Yohane 12 - Mawu a Mulluku

Yesu anazoziwa ni makhura o Betaniya

¹ Ehanlle mallapo matthanu ni nimodda Paska ahinaphiye, Yesu aaya o Betaniya owaniwa wa Lazaro, muthu olle Yesu aamuvenyihalleeye wa ookhwa.

² Yaamukhozera yoocha wenko. Marita aarumeyella nave Lazaro aari mmodda a yaayo yachana vamodda ni Yesu.

³ Vano Mariya aakusa makhura a nthuko naphaama oowallamella mutengo oopangiwa ovenyera o ddoomella ddooromolliwa narido ookwakhwana hafu lita. Aazoza manyallo a Yesu ni waapukuta ni meehaaye. Nthuko nawunkhella na makhura yaayo naaddalla mpa mutthemwene.

⁴ Nave Yudasi Isikariyoti, mmodda a oohuddera, oyo anamuvelleella wi iiphiwe aallota wi,

⁵ “Kaambiiwa tini makhura yaalla yahikullihiwiiwa voowallamella mutengo ni waavaha makobiraayo athu oohoowa?”

⁶ Aallotille nndda ohiri kaambiiwa aanaapwatha ohoowa koma kaambiiwa aari mullupaawiiya. Olliye aari oosunga nthumba na makobiri nave aaniiyamo.

⁷ Yesu aallota wi, “Muhiyeni yooyo, aasunga makhura yaalla okhozekella va nllapo na ovitthiwa waka.

⁸ Vawi munnakhalla ni athu oohoowa mallapo mattheene koma khamukhalla ni miyaano mallapo mattheene.”

Opangana ddoomwiipha Lazaro

⁹ Vano mulloko muullupalli wa Ayuda wahiiwa wi Yesu aari o Betaniya. Sika yaaya wenko ohiri ekaamba ya Yesuve komattho wi yamoone Lazaro, oyo aavenyihiwe wa ookhwa.

¹⁰ Sika allupa mukutho uullupalli yahiiwanana wi yamwiiphettho Lazaro.

¹¹ Vawi ekaamba ya Lazaro Ayuda anchichi yaanaahiya alliwaayo enakhulupilila mwa Yesu.

Ovollowa wa Yesu mu Yerusalemu

¹² Osaka wene mulloko muullupalli wa athu ayo yawiille o Ehakallallo ya Paska yahiiwa wi Yesu aamawa o Yerusalemu.

¹³ Sika yaakusa enthambi dda miteekho ddakanjeza eya woomuchingamella yooyo, ekhuwaka wi, “Ntitimiho nikhalle wa Mulluku! Oodalisiwa oyo anawa mu nnddina na Apwiya! Oodalisiwa Mwene a o Israele!”

¹⁴ Nave Yesu aamoona mwaana a bulu awella va yooyo wonanko mmo mwaalembiwe wi,

¹⁵ “Muhoove, nyu athu a Ziyoni! Ngoonani, mwenaanyu animawa wa weyaano, amuwenlle mwaanabulu.”

¹⁶ Oohudderaaye kheyaawiiwesesa nndda va enthawi yeeyo koma Yesu aavenyihiweeye mwa ntitimiho, yahuupuwella wi nndda ddaalembiwa dda olliyooyo nave wi yaamweerella nndda.

¹⁷ Vano athu ayo yaari vamodda ni Yesu, valle aamwiithanneeye Lazaro wi akhume mu mahame ni omuvenyiha wa ookhwa yaanavuwiha ddamweereyelle Lazaro.

¹⁸ Ella sika ekaambiiwa athwaayo yawiilliiwa woomuchingamella vawi yahiiwa wi olliye aheera yoottikhiniha yeella.

¹⁹ Vano Afarisi* yaallota mmodda ni mukhwaaye wi, “Munnoona wi noolephela vano! Ngoonani, ellapo yavatthi ettheene enamuthwara olliye.”

Agriki amodda enamwaashaasha Yesu

²⁰ Agriki* amodda yaari nimodda ni ayo yawiille o Yerusalemu woomullapella Mulluku va Ehakallallo ya Paska.

²¹ Nave alliwa yaaya wa Filipo* o Betisaida mu Galileya, emulleella wi yapaalla emoone Yesu.

²² Filipo aaya amulleella Andreya nave eellaayo yaaya yamulleella Yesu.

²³ Nave Yesu ahaakhulla wi, “Enthawi yoophiya vano yawi mi Mwaana a Muthu kititimihiwe.”

²⁴ Ddawoona, kinimuulleellani wi, mmiddo wa tirigu waahimora muthayani, okhwa, yooyo onakhalla va weekhiiwa. Koma wakhwa onimma ezipaso ddinchichi.

²⁵ Oyo anakonda okumaaye eneerowutathilla nave oyo aniitana ni okumaaye mu ellapo yavattheella aneerokhalla ni okumi woohimalla.

²⁶ Muthu aakirumeyellaka miyaano, akithware miyaano vawi wenko kinaakhalleemi oorumeyellaaka anaakhallettho wenko. Nave Attiitthaaka eneeromuriiha oyo anakirumeyella.

Yesu anallota dda okhwa waye

²⁷ “Vano murimaaka wookatamihiwa. Nave kinaallote tini? Killote wi, ‘Attiitthaaka, muhaakhullelle wi enthawi yookatamiheella ekiphiyere miyaano?’ Koma kaawa ekaamba ya ddookatamiha ddenndda.

²⁸ Sika Attiitthaaka onihellani ntitimiho nanyu!” Vano mawu yahiiweya ovenyera oddullu awi, “Kohooniha ntitimiho naka nave kineerewooniha wiilli.”

²⁹ Athu yiimenlle vaavo yahiiwa mawaayo nave amodda a yaayo yaallota wi, “Waari ogugudeya,” Amodda yaallota wi, “Mungelo oollota ni olliyooyo.”

³⁰ Yesu aallota wi, “Mawu yaalla kheyaawiweyille ekaamba ya miyaano koma ekaamba ya nyuwaano.

³¹ Vano ella sika enthawi yaweeruza ellapo yavattheella nave oolamulella a ellapo yavattheella aneerovokhiwa otte.

³² Nave miyaano katthomeyiwa vamutandani, kineerewaatthukumaniha athu attheene wa miyaano.”

³³ Aallotille nndda wi oonihe mmo anaakhwelleeye.

³⁴ Athwaalle yaamwaakhulla wi, “Nahiiwa hiyaano m'malamuloni wi Mesiya* aneerokhalla ni okumi woohimalla. Sika kaambiiwa tini nyuwaano munallotelleenyu wi Mwaana a Muthu anaphwanella otthomeyiwa vamutandani? Mwaana a Muthu yoolla ttaani?”

³⁵ Yesu ahaakhulla wi, “Owala onaakhalle ni nyuwaano mu enthawi yooyeva. Etani vano muriinyuna owala wi epiphi ehuuphwanyeni. Oyo aneeta mwiipiphini khanadduwella nko anayeeye.

³⁶ Khulupililani owala enthawi yeeyo muriinyu mu owala wi mukhalle athu a owala.” Yesu amallihalle ollota ddenndda, aavenyavo iipittha.

Ohikhulupilila wa athu

³⁷ Naari enre ddoottikhiniha ddinchichi wa athwaayo, kheyaamukhulupililalle olliyooyo,

³⁸ wi ddoollotiwa ni namallotella Yesaya ddakwakhwanihiwe ddawi, “Apwiya, ttaani aakhulupililalle othengaahu? Nave masiva a Apwiya yuupullulliwe wa aani?”

³⁹ Sika kheyaaworille okhulupilila kaambiiwa Yesaya aallotattho wi,

⁴⁰ “Mulluku aaweeriha miitthwiiwa okhalla oohoona, ahummiha mirima ddiwa. Ddahaariki ddiiddo miitthwiiwa yaweerekowoona, nave mirima ddiwa ddeerekewiiwesesa, wi emurukunuwelle olliye wi aachirihe.”

⁴¹ Yesaya aallotille ddenndda kaambiiwa ahoona ntitimiho na Yesu nave allotella dda olliyooyo.

⁴² Vano attekweene a Ayuda* anchichi yaamukhulupilila Yesu. Koma ekaamba ya Afarisi khayooniha vaweella woova wi kheyaakhullelliwa ovollowa mu enyumba yamavekello.

⁴³ Vawi yaakonda waakhella olemu wa athu ohiyana ni waakhella olemu wa Mulluku.

⁴⁴ Yesu aakhuwa wi, “Oyo anakhulupilila mwa miyaano, khanakhulupilila mwa miyaanove koma mwa oyo aakirumalle.

⁴⁵ Nave oyo anakoona miyaano, anamoona oyo aakirumalle.

⁴⁶ Mi tti owala wawiille mu ellapo yavatthi wi arive muthu anakhulupilila mwa miyaano ahikhalle mu epiphi.

⁴⁷ Mmodda iiwa mawaaka ahaathwara, ngimweeruza. Vawi miyaano ngaawiille wi keeruze ellapo yavatthi koma wi kiyivulluse.

⁴⁸ Oyo anakikhoota miyaano ahinaakhella mawaaka ookhalla ni oomweeruza. Mawu killonteemaalla eneerokhalla aweeruzaaye va nllapo noomallihella!

⁴⁹ Vawi ngillotille mu olamulello wa meekhaaka koma Attiitthaaka yaakirumalle aakilamula miyaano yoollota ni yowaakhulla.

⁵⁰ Nave kinnadduwella wi enalamula nnddo ddinavaha okumi woohimalla. Vano kinalloteemi tti nnddo Attiitthaaka ekilleelliiwa.”