Yohane 20 - Mawu a Mulluku

Yesu anavenyehiwa wa ookhwa

¹ Ohinase wa Nllapo Namulungu, epiphi ehinamalle, Mariya Magadalena aawa o mahame nave ahoona wi nlluku naavenyihiwavo vamullakoni valle.

² Vano aathamakella wa Simoni Petro ni oohuddera mmodda, olle Yesu aamukondilleeye, aalleella wi, “Apwiya aavenyihiwamo mu nihameninne nave khannadduwella nko yaavitthalliiwa!”

³ Vano Petro ni oohuddera mmoddoolle yaakhuma eya o nihamenne.

⁴ Yaathamaka eelli attheene nave oohuddera mmoddooyo aathamaka ahoolla omukhwaranya Petro nave aaphiya va nihamenno mwawaambeella.

⁵ Aawarama atthurumellamo oona ekuwo ddahuruwelliwena Yesunndde koma khaavollowillemo.

⁶ Vano aawattho Simoni Petro amuthwaraka nave aavollowa mu nihame nave ahoona ekuwonndde ddihallelle vaavo.

⁷ Nave ekuwo eyo yaahuruwelle muru wa Yesu ehiri vamodda ni ekuwo ddimoddanndde koma yaavillikiwe va weekhiiwa.

⁸ Vano oohuddera mmoddoolle, oyo aphiyalle va nihamenne mwawaambeella aavollowattho nave ahoona, akhulupilila.

⁹ Ophiyera enthawi yeeyo khayaawiiwesesille mawu a Mulluku awi Yesu anaphwanella ovenya wa ookhwa.

¹⁰ Vano oohudderaalle yaarowa owaniwa.

Yesu anooneya wa Mariya Magadalena

¹¹ Koma Mariya ahiimella vaatte va nihame inllaka. Nave inllaka ddiiddo aawarama atthurumella mu nihame.

¹² Nave wenko aawoona angelo eelli ewanre ddoowara ddaweella ekeraatthille mvo vakonaatthihiwe mutembo wa Yesu, mmodda omuruni ni mmodda ometoni.

¹³ Yaamukoha wi, “Moowe Muninllella tini?” Ahaakhulla wi, “Ahaavenyihamo Apwiyaaka nave nginadduwella nko yaavitthalliiwa!”

¹⁴ Allotille ella aarukunuwella otulli nave amoona Yesu iimenlle koma khaamudduwenlle wi olliyooyo aari Yesu.

¹⁵ Yesu aamukoha wi, “Muninllella tini? Munamwaashaasha aani?” Vano amweesa wi aari mullupa emata, sika aallota wi, “Mwaarimi mwaakusallemo, killeelleni nko mwaavitthalleenyu nave kiye kaakusewo.”

¹⁶ Yesu aallota wi, “Mariya!” Mariya aarukunuwa allota mu Eheberi wi, “Raboni.” Ottaphullella wi, “Ahuddihi.”

¹⁷ Yesu aamulleella wi, “Ohikiphare vawi nginawelle wa Attiitthaaka. Koma vano khawe wa oohudderaaka waalleelle wi kinahokollweella wa Attiitthaaka ni wa Attiitthaanyu, wa Mullukwaaka ni Mullukwaanyu.”

¹⁸ Sika Mariya Magadalena aaya aalleella oohudderaalle wi aawoona Apwiya nave yaallota ddenndda wa olliye.

Yesu anooneya wa oohudderaaye

¹⁹ Misikuwa a nllapo nenno, Nllapo Namulungu, oohudderaalle yaatthukumana vamodda. Yaawalla machiwi kaambiiwa yawoova Ayuda. Vano Yesu aawa iimella variyari viwa allota wi, “Murendelle okhalle ni nyuwaano.”

²⁰ Allotilleeye ddenndda aawooniha mattaaye ni epararu ddaye. Sika oohudderaalle yaahakallalla voowoonani Apwiya.

²¹ Yesu aallota wiilli wi, “Murendelle okhalle ni nyuwaano. Miyaano kinuurumani nyuwaano wonanko mmo Attiitthaaka yaakirumalliiwa miyaano.”

²² Nave allotilleeye ddenndda ahaaviddeellella allota wi, “Akhellani Munepa Waweella.

²³ Mwakhululuka machimo a athu eneerokhululukiwa nave mwaahikhululuka machimwaayo khewa ekhululukiwa.”

Yesu ni Tomasi

²⁴ Vano Tomasi, ooromolliwa Didimo, mmodda a oohuddera khumi ni eellaalle, khaakhanllena vamodda ni oohudderaalle, Yesu awiilleeye.

²⁵ Sika oohuddera amodda yaamulleella wi, “Noowoona Apwiya!” Koma Tomasi ahaalleella wi, “Kaahoona makhwata a misomali m'mattani mwiwa nave kaattannya ni eyaallaaka m'makhwatanimmo navettho kaattannya ni nnatta naka mu epararuni mwaye, ngiwa kikhulupilila.”

²⁶ Nave viviralle mallapo matthanu ni mararu, oohudderaalle yaarittho mpa mulle nave Tomasi aari vamodda ni yaayo. Machiwi eri oowallawalleene Yesu aawa iimella variyari viwa allota wi, “Murendelle okhalle ni nyuwaano.”

²⁷ Vano aamulleella Tomasi wi, “Ttannya ni eyaallaawo mva nave ona mattaaka navettho okolla nnatta nawo ottannye mu epararwaaka. Ohikhalle oohikhulupilila koma okhulupilileke.”

²⁸ Tomasi ahaakhulla wi, “Apwiyaaka ni Mullukwaaka!”

²⁹ Yesu aamulleella wi, “Wookhulupilila kaambiiwa wookoona? Oodalisiwa tti ayo enakhulupilila naari ehoonille.”

Yoolinga ya nibukhu nenna

³⁰ Yesu aheera ddoottikhiniha ddimodda ddinchichi vamiitthoni va oohudderaaye nnddo ddihilembiwe mu nibukhu nenna.

³¹ Koma nndda ddiri mu nibukhu nenna ddoolembiwa wi mukhulupilile wi Yesu tti Mesiya,* Mwaana a Mulluku nave wi voomukhulupililani olliyooyo mukhallena okumi.