Yohane 13 - Mawu a Mulluku

Yesu anaahapiha manyallo a oohudderaaye

¹ Vano Ehakallallo ya Paska ehinaphiye, Yesu aadduwella wi enthawaaye yoovenyera mu ellapo yavatthi ni oya wa Attiitthinnya yaaphiya. Ahaakonda oomuthwarellellaaye mu ellapo yavatthi nave aanaakonda ophiyera okhwa waye.

² Nave enthawi ya mugonelo ehinaphiye, Satana aari ahiyalle khalle maganizo m'murimani mwa Yudasi, mwaana a Simoni Isikariyoti wi amuvelleelle Yesu wi iiphiwe.

³ Yesu aadduwella wi Attiitthinnya yaamuvaha olamulello wa ddeko ddittheddene. Nave aadduwellattho wi avenyenre wa Mulluku nave anahokollweella wa Mulluku.

⁴ Sika ahiimella vamugoneloni valle arulla yawiikhuneellaaye nave akusa mpango amakella muyuununi mwaye.

⁵ Nave aahella maaddi mumbaleni aamba ohapiha manyallo a oohudderaaye ni waapukuta ni mpango amakenlleeyoolle.

⁶ Aaphiya va Simoni Petro nave Petro aallota wi, “Apwiya, munaaka mukihapihe manyallwaaka?”

⁷ Yesu ahaakhulla wi, “Vano khoniiwesesa kineereemi koma eneerewiiwesesa muhoollo.”

⁸ Petro aallota wi, “Khamuwa muhapiha manyallwaaka.” Yesu ahaakhulla wi, “Kaahihapiha manyallwaawo, khokhalla oohudderaaka.”

⁹ Simoni Petro ahaakhulla wi, “Apwiya, muhihapihe manyallwaakave! Koma muhapihettho mattaaka ni murwaaka!”

¹⁰ Yesu ahaakhulla wi, “Ayo ehapille aheella wunchichi nave khenapaalleyattho ohapa koma manyallove.” Nyuwaano moheella koma woohikhalla attheenenyu.

¹¹ Vawi Yesu aadduwella khalle oomuvelleella sika kaambiiwa aallotilleeye wi, kheyaari ooweella attheene.

¹² Vano amallihalle ohapiha manyallwiiwa, aawarattho yawiikhuneellaaye nave ahokollweella valle akeraatthilleeye. Nave ahaakoha wi, “Munniiwesesa ella kenreemi?

¹³ Nyuwaano munakeera ‘Ahuddihi’ Navettho ‘Apwiya.’ Munnallota phaama vawi miyaano tti yooyo.

¹⁴ Miyaano, Pwiinyu ni Muhuddihaanyu, koohapiha manyallwaanyu. Sika nyuwaano munnaphwanella ohapihanattho manyallo mmodda ni mukhwaaye.

¹⁵ Vawi kohuuvahani echisanzo wi mweereke wonanko mmo kiweerelleemini.

¹⁶ Ddawoona, kinimuulleellani wi kaporo khanaakhwaranya apwinnya nave oorumiwa khanaakhwaranya oyo anamuruma.

¹⁷ Vano vawi moodduwella ddawoonanndda, nyuwaano tti oodalisiwa mwaweraka ddenndda!

¹⁸ “Nginallota dda nyuwaano attheene vawi kinnamudduwella oyo kamutthoonlleemi. Nave mawu a Mulluku eneerokwakhwanihiwa awi, ‘Muthu oyo aachille ni miyaano embale emodda tti yooyo akiwukilalle.’

¹⁹ Kinuulleellani ddenndda ddihineereye wi ddeereya, mukhulupilile wi miyaano tti meene.

²⁰ Ddawoona, kinimuulleellani wi oyo anamwaakhella muthu oyo kinamurumeemi, anakaakhellattho miyaano. Nave oyo anakaakhella miyaano anamwaakhella oyo aakirumalle.”

Yesu anallotella dda ovelleelliwa wi iiphiwe

²¹ Yesu allotille nndda aahoowa m'murimani mwaye nave aallota moohikhuwa wi, “Ddawoona, kinimuulleellani wi mmodda a nyuwaano aneerokivelleella wi kiiphiwe.”

²² Oohudderaaye yaawehana mmodda ni mukhwaaye ekayikaka wi anamwaaka aani.

²³ Mmodda a oohudderaayo, oyo Yesu aamukondilleeye aakeraatthi vakhuviru ni Yesu.

²⁴ Vano Simoni Petro aamwiithana ni matta allota wi, “Omukohe wi anamwaaka aani.”

²⁵ Sika oohudderooyo aamurukunuwella Yesu amukoha wi, “Apwiya, yooyo ttaani?”

²⁶ Yesu ahaakhulla wi, “Tti oyo kinaamurerelleemi buledi ni omuvaha.” Sika aamukusa buledi, amurera amuvaha Yudasi, mwaana a Simoni Isikariyoti.

²⁷ Nave Yudasi amwaakhenlle buledoolle, Satana aavollowa mwa olliye. Vano Yesu aamulleella wi, “Yeeyo, onapaalleewe weera, erathi mwawaakuva.”

²⁸ Nave khaavo mmodda a yaayo vamugonelonimvo oyo iiwesesille ekaamba eyo amulleellelleeye ddenndda.

²⁹ Vawi kaambiiwa Yudasi aari oosunga nthumba na makobiri, amodda yaaganiza wi Yesu amulleella wi akulle ddoopaalleya dda va Ehakallallo ya Paska. Apaalle wi aavahe makobiri athu oohoowa.

³⁰ Sika amwakhenlleeye buledooyo, enthawi yeeyo aakhuma vaatte. Enthawi yeeyo yaari mahiiyu.

Lamulo nanaanweene

³¹ Vano Yudasi akhumalleeye, Yesu aallota wi, “Vano mi Mwaana a Muthu kootitimihiwa nave ekaamba ya miyaano Mulluku ootitimihiwa.

³² Nave Mulluku aneerotitimihiwa ekaamba ya miyaano, enthawi yeeyo Mulluku aneerokititimiha miyaano.

³³ Akhwaaka, kinaakhalle ni nyuwaano wa enthawi yooyeva. Muneerokaashaasha miyaano koma kinuulleellani vano wonanko mmo kaalleellelleemi attekweene a Ayuda* wi, ‘Khamuwora oya nko kinayeemi.’

³⁴ Nave kinuuwiherani lamulo nanaanweene wi mukondaneke mmodda ni mukhwaaye. Mukondaneke mmodda ni mukhwaaye wonanko mmo kinuukondelleemini.

³⁵ Mwaakondanaka mmodda ni mukhwaaye, arive muthu aneerodduwella wi nyuwaano tti oohudderaaka.”

Yesu anavallallella ollota wi Petro aneeromuruna

³⁶ Simoni Petro aamukoha Yesu wi, “Apwiya, munaya wuuwi?” Yesu ahaakhulla wi, “Khowora okithwara wenko kinayeemi vano koma eneerokithwara muhoollo mwiwa.”

³⁷ Petro aallota wi, “Apwiya, ngiwora wuuthwarani nyuwaano vano kaambiiwa tini? Miyaano kinnapaalla okhwa ekaamba ya nyuwaano.”

³⁸ Yesu ahaakhulla wi, “We onnapaalla okhwa ekaamba ya miyaano? Kinimuulleella ddawoona wi, mutthupi ohininlle oneerokikhoota oraru.”