Yohane 18 - Mawu a Mulluku

Omakiwa wa Yesu

¹ Yesu amallihalleeye ovekella, aatimulla ni oohudderaaye oya okhopella wa muhinje wa Kedroni. Wenko waakhalla emata nave Yesu ni oohudderaaye yaavollowamo.

² Yudasi, oyo amuvelleelle Yesu wi iiphiwe, aadduwella nipuronno kaambiiwa Yesu aanaya wiilliwiilli ni oohudderaaye.

³ Vano Yudasi aakusa mulloko wa akhoto a o Roma ni oowehera enyumba ya Mulluku oorumihiwa ni allupa mukutho uullupalli ni Afarisi,* ayaana omatanko. Yaatukhulla enyali ni mitthiko ni ezida dda ekhoto.

⁴ Yesu aadduwella ddittheddene ddawa wi ddimweereyelle, sika ahiimella aakoha wi, “Munamwaasha aani?”

⁵ Yahaakhulla wi, “Yesu a o Nazareti.” Ahaakhulla wi, “Tti meene.” Yudasi, olle anaamuvelleelle wi iiphiwe, ahiimellattho vaavo ni yaayo.

⁶ Yesu allotilleeye wi, “Tti meene.” Yaahokollweella mutulli yiikuha.

⁷ Yesu ahaakohattho wi, “Munamwaasha aani?” Yahaakhulla wi, “Yesu a o Nazareti.”

⁸ Yesu ahaakhulla wi, “Kohuulleellani wi tti meene. Vano mwaakipaallaka miyaano ahiyeni amoddaalla eroweke.”

⁹ Aallota ddenndda wi mawu aallotilleeye ekwakhwanelle awi, “Mwa ayo mwaakivahilleenyu khaavo mmodda akirimeellevo.”

¹⁰ Simoni Petro, oyo aari ni nsupada, aanihullulla amuphaddana naaru noonnattanatta kaporo a mullupa mukutho muullupalli. Nnddina na kaporooyo naari Malkusi

¹¹ Yesu aamulleella Petro wi, “Hokollosella nsupada nawo mu nigonelo mwiwa! Ethiyo kihimuwirye kapu a ddoohoosa oyo Attiitthaaka yaakivahilliiwa?”

Yesu wa Anasi

¹² Vano mulloko wa akhoto a o Roma ni oolamulelliiwa ni oowehera a Ayuda yaamphara Yesu emmaka.

¹³ Vawaamba yaamukusella wa Anasi. Kayafa aari mukamwene a Anasi navettho mullupa mukutho muullupalli muyakha yooyo.

¹⁴ Kayafa tti yoolle aalleelle Ayuda wi, “Tti waphaama wa nyuwaano wi muthu mmodda akhwe munipuroni na athu attheene.”

Petro anamuruna Yesu

¹⁵ Simoni Petro ni oohuddera mmodda yaamuthwara Yesu. Nave oohuddera mmoddooyo aadduwelliwa ni mullupa mukutho muullupalli nave aavollowa vamodda ni Yesu mu nthato na mullupa mukutho muullupalli.

¹⁶ Koma Petro ahiimella vamullakoni vaatte. Oohuddera mmodda oyo adduwelliwe ni mullupa mukutho muullupalli aakhuma allota ni namwalli oowehera vamullakoni wi amwaakhullelle wi amuvollochihe Petro.

¹⁷ Namwalli oowehera va mullakooyo aamukoha Petro wi, “We khohiyo mmodda a oohuddera a muthu amakiwoolla?” Petro ahaakhulla wi, “Khe miyaano.”

¹⁸ Vano akaporo ni ooweheraalle yaakhariha munllo wa mankhalla kaambiiwa waamariirya nave yahiimella enootha. Nave Petro aaya iimellattho vaavo anoothana.

Mullupa mukutho muullupalli anamukoha Yesu

¹⁹ Vano mullupa mukutho muullupalli aamukoha Yesu dda oohudderaaye nave dda ehuddihwaaye.

²⁰ Yesu ahaakhulla wi, “Mi kaanallota moohikhuwa wa arive muthu. Kaanaahuddiha wiilliwiilli ddittheddene mu enyumba ddamavekello* ni mu enyumba ya Mulluku nko watthukumana Ayuda attheene. Ngaallotillevo erive ello mookhuwa.

²¹ Vano munakikohera tini? Mwaakohe athu ayo yiiwalle eyo kaalleelleemi, ennadduwella eyo kallotilleemi.”

²² Yesu aallotilleeye ella, mmodda a akhoto oyo amwaatamenlle aamuukutha, allota wi, “Onamwaakhulla mullupa mukutho muullupalli mwawi ddiidda?”

²³ Yesu aamwaakhulla wi, “Kaariimi killotille yoonanara velleella omboni dda yoonanareeyo. Koma kaariimi killotille yawoona, onakuukuthella tini?”

²⁴ Vano Anasi aamurumiha olliyooyo oomakiweene wa Kayafa mullupa mukuthoolle.

Petro anamuruna Yesu wiilli

²⁵ Simoni Petro ahiimellave vaavo oothaka munllo. Vano amodda yaamukoha wi, “We khohiyo mmodda a oohuddera a muthu amakiwoolle?” Nave Petro aaruna, allota wi, “Khe miyaano.”

²⁶ Mmodda a akaporo a mullupa mukutho muullupalli, mbalaaye a muthu olle Petro amuphaddilleeye naaru, aamukoha wi, “Mi ngaawoonille weyaano m'matani vamodda ni muthu yoolla?”

²⁷ Petro aakhoota wiilli nave enthawi yeeyo mutthupi wahinlla.

Yesu anakuselliwa wa Pilato

²⁸ Vano osaka wene ohinase Ayuda yaamukusa Yesu ovenyera wa Kayafa emuyaana o nthato namillatu na Aroma. Ayuda kheyaavollowillemo munthatonimmo wi ehiripihiwe kaambiiwa yapaalla wi yachena yoocha ya Paska

²⁹ Sika Pilato aakhumellella wa alliwa aakoha wi, “Mumphwanyille ni mullatu wawiidde woomuvaanyiihana muthu yoolla?”

³⁰ Yaamwaakhulla wi, “Ahaariki ni mullatu khanaamuvelleelle wa nyuwaano.”

³¹ Pilato ahaalleella wi, “M'mukuse nyuwaano mwamweeruze moollikana ni malamulwaanyu.” Yahaakhulla wi, “Khaninna olamulello woomwiipha muthu.”

³² Ella yaheereya wi mawu a Yesu oollota dda mmo anaakhwelleeye ekwakhwanelle.

³³ Sika Pilato aavollowattho munthatoni mulle. Amwiithana Yesu amukoha wi, “We tti Mwene a Ayuda?”

³⁴ Yesu ahaakhulla wi, “Munallota ddenndda mwa weekhiinyu apaalle athu amodda yahuulleellani dda miyaano?”

³⁵ Pilato ahaakhulla wi, “Mi tti Muyuda? Mutundwaanyu ni allupa mukutho uullupalli sika yuuvelleelleni wa miyaano. Ethiyo mwenre tini?”

³⁶ Yesu aallota wi, “Omwenaaka khori wa ellapo yavattheella. Omwenaaka wakhanlleke wa ellapo yavattheella akhotwaaka yaawerowanana ekhoto wi kihivelleelliwe wa Ayuda koma omwenaaka khori wa ellapo yavatthimva.”

³⁷ Sika Pilato amukoha wi, “Vano weyaano tti mwene?” Yesu ahaakhulla wi, “Nyu sika munallota wi miyaano tti mwene. Kaayariwa nave kaawa mu ellapo yavatthi wi kivelleelle omboni dda yawoona. Muthu oyo anakhalla mu yawoona anniiwa mawaaka.”

³⁸ Pilato ahaakoha wi, “Vano yawoona tti tini?” Nave aallotilleeye ella, Pilato aayattho wa Ayuda allota wi, “Nginamphwanyana orive mullatu.

Yesu analamuliwa wi iiphiwe

³⁹ Nave moollikana ni mmo muddollweellelleenyu kinnuuttaphullellani muthu oomakiwa mmodda va Ehakallallo ya Paska. Munapaalla kuuttaphullelleni Mwene a Ayuda?”

⁴⁰ Yaamwaakhulla mookhuwa wi, “Ohiri muthu yoolla koma Baraba.” Baraba aari muthu oowukila niboma.