Yohane 16 - Mawu a Mulluku

¹ “Kohuulleellani nndda wi muhihiye echikhulupilwaanyu.

² Khamwaakhullelliwa ovollowa mu enyumba ddamavekello* nave enthawi eneerophiya yawi arive muthu oyo anaawiipheni nyuwaano anaaganizekeeye wi anamurumeyella Mulluku.

³ Athu eneereweera ddeko ddenndda kaambiiwa khanaadduwella Attiitthaaka naari miyaano.

⁴ Nave kohuulleellani ddenndda wi enthaweeyo yaphiya muupuwelle wi kahuulleellani. “Ngaallotille nndda vawaambeella kaambiiwa kaari vamodda ni nyuwaano.

Mutteko wa Munepa Waweella

⁵ Koma vano kinaya wa oyo aakirumalle miyaano nave khaavo mmodda a nyuwaano anakikoha wi, ‘Munaya wuuwi?’

⁶ Koma kaambiiwa kohuulleellani nndda, m'murimani mwanyu mooddalla ethakaraka.

⁷ Ddawoona, kinimuulleellani wi tti waphaama wa nyuwaano wi miyaano kinimarowa. Vawi kaahirowa Ookavihera khawa wa nyuwaano. Koma miyaano karowa, kineeromurumiha wa nyuwaano.

⁸ Olliye awa aneerewooniha wa athu a va ellapo yavatthi ddawoona ddiwa dda ochimwa, dda echilungamo ni dda echiweruzo.

⁹ Alliwaayo tti oolakwa va machimo kaambiiwa khenakikhulupilila miyaano.

¹⁰ Alliwaayo tti oolakwa va dda echilungamo kaambiiwa kinaya wa Attiitthaaka nave khamuwa mukoona.

¹¹ Alliwaayo tti oolakwa va dda echiweruzo kaambiiwa oolamulella a va ellapo yavattheella oheeruziwa khalle.

¹² “Kookhalla ni ddeko ddinchichi ddawi kuulleelleni koma khamuwora oddiiwesesa vano.

¹³ Koma Munepa oodduwelliha yawoona aphiya, aneerewuudduwellihani ddawoona ddittheddene. Vawi khallotaka mwa olamulello wa yeekhaaye koma anaalloteke nnddo aniiwekeeye nave aneerekewuulleellani dda ddeko ddamuhoollo.

¹⁴ Aneerokititimiha miyaano kaambiiwa anaakuse nnddo kinalloteemi nave aneerekewuulleellani nyuwaano.

¹⁵ Ddeko ddittheddene dda Attiitthaaka tti ddaaka. Ella sika ekaambiiwa kaallotilleemi wi Munepa Waweella aneerokokusa nnddo kinamulleellekeemi nave aneerekewuulleellani nyuwaano.

Okhupanya oneerotthattuwa ohakallalla

¹⁶ “Vavira enthawi yooyeva khamuwa mukoona miyaano koma vavira enthawi emodda yooyeva muneerokoonattho.”

¹⁷ Oohudderaaye amodda yaakohana mmodda ni mukhwaaye wi, “Anaaka tini analloteeye wi, ‘Vavira enthawi yooyeva khamuwa mukoona miyaano koma vavira enthawi emodda yooyeva muneerokoonattho’? Navettho wi, ‘Kineerorowa wa Attiitthaaka.’

¹⁸ Ottaphullella wene wa ‘enthawi yooyeva’ tti tini? Khaniniwesesa eyo anaakeeye!”

¹⁹ Yesu aadduwella wi yapaalla wi emukohe, sika ahaakoha wi, “Ella sika mwakohaneenyu mmodda ni mukhwaaye wi kaallota wi ‘Vavira enthawi yooyeva khamuwa mukoona miyaano koma yavira enthawi emodda yooyeva muneerokoonattho?’

²⁰ Ddawoona, kinimuulleellani wi muneerewinlla ni woopa ekutho koma athu a ellapo yavatthi eneerohakallalla. Nyuwaano muneerokokhupanya koma okhupanya wanyu eneerotthattuwa ehakallallo.

²¹ Mutthiyana akhalla vakhuviru oyara annakhupanya kaambiiwa enthawaaye yawiiwa ovoreya yoophiya. Koma mwaanooyo ayariwa annatiwalla ovoreya wayenko kaambiiwa annahakallalla wi mwaana ooyariwa.

²² Vano nyuwaano munnakhupanya koma kineerowoonanittho nave mirima ddanyu ddineeroddalla ni ohakallalla. Nave khaavo anawaakheni ohakallalla wanyunko.

²³ “Nllapo nenno naphiya khamukivekattho erive ello. Ddawoona, kinimuulleellani wi mwaveka erive ello wa Attiitthaaka mu nnddina naka, eneerewuuvahani.

²⁴ Ophiyera vano khamuvekille erive ello mu nnddina naka, sika vano vekani nave muneerewaakhella wi muhakallalle murimaanyu muttheene.

Llipani murima

²⁵ “Kohuulleellani ddeko ddenndda mu maphwanaphwaniho. Koma enthawi enimawa yawi ngillota ni nyuwaano mu maphwanaphwaniho koma kinaallote mwawiiweya dda Attiitthaaka.

²⁶ Nllapo nenno naphiya, muneerewaaveka Attiitthaaka mu nnddina naka. Nave khokhalla woopaalleya wi kuuvekellekeni wa Attiitthaaka,

²⁷ vawi Attiitthaaka weekhiiwa ennuukondani nyuwaano. Ennuukondani kaambiiwa munnakikonda miyaano nave munnakhulupilila wi kavenyenre wa Mulluku.

²⁸ Kaavenyera wa Attiitthaaka oya mu ellapo yavatthi nave vano kinimavenyamo mu ellapo yavatthi ohokollweella wa Attiitthaaka.”

²⁹ Oohudderaaye yaallota wi, “Vano munnallota mwawiiweya, moohiphariha mutteko maphwanaphwaniho.

³⁰ Vano ninnadduwella wi munnadduwella ddittheddene nave khamunapaalla wi mmodda uukoheni makoho. Mwa ella ninnakhulupilila wi mwaavenyenre wa Mulluku.”

³¹ Yesu ahaakoha wi, “Munnakhulupilila vano?”

³² Enthawi enimawa nave yoophiya khalle eyo munaapallallesiweenyu, arive muthu owaniwa nave munaakihiye meekhaaka. Koma nginakhalla meekhaaka kaambiiwa Attiitthaaka eri ni miyaano.

³³ Kohuulleellani ddenndda wi mukhalle ni murendelle ekaamba ya miyaano. Ellapo yavatthi eneerewuuhoosani koma llipani murima vawi miyaano koogonjiha ellapo yavatthi.