Yohane 17 - Mawu a Mulluku

Yesu anaavekella oohudderaaye

¹ Yesu amanlleeye ollota nndda aaweha oddullu allota wi, “Attiitthaaka, enthawi yoophiya. Kititimiheni miyaano Mwaninyu wi nameenettho kuutitimiheni nyuwaano.

² Vawi mookivaha olamulello va athu attheene wi kaavahe okumi woohimalla athu attheene mwakivahilleenyu.

³ Nave okumi woohimalla onattaphullella wi athu yuudduwellekeni nyuwaano, Mulluku awoona nave ni miyaano Yesu Khrisitu, oyo mwakirumalleenyu.

⁴ Miyaano kohuutitimihani nyuwaano mu ellapo yavatthi vawi koomalliha mutteko oyo mwakivahilleenyu wi kiphare.

⁵ “Vano Attiitthaaka, kititimiheni miyaano vamiitthoni vanyu ni ntitimiho nenno kaariimi ni nyuwaano ehinaphatusiwe ellapo yavatthi.

⁶ “Kohuudduwellihani wa athu ayo mwaakivahilleenyu miyaano mu ellapo yavatthi. Yaari aanyu nave mwaakivaha miyaano nave yahaathwara mawaanyu.

⁷ Nave vano ennadduwella wi erive ello mwaakivahilleenyu enavenyera wa nyuwaano.

⁸ Vawi kahaavaha mawu yaayo mwakivahilleenyu nave yaawaakhella. Nave ennadduwella wi tti ddawoona wi kaavenyennre wa nyuwaano nave ennakhulupilila wi mwaakiruma miyaano.

⁹ “Mi kinnaavekella yaayo. Nginaavekella athu a ellapo yavatthi koma ayo mwaakivahilleenyu miyaano kaambiiwa eri aanyu.

¹⁰ Nave ddaaka ddittheddene tti ddaanyu nave ddaanyu ddittheddene tti ddaaka nave ntitimiho naka ninnooneya ekaamba ya alliwaayo.

¹¹ Vano nginakhallattho mu ellapo yavatthi koma alliwaayo tti a mu ellapo yavatthi nave miyaano kinimawa wa nyuwaano. Attiitthaaka aweella, ekaamba ya masiva a nnddina nanyunno mwaakivahilleenyu atetezeni yaalla phaama. Sika vano ekhalle amodda wonanko mmo nyuwaano ni miyaano nikhallelleehu amodda.

¹² Kaariimi ni yaayo kahaateteza phaama mu masiva a nnddina nanyu, mwakivahilleenyu miyaano. Kahaawehera alliwaayo nave khaavo mmodda arimeellevo, omuhiya muthu olle aphwanenlle orimeella wi mawu a Mulluku ekwakhwanihiwe.

¹³ Vano kinimawa wa nyuwaano nave kinallota ddeko ddenndda kiri mu ellapo yavatthi wi ehakallallwaaka eddalle m'murimani mwiwa muttheene.

¹⁴ Kahaavaha mawaanyu. Nave athu a ellapo yavatthi yaawiita oohudderaaka kaambiiwa khenakhalla a ellapo ya vattheeyo wonanko miyaanottho nginakhalla a ellapo yavatthi.

¹⁵ Nginuuvekani wi mwaavenyihemo mu ellapo yavatthi koma wi mwaateteza phaama wa Oonanarooyo.

¹⁶ Yaayo khenakhalla a ellapo yavatthi wonanko miyaanottho nginakhalla a ellapo yavatthi.

¹⁷ Weelliheni yaayo oweella mu masiva a yawoona; mawaanyu tti yawoona.

¹⁸ Kahaaruma alliwa mu ellapo yavatthi wonankottho mwaakirumalleenyu mu ellapo yavatthi.

¹⁹ Nave ekaamba ya alliwaayo kinnaddeelliha meekhaaka wi kiivelleelle wa nyuwaano. Sika yaayottho yakhalle ooddeelliha ni wiivelleella wa nyuwaano mwawoona.

²⁰ “Nginaavekella yaallave komattho ayo enakikhulupilila miyaano ekaamba ya mawiiwa.

²¹ Attiitthaaka, kinavekella wi attheene ekhalle amodda. Wonanko nyuwaano, munakhalla ni miyaano ni miyaano kinakhalla mwa nyuwaano, alliwattho ekhalle mwa hiyaano wi athu ellapo yavatthi yaakhulupilila wi mwaakiruma.

²² Kaakawanana ntitimiho mwakivahilleenyu wi ekhalle amodda, wonanko mmo nyuwaano ni miyaano niri amodda.

²³ Miyaano mwa alliwa nave nyuwaano mwa miyaano wi ekwakhwanelle okhalla amodda wi athu a ellapo yavatthi edduwelle wi mwaakiruma miyaano nave wi munnaakonda wonanko mmo munakikondelleenyu miyaano.

²⁴ “Attiitthaaka, kinapaalla wi ayo mwakivahilleenyu miyaano, yakhalle ni miyaano nko kinaakhalleemiwo, sika vano eneerewoona ntitimiho naka nno mwaakivahilleenyu kaambiiwa mwaakikonda ellapo yavatthi ehinaphatusiwe.

²⁵ Attiitthaaka oolungama, athu a ellapo yavatthi khenuudduwellani nyuwaano koma kinnuudduwellani nyuwaano nave oohudderaaka ennadduwella wi mwaakiruma miyaano.

²⁶ Nave kahaadduwelliha nyuwaano nave kineerovirellella weera ddiiddo. Vano echikondi muriinyuna mwa miyaano ekhalle mwa alliwa nave miyaanottho kikhalle mwa alliwaayo.”