Yohane 21 - Mawu a Mulluku

Yesu anooneyattho wa oohudderaaye

¹ Ddimallille nndda Yesu ahooneyattho wa oohudderaaye o enyanja ya Tiberiya. Ddeereyille mwawi ddiidda:

² Simoni Petro, Tomasi ooromolliwa wi Didimo, Natanaele a o Kana a Galileya, anamwani a Zebedayo ni eelli amodda a oohudderaaye yaari nimodda.

³ Vano Simoni Petro ahaalleella amoddaayo wi, “Kinaya kiiphe ehomba.” Yaallota wi, “Hittho nineeroyaawo ni nyuwaano.” Sika yaatimulla mukallawani koma mahiiyu mattheenaayo kheyaawiiphalle ello.

⁴ Nndduwa nakhumiiwa Yesu ahiimella mukhwipi mwa enyanja nave oohudderaalle khayaadduwenlle wi olliyooyo aari Yesu.

⁵ Vano ahaakoha wi, “Mohiipha ello?” Yaamwaakhulla wi, “Iyaayi, khaniiphalle ello.”

⁶ Ahaalleella wi, “Vokhani nthavi nanyu o nnattanatta na ekallawa nave muneerewiipha ello.” Sika yaavokha nave kheyaaworille opurulla ekaamba yawaata wa ehomba.

⁷ Oohuddera olle Yesu amukondilleeye aamulleella Petro wi, “Tti Apwiya!” Vano Simoni Petro iiwalleeye wi yaari Apwiya aawara yawiikhuneellaaye kaambiiwa khaawarille phaama nave aalluphella mu enyanja.

⁸ Oohuddera amoddaalle yaawa mukhwipi mwa enyanja eri mukallawani epurullaka nthavi nooddalla ni ehomba. Kheyaari voorekama ni mukhwipi mwa enyanja, vakhuviru mamita 100.

⁹ Yaphiyalliiwa mukhwipi mwa enyanja, yahoona munllo wa mankhalla vaavo viri ehomba ni buledi.

¹⁰ Vano Yesu aallota wi, “Wannani ehomba ddimodda mwiiphalleenyu wene.”

¹¹ Sika Simoni Petro aawella mukallawani apurullella nthavinno mukhwipi mwa enyanja. Nthavinno naaddalla ni ehomba dduullupalli 153. Nave naari ddaari ddawaata ddiidda koma nthavinno khanaawaahuwalle.

¹² Yesu ahaalleella wi, “Waawoni muche.” Nave khaavo mmodda a oohudderaaye allipalle murima omukoha olliyooyo wi, “Nyu ttaani?” Yaadduwella wi yaari Apwiya.

¹³ Sika Yesu aamukusa buledi aavaha alliwaayo. Nave aheerattho emoddamoddave yeeyo ni ehombanndde.

¹⁴ Yeeyo yaari enthawi yaneeraru avenyilleeye wa ookhwa wi Yesu ooneye wa oohudderaalle.

Yesu ni Petro

¹⁵ Nave emanlle ocha, Yesu aamulleella Simoni Petro wi, “Simoni, mwaana a Yohane, onnakikonda miyaano ookhwaranya amoddaalla?” Ahaakhulla wi, “Ee Apwiya, munnadduwella wi kinnuukondani.” Yesu aamulleella wi, “Achiheke anamwanankhosaaka.”

¹⁶ Yesu aamukohattho wiilli wi, “Simoni, mwaana a Yohane, onnakikonda miyaano?” Ahaakhulla wi, “Ee Apwiya, munnadduwella wi kinnuukondani.” Yesu aamulleella wi, “Achiheke asaanaankhosaaka.”

¹⁷ Yesu aamukoha waneeraru wi, “Simoni, mwaana a Yohane, onnakikonda miyaano?” Petro aamoriwa ethakaraka kaambiiwa Yesu aamukoha waneeraru wi, “Onnakikonda miyaano?” Sika aallota wi, “Apwiya, munnadduwella ddittheddene, munnadduwella wi kinnuukondani nyuwaano!” Yesu aallota wi, “Chihaka enkhosa ddaka.

¹⁸ Kinimuulleella ddawoona wi waariiwe musombwe, waaniimakella weekhaawo laamba muyuununi mwawo onaya orive weko wapaalleewe. Koma wuulluvalla, oneerowookolla mattaawo wi muthu mmodda uumakelle laamba muyuununi mwawo ni wuukusella nko ohinapaalleewe oyaawo.”

¹⁹ Voollotani ddenndda, Yesu aadduwanyeyiha dda mmo Petro aneereeye akhwelle moomutitimiha Mulluku. Vano Yesu aamulleella wi, “Kithware!”

Yesu ni oohuddera oyo amukondeeye

²⁰ Petro arukunuwalleeye aamoona oohuddera mmodda olle Yesu aamukondilleeye, aathwaraka. Olliyoolla tti olle akeraatthille vakhuviru ni Yesu vamachellelloni nave amukoha Yesu wi, “Apwiya, ttaani oyo anuuvelleelleni wi mwiiphiwe?”

²¹ Petro aamoonilleeye, aamukoha Yesu wi, “Apwiya, vano enaamweereyelle tti tini muthoolla?”

²² Yesu aamwaakhulla wi, “Kapaalla wi olliyoolla ahikhwe ophiyera kihokollowille, weyaano ddenndda orina mutteko tini? Kithware!”

²³ Sika epilli yeella yaavuwa variyari va oohuddera a Yesu wi oohuddera yoolla khakhwa. Koma Yesu khaallotille wi khakhwa, aallotille wi, “Kapaalla wi olliyoolla ahikhwe ophiyera kihokollowille, weyaano ddenndda orina mutteko tini?”

²⁴ Yoolla tti oohuddera oyo avelleelle omboni dda ddenndda nave aalemba ddeko ddenndda. Nave ninnadduwella wi ombonaaye tti wawoona.

Mamallihello

²⁵ Vano vookhallattho ddeko ddimodda ddinchichi nnddo Yesu eerilleeye. Ddaalembiweke ddittheddene emodda emodda, kinaganiza wi ellapo yavatthi ettheene kheyaakhallena nipuro na mabukhu mamodda oolembiwa.