyo ahikhwe koma akhallena okumi woohimalla.

¹⁷ Vawi Mulluku khaamurumalle Mwanaye wa ellapo yavatthi wi ayillake koma wi ayivulluse.

¹⁸ Ayo enakhulupilila mwa Mwaana khaneeruziwa koma oohikhulupilila aheeruziwa khalle kaambiiwa khekikhulupililalle miyaano Mwaana mmoddave a Mulluku.

¹⁹ Nave echiweruzweeyo tti ella, owala waawa mu ellapo yavatthi koma athu yaakonda epiphi ohiyana ni owala kaambiiwa yaheera ddeko ddoonanara.

²⁰ Vawi attheene eneera ddeko ddoonanara enniitana ni owala. Nave khenawa nko ori owala kaambiiwa khenapaalla wi mitteko ddiwa ddoonanara ddooneye.

²¹ Nave ayo eneera ddawoona ennawa nko ori owala wi owalanko woonihe wi mitteko ddiwa tti ddoomwiiwellella Mulluku.

Yesu ni Yohane oobatiza

²² Ddimallille nndda Yesu ni oohudderaaye yaaya o echigawo ya Yudeya. Wenko aakhallawo ni alliwaayo wa milungu ddooyeva nave aanabatiza.

²³ Yohanettho aanabatiza mu Ayinoni vakhuviru ni Salimu kaambiiwa waakhalla maaddi manchichi. Athu yaanaya wa olliye nave aanaabatiza.

²⁴ Vawi Yohane aari ahinahiyiwe mundende.

²⁵ Vano oohuddera amodda a Yohane yahaamba ovaanyihana ni Muyuda mmodda malamulo dda meellihello.

²⁶ Sika yaawa wa Yohane emulleella wi, “Ahuddihi, munnamuupuwella muthu oyo aari ni nyuwaano okhopella wa muhinje wa Yordani, olle mwamuvelleellelleenyu omboni? Vano arina obatiza nave athu erina othamakella wa olliyooyo!”

²⁷ Yohane ahaakhulla wi, “Khaavo muthu anawora okhalla ni ello aahivahiwa ni Mulluku.

²⁸ Nyuwaano tti amboni wi kaallota wi, ‘Miyaano khe Mesiya* koma kaarumiwa muhoollo mwaye.’

²⁹ Ootthelliwa mwaneena tti ootthella. Koma mukhwaaye a ootthellooyo aniimella vakhuviru ni omwiiwellella moohakallalla. Nave anahakallalla iiwa mawu a ootthella. Sika emoddamoddave yeeyo koohakallalla ni murimaaka muttheene.

³⁰ Yoolla tti oophwanella wi akhalle oopaalleya wunchichi nave miyaano kikhalle oopaalleya vang'ono.”

Oyo anavenyera oddullu anallota mawu a Mulluku

³¹ Oyo anavenyera oddullu tti oowakhwaranya attheene. Oyo anavenyera va ellapo yavatthi anakhalla a va ellapo yavatthi nave anallota dda ddeko ddaweereya va ellapo yavatthi koma oyo anavenyera oddullu ari ookhwaranya attheene.

³² Annavelleella omboni dda eyo oonilleeye nave iiwalleeye koma khaavo muthu aakhullelle ombonaaye.

³³ Koma Oyo anaakhullella ombonaaye annasimikiza ni yeella wi Mulluku tti awoona.

³⁴ Vano oyo arumiwe ni Mulluku anallota mawu a Mulluku kaambiiwa Mulluku annamuvaha munepaaye mookwakhwanella.

³⁵ Attiitthinnya ennamukonda Mwaniwa nave aahiya ddeko ddittheddene mu olamulellwaaye.

³⁶ Oyo anamukhulupilila mwaana ookhalla ni okumi woohimalla koma oyo ahinamukhulupilila Mwaana khakhalla ni okumi nave Mulluku khahiya omullaka olliyooyo.