Yohane 14 - Mawu a Mulluku

Yesu, ettilla ya wa Mulluku

¹ Yesu ahaalleella oohudderaaye wi, “Muhikhupanyeke, mukhulupilileni Mulluku, kikhullupililenittho miyaano.

² Mpa mwa Attiitthaaka mookhalla ezipinda ddinchichi nave kinaya wawuukhozerani nipuro. Ddahaariki ddiiddo keerewuulleellani.

³ Nave kuukhozerani nipuronno, kineerohokollowa wi kuukuseni nithaanane wi mwakhalle nko kinaakhalleemi.

⁴ Nave munnadduwella ettilla ya nko kinayeemi.”

⁵ Tomasi aallota ni olliyooyo wi, “Apwiya, khannadduwella nko munayeenyu. Vano ninaadduwelle mwawiidde ettilla yoophiyera wenko?”

⁶ Yesu aamwaakhulla wi, “Mi tti ettilla, yawoona ni okumi. Khaavo muthu anawa wa Attiitthaaka woohiweella mwa miyaano.

⁷ Vawi mookidduwella miyaano muneerewaadduwellattho Attiitthaaka nave waambeella ollello munnaadduwella nave moowoona.”

⁸ Filipo* ahaakhulla wi, “Apwiya, nooniheni Attiitthiinywaayo nave eneeronikwakhwanella.”

⁹ Yesu ahaakhulla wi, “Kookhalla ni nyuwaano enthawi yoorekama nave khonakidduwelleve miyaano, Filipo? Oyo akoonne miyaano oowoona Attiitthaaka, vano onallotella tini wi, ‘Nooniheni Attiitthaanyu’?

¹⁰ Khonakhulupilila wi miyaano kiri mwa Attiitthaaka nave Attiitthaaka eri mwa miyaano? Mawu ayo kinalloteemi wa nyuwaano nginallota mwa olamulello wa miyaano meekhaaka koma Attiitthaaka ookhalla mwa miyaano enneera mitteko ddiwa mwa miyaano.

¹¹ Kikhulupilileni miyaano wi kiri mwa Attiitthaaka ni Attiitthaaka eri mwa miyaano. Mwaahikikhulupililaka miyaano, khulupililakani ekaamba ya mitteko dda Attiitthaaka.

¹² Ddawoona, kinimuulleellani wi, oyo anakikhulupilila miyaano aneerekoweerattho mitteko kineereemi. Nave aneereweera mitteko dduullupalli ddookhwaranya ddenndda kaambiiwa miyaano kinaya wa Attiitthaaka.

¹³ Nave erive ello munaavekekeenyu mu nnddina naka kineereweera sika wi ntitimiho na Attiitthaaka nineerewooneya mwa miyaano, Mwaana.

¹⁴ Mwakiveka erive ello mu nnddina naka, kineereweera.

Ollotelliwa wa Munepa Waweella

¹⁵ “Mwaakikondaka miyaano muneerothwara malamulwaaka.

¹⁶ Miyaano kineerewaaveka Attiitthaaka nave eneerewuuvahani nyuwaano Ookavihera mmodda oyo anaakhalle ni nyuwaano wa enthawi yoohimalla.

¹⁷ Yoolla tti Munepa a yawoona. Ellapo yavatthi khewora omwaakhella kaambiiwa athu a mu ellapo yavatthi khenamoona apaalle omudduwella. Koma nyuwaano munnamudduwella kaambiiwa ari ni nyuwaano nave anakhalla mwa nyuwaano.

¹⁸ “Karowa, nguuhiyani nyuwaano wonanko akhwaadduni koma kineerohokollweellattho wa nyuwaano.

¹⁹ Yoohalla enthawi yooyeva nave athu a va ellapo yavatthi khewa ekoonattho miyaano koma nyuwaano muneerokoona miyaano kaambiiwa miyaano tti mukumi wa enthawi yoohimalla muneerokhalla akumi wa enthawi yoohimalla.

²⁰ Nllapo nenno muneerodduwella wi miyaano kiri mwa Attiitthaaka nave nyuwaano muri mwa miyaano nave miyaano kiri mwa nyuwaano.

²¹ “Ayo enaakhullella malamulwaaka ni waathwara, sika enakikonda miyaano. Attiitthaaka eneerewaakonda ayo enakikonda miyaano. Nameenettho kineerewaakonda yaayo ni odduupullulla meekhaaka wa alliwaayo.”

²² Yudasi (ohiri Yudasi Isikariyoti) aallota wi, “Apwiya kaambiiwa tini mudduupullulleenyu wa hiyaano nave ohiri wa athu a ellapo yavatthi?”

²³ Yesu aamwaakhulla wi, “Muthu akikonda miyaano aneerothwara mawaaka. Attiitthaaka eneeromukonda nave miyaano ni Attiitthaakaayo nineeroowa wa olliyooyo ni okhalla ni olliye.

²⁴ Oyo ahinakikonda miyaano khanathwara mawaaka. Nave mawu kinaalloteemaalla khe aaka koma enavenyera wa Attiitthaaka ayo yaakirumalle miyaano.

²⁵ “Kohuulleellani ddeko ddenndda kiri ni nyuwaano.

²⁶ Ookavihera, Munepa Waweella, oyo Attiitthaaka enaamurumiiwa mu nnddina naka, aneerewuuhuddihani erive ello ni owuupusani ddeko ddittheddene kuulleelleemini.

²⁷ “Kinuuhiyerani nyuwaano murendelle; murendellaaka kinuuvaheemini. Nginuuvahani nyuwaano wonanko mmo ellapo yavatthi enavahelliiwa. Sika muhikhupanyeke navettho muhooveke.

²⁸ Mwaakiiwa killotaka wa nyuwaano wi, ‘Kinimarowa nave kineerohokollowa wa nyuwaano.’ Mwaakikondilleke, mwaawerohakallalla wi kinaya wa Attiitthaaka vawi Attiitthaakaayo tti uullupalli ohiyana ni miyaano.

²⁹ Vano kohuulleellani yeella ehineereye wi yawa yeereya, mukhulupilile.

³⁰ Ngillotattho ddinchichi ni nyuwaano vano kaambiiwa oolamulella a ellapweella animawa. Koma olliye khanna olamulello va miyaano.

³¹ Koma mwawi ddiidda athu a ellapo yavatthi eneerodduwella wi kinnaakonda Attiitthaaka ni weere erive ello eyo yakilamulalliiwa. “Hankoni nivenyewo wuno.