Yohane 11 - Mawu a Mulluku

Okhwa wa Lazaro

¹ Muthu mmodda, nnddina naye Lazaro aamavoriiwa. Akhalla o Betaniya, m'muzi mmo Mariya ni mwanamunne Marita yakhalliiwa.

² Mariya yoolla tti olle aazozille Apwiya makhura a nthuko naphaama ni waapukuta manyallwiiwa ni meehaaye. Lazaro oovoriiwooyo aari murokoriye.

³ Vano arokoriyaayo yaamurumiha amithenga wa Yesu, allota wi, “Apwiya, mukhwiinyu ookondiwa animavoriiwa.”

⁴ Yesu iiwalleeye aallota wi, “Ovoriiwanko khori wookhwana koma tti ekaamba ya ntitimiho na Mulluku wi miyaano Mwaana a Mulluku kititimihiwena.”

⁵ Vano Yesu aanaakonda Marita ni mwanamunne ni Lazaro.

⁶ Naari iiwalle wi animavoriiwa aakhalla mallapo meelli vanipuroni vaavo.

⁷ Vano ddiviralle nndda ahaalleella oohudderaaye wi, “Hankoni nihokollweelle o Yudeya.”

⁸ Oohudderaalle yahaakhulla wi, “Ahuddihi, Ayuda wenko yaheeseesa owiiphani vawuuvokhani malluku nave vano munayattho wenko?”

⁹ Yesu ahaakhulla wi, “Otthaana onakhalla maora khumi ni meelli, khe ddiiddo? Muthu eeta otthaana khanakwakwatuwa vawi annoona ekaamba ya owala wa ellapo yavatthi.

¹⁰ Koma muthu eeta mahiiyu annakwakwatuwa vawi khanna owala.”

¹¹ Vano Yesu aallotattho wi, “Mukhwiihu Lazaro animakona nave kinaya kamuvenyihe.”

¹² Oohudderaalle yahaakhulla wi, “Apwiya aarimi akonaka, aneerochira.”

¹³ Yesu allota dda okhwa wa Lazaro koma alliwaayo yaganiza wi allota dda okona wa ekhove.

¹⁴ Sika Yesu ahaalleella moohikhuwa wi, “Lazaro ookhwa

¹⁵ Nave kinnahakallalla wi miyaano ngaariwo wenko sika muneerokhulupilila. Vano hankoni niye wa olliyooyo.”

¹⁶ Vano Tomasi, ooromolliwa Didimo, ahaalleella oohuddera akhwaaye wi, “Hankoni niyeewo wi nakhwena vamodda ni Yesu!”

Yesu annaavenyiha athu wa ookhwa ni waavaha okumi

¹⁷ Yesu aphiyalleeye o Betaniya, aamuphwanya Lazaro akhanlle mu mahame mallapo masese.

¹⁸ Betaniya aari vakhuviru ni Yerusalemu orekamella waye waatamella makilomita mararu.

¹⁹ Nave Ayuda anchichi yaari ewiille wa Marita ni Mariya wi yaakhurumuse murima ekaamba ya okhwa wa Lazaro.

²⁰ Vano Marita iiwalleeye wi Yesu animawa, aaya woomuchingamella koma Mariya aahalla mpa.

²¹ Marita aamulleella Yesu wi, “Apwiya, mwakhanlleke wuno, murokoraka khaakhwe!

²² Koma kinnadduwella wi ddeko ddittheddene munaavekeenyu wa Mulluku aneerewuuvahani.”

²³ Yesu aamulleella wi, “Murokoriyo aneerovenya wa ookhwa.”

²⁴ Marita aallota wi, “Kinnadduwella wi aneerovenya wa ookhwa nllapo noomallihella, nno athu attheene enaavenyihiwiiwa.”

²⁵ Yesu aamulleella wi, “Mi tti oyo anaavenyiha athu wa ookhwa ni waavaha okumi. Ayo enakikhulupilila miyaano aneerokhalla ni okumi woohimalla naari ekhwille.

²⁶ Nave oyo ari mukumi nave anakikhulupilila miyaano khawa akhwa. Onnakhulupilila ddenndda?”

²⁷ Ahaakhulla wi, “Ddawoona, Apwiya kinnakhulupilila wi nyuwaano tti Mesiya,* Mwaana a Mulluku oyo namutiyeraahu wi awe mu ellapo yavatthi.”

Yesu anamuvenyiha Lazaro wa ookhwa

²⁸ Marita allotilleeye ella, aamwiithana mwanamunne Mariya vaweekhiiwa nave aamulleella wi, “Ahuddihi aaphiya nave ennawiithana weyaano.”

²⁹ Nave Mariya iiwalleeye nndda, aatimulla mwawaakuva aya wa olliyooyo.

³⁰ Yesu aari ahinaphiye owaaninko nave aari vanipuroni mvo Marita akumanneeyena.

³¹ Vano Ayuda ayo yaari mpa, emukhurumusaka murima, yaamoona Mariya atimullalle mwawaakuva akhumaka vaatte. Alliwaayo yaamuthwara vawi yaganiza wi anaya o mahame wi inlleke wenko.

³² Mariya aaphiya vaari Yesu nave aamoonilleeye, aakokhora vakhuviru ni Yesu allota wi, “Apwiya, mwakhanlleke wuno murokoraka khaakhwe!”

³³ Yesu aamoonilleeye Mariya ni Ayuda ayo yaari ni olliye yinllaka, aahoowa wunchichi m'murimani mwaye.

³⁴ Ahaakoha wi, “Mumuvitthalle wuuwi?” Yahaakhulla wi, “Apwiya, hankoni moone.”

³⁵ Vano Yesu ahinlla.

³⁶ Sika Ayudaalle yaallota wi, “Ngamooneni, aamukonda wunchichi!”

³⁷ Nave amodda a yaayo yaallota wi, “Muthu yoolla aamooniha muthu oohoona. Khaawonre omweeriha Lazaro wi ahikhwe?”

³⁸ Vano Yesu, aahoowattho m'murimani mwaye, aawa o nihame. Naari nikhungu nave nlluku naahiyiwa vamullakoni vaye.

³⁹ Yesu aalamula wi, “Venyihaniwoni nllukunno!” Marita, murokoriye a ookhooyo, ahaakhulla wi, “Apwiya, mutembwaaye wohaamba wunkha vawi wookhallamo mumahamenimmu mallapo masese!”

⁴⁰ Yesu aallota wi, “Ngawuulleelle wi wakhulupilila oneerewoona ntitimiho na Mulluku?”

⁴¹ Sika yaavenyihavo nllukunne. Nave Yesu aaweha oddullu allota wi, “Attiitthaaka, kinnuuthokozani wi munnakiiwellella miyaano.

⁴² Kinnadduwella wi munnakiiwa miyaano mallapo mattheene koma kinallota ella ekaamba ya athwaalla wi ekhulupilile wi mwaakiruma.”

⁴³ Nave allotille nndda, aakhuwa wi, “Lazaro, khuma!”

⁴⁴ Nave ookhooyo aakhuma ari oomakiwa meto ni matta ni ekuwo ahuruwelliweeyena ni ekhovaaye ekhuneelliwe ni ekuwo. Yesu ahaalleella athwaayo wi, “Muttaphulleni nave muhiyeni aroweke.”

Opanganella ddoomwiipha Yesu

⁴⁵ Anchichi a Ayuda, ayo yawiille wa Mariya nave yoona eyo Yesu eerilleeye, yaakhulupilila mwa olliyooyo.

⁴⁶ Koma amodda mwa yaayo yaaya wa Afarisi* yaalleella nnddo Yesu eerilleeye.

⁴⁷ Sika allupa mukutho uullupalli ni Afarisi yahiithaniha mutthukumano wa attekweene a millatu a Ayuda,* ellota wi, “Nineere tini hiyaano? Vawi muthoolla anneera ddoottikhiniha ddinchichi.

⁴⁸ Namuhiya mwawi ddiidda arive muthu aneerokhulupilila mwa olliyooyo nave Aroma* eneeroowa wi yoononge enyumbaahu ya Mulluku ni mutundwaahu.”

⁴⁹ Nave mmodda a yaayo, nnddina naye Kayafa, oyo aari owaahoollella allupa mukutho uullupalli muyakha yooyo, aallota wi, “Khamunadduwella munalloteenyu.

⁵⁰ Khamunoona wi tti waphaama wa nyuwaano wi muthu mmodda akhwe munipuroni na athu attheene ohiyana wi mutundu muttheene woonongeye.”

⁵¹ Khaallotille ella mwa olliye yeekhaaye koma vookhallani oohoollella a allupa mukutho uullupalli muyakha yooyo, allotella wi Yesu aneerokhwa munipuroni na mutundooyo,

⁵² ohiri munipuroni na mutundu yooyove komattho wi aatthukumanihe vamodda anamwani a Mulluku ayo yaapallalleyille.

⁵³ Sika waambeella nllapo nenno attekweene a Ayudaalle* yahiiwanana wi emwiiphe Yesu.

⁵⁴ Sika Yesu khaaweteentettho mwawooneya vamiitthoni va Ayuda koma aavenyavo aya o echigawo yawaatamella echipululu, o etawoni yooromolliwa Efuraimu. Wenko aakhallawo ni oohudderaaye.

⁵⁵ Vano Ehakallallo ya Paska a Ayuda yahaatamella. Sika athu anchichi yaavenyera m'muzi oya o Yerusalemu Paskooyo ahinaphiye wi yeellihiwe.

⁵⁶ Vano yaamwaashaasha Yesu nave yatthukumanniiwa mu enyumba ya Mulluku yaakohana wi, “Ethiyo yoolla aneeroowa o ehakallallweella? Maganizwaanyu tti awi tini?”

⁵⁷ Vano allupa mukutho uullupalli ni Afarisi yaalamula wi muthu mmodda adduwella nko ariiyewo, aalleelle wi yammake.