Yohane 19 - Mawu a Mulluku

¹ Vano Pilato aalamula wi Yesu awashulliwe.

² Akhoto yaalluwa echipewa ya miiwa emuwariha m'muruni mwaye nave yaamuwariha mukanjo wooreera woofiira.

³ Yaawa wa olliyooyo ellota wi, “Mooselliwa, Mwene a Ayuda!” Nave yaamuukutha.

⁴ Nave Pilato aakhumattho vaatte allota wi, “Kinimamukusella wa nyuwaano vaatte wi mudduwelle wi nginaphwanya mullatu mwa olliyooyo.”

⁵ Sika Yesu aakhuma awarille echipewa ya miiwa ni mukanjo wooreera woofiira. Pilato ahaalleella wi, “Ngamooneni muthoolle tti olla.”

⁶ Nave allupa mukutho uullupalli ni akhoto yamoonilliiwa yaakhuwa wi, “Mutthomeyeni vamutandani! Mutthomeyeni vamutandani!” Pilato ahaalleella wi, “Nyu mumukuse mwamutthomeye vamutandani olliyooyo. Vawi miyaano nginaphwanya mullatu mwa olliyooyo.”

⁷ Ayudaalle yaamwaakhulla wi, “Nookhalla ni malamulo awi anaphwanella okhwa kaambiiwa ahiiromolla yeekhaaye Mwaana a Mulluku.”

⁸ Pilato iiwalleeye nndda ahoova wunchichi.

⁹ Aavollowattho munthatoni mulle nave aamukoha Yesu wi, “Onavenyera wuuwi?” Koma Yesu khaawaakhullalle.

¹⁰ Vano Pilato aallota wi, “Khonallota ni miyaano? Khonadduwella wi kookhalla ni olamulello wawuuttaphulla apaalle wawuutthomeya vamutandani?”

¹¹ Yesu ahaakhulla wi, “Khamwaakhallena olamulello va miyaano mwahivahiweke ni Mulluku. Sika muthu oyo akivelleelle wa nyuwaano ookhalla ni machimo muullupalli ohiyana ni nyuwaano.”

¹² Pilato iiwalleeye nndda aapaalla omuttaphulla Yesu koma Ayudaalle yaakhuwa wi, “Mwamuttaphulla olliyooyo, khamunakhalla mukhwaaye a Kaisara,* o Roma. Muthu oyo anaddeera yeekhaaye wi mwene anavaanyihana ni Kaisara.”

¹³ Pilato iiwalleeye nndda aakhumana Yesu akeraatthi vampandoni wooweeruzella vanipuroni nooromolliwa Nthato namalluku nave mu Eheberi ninaromolliwattho wi Gabata.

¹⁴ Vano naari Nllapo Nookhozekella Paska waatamella enthawi ya 12 koloko otthaana nave Pilato ahaalleella Ayudaalle wi, “Ngamooneni mwenaanyu tti olla.”

¹⁵ Yaakhuwa wi, “Mwiipheni! Mwiipheni! Mutthomeyeni vamutandani!” Pilato ahaakoha wi, “Munapaalla kimutthomeye vamutandani mwenaanyu?” Allupa mukutho uullupalli yahaakhulla wi, “Hi khaninna mwene mmodda koma Kaisarave.”

¹⁶ Vano Pilato aamuvelleella Yesu wa yaayo wi atthomeyiwe vamutandani. Vano yaamukusa Yesu.

Yesu anatthomeyiwa vamutandani

¹⁷ Aakhuma atukhulla mutanda yeekhaaye oyaana o nipuro nooromolliwa wi, “Nipuro na Nikharakadda.” Nno naromolliwa mu Eheberi “Gologota.”

¹⁸ Yaamutthomeya vamutandani vaavo vamodda ni athu amodda eelli, mmodda o nnattanatta nave mmodda wuunyotthoni nave Yesu variyari.

¹⁹ Pilato aalemba edduwanyeyiho iiyaatthi vamutandani. Aalembille wi, “Yesu a o Nazareti, Mwene a Ayuda.”

²⁰ Nave athu anchichi yaheerenga edduwanyeyiheeyo kaambiiwa Yesu aatthomeyiwe vamutandani vanipuroni noowaatamella muzinda. Edduwanyeyiho yeeyo yaalembiwa mu Eheberi, mu Eroma ni Egriki.

²¹ Allupa mukutho uullupalli yaallota wa Pilato wi, “Muhilembe wi ‘Mwene a Ayuda’ koma wi, ‘Muthu yoolla eehina kiri Mwene a Ayuda.’ ”

²² Pilato aallota wi, “Eyo kilembilleemi koolemba.”

²³ Akhotwaalle yamutthomeyilliiwa vamutandani Yesu, yaakusa ddoowara ddaye eddikawa vasese nave arive akhoto akusa emodda. Yaakusattho mukanjwaaye olle wasowiwe waambeella vaddullu ophiyera vatthi woohiminikiwa.

²⁴ Vano akhotwaalle yaallota mmodda ni mukhwaaye wi, “Nihaahulle alla koma noombese wi noone wi anaakuse ttaani.” Ddaari ddiiddo wi mawu a Mulluku ekwakhwanihiwe awi, “Yaakawana ddoowara ddaka nave yahoombesera va mukanjwaaka.” Sika akhoto yaheera ella.

²⁵ Vakhuviru ni mutanda wa Yesu vahiimella amennya ni mwanamunniwa ni Mariya mwaara a Kleopa ni Mariya Magadalena.

²⁶ Vano Yesu awoonilleeye amennya ni oohuddera oyo aamukondilleeye yiimenlle vaavo, ahaalleella amennya wi, “Mutthiyana, ngoonani, olla tti mwaninyu.”

²⁷ Nave aamulleella oohudderoolle wi, “Ngoona, alla tti amaayo.” Nave ovenyera enthawi yeeyo oohudderoolle ahaakusa wi yakhalleke owaniwa.

Okhwa wa Yesu

²⁸ Yesu aadduwella wi vano ddittheddene ddaamalla. Nave wi mawu a Mulluku ekwakhwanihiwe, aallota wi, “Kinnavolliwa nthona.”

²⁹ Vano vaakhalla yookusella yooddalla ni vinyo oonyuunya. Sika yaatthaveya esiponje mu vinyo yiiyaatthi otthoka wa ekopo ya muteekho wa hisope* etukhullella owanoni waye.

³⁰ Yesu aamuwirya vinyoolle allota wi, “Ddoomalla!” Vano aawaramiha murwaaye akhwa.

Enamuhoma Yesu epararu

³¹ Vano attekweene a Ayuda* yaamuveka Pilato wi alamule wi yinttaka meto dda athwaalle yatthomeyiwe nave wi evenyihevo mitembo vamutandani. Yaaveka yeella kaambiiwa naari Nllapo nookhozekella Sabata nave khayaapanlle wi mitembonndde ddikhalle vamutandani va nllapo na Sabata kaambiiwa nllapo na Sabatanno naari naweella.

³² Sika akhotwaalle yaawa yinttaka meto dda athu eelli alle yatthomeyiwe vamutandani ni Yesu.

³³ Koma yaphiyalliiwa wa Yesu, yamphwanyille akhwille khalle, sika khayaawinttakille meto ddaye.

³⁴ Nave mmodda a akhotwaayo aahoma epararu ya Yesu ni nivaka nave enthawi yeeyo mwaakhuma nikhame ni maaddi.

³⁵ Oyo oonille sika mboni nave ombonaaye ori wawoona. Nave yoolla annadduwella wi anallota ddawoona wi nyuwaanottho mukhulupilile.

³⁶ Nndda ddaheereya wi mawu a Mulluku ekwakhwanihiwe awi, “Naari nikhuva naye nimodda khaniwa ninttakiwa.”

³⁷ Nave mawu a Mulluku enallotattho wi, “Eneeroweha va oyo yaamuhomilliiwa.”

Ovitthiwa wa Yesu mu mahame

³⁸ Emanlle yeella, Yosefe o Arimateya, aamuveka Pilato wi avenyihevo mutembo wa Yesu. Yosefe aari oohuddera a Yesu mwawiipittha kaambiiwa awoova attekweene a Ayuda. Pilato ahaakhullella sika Yosefe aaya avenyihavo mutemboolle.

³⁹ Nave Nikodemo, olle oonanne khalle ni Yesu mahiiyu aawattho. Aawaana makhura a nthuko naphaama a mure* oottakanyihera ni aloe,* ollemella wene vakhuviru makilogaramu 30.

⁴⁰ Athu eellaayo yaakusa mutembo wa Yesu ewuhuruwella ni ekuwo vamodda ni makhura a nthuko naphaamaalle moollikana ni makhallello a Ayuda oovitthella mutembo.

⁴¹ Nave waatamella vanipuroni mvo Yesu aatthomeyiweeyevo vamutandani vaakhalla emata nave m'matanimmo mwaakhalla nihame nanaanweene mmo mwahivitthiwe muthu ovenyera khalle.

⁴² Vano yaamuvitthamo Yesu kaambiiwa naari nllapo nookhozekella nllapo na Sabata navettho nihamenno naari vakhuviru.