Yohane 1 - Mawu a Mulluku

Mawu owaavaha athu okumi

¹ Vawaambawaamba oyo aneeriwa Mawu aari arivo khalle. Mawu yaayo yaari wa Mulluku nave Mawu yaalla tti Mulluku.

² Ovenyera vawaambawaamba Mawu yaayo yaari wa Mulluku.

³ Mulluku aaphatusa ddeko ddittheddene oweella mwa Mawu nave kheyiivo ello naari emodda yaphatusiwe yahaarikivo yaayo.

⁴ Mwa yaayo mwaakhalla okumi nave okumooyo waari owala wa athu.

⁵ Nave owalanko onnamolleella mwiipiphini nave epipheeyo khenathiimiha owalanko.

⁶ Mulluku aamurumiha muthu, nnddina naye Yohane.

⁷ Olliye aawa wi akhalle mboni a owalanko wi attheene ekhulupilile ekaamba ya ombonaaye.

⁸ Olliyoolla khaari owalanngu koma aawa wi akhalle mboni a owalanngu.

⁹ Nngu sika owala wawoona nko onavollowa mu ellapo yavatthi ni omolleella va athu attheene.

¹⁰ Oyo eeriwa Mawu aari mu ellapo yavatthi nave naari Mulluku aphatusalle ellapo yavatthi oweella mwa olliye koma ellapo ya vattheeyo kheyaamudduwenlle.

¹¹ Olliye aawa owaniwa koma athu a owaniwaayo kheyamwaakhenlle.

¹² Koma attheene ayo yamwaakhenlle olliye ahaavaha masiva wi ekhalle anamwani a Mulluku, wa ayo yakhulupililalle nnddina naye.

¹³ Okhalla mwaana a Mullukunngu khawaavenyenre mu oyariwa woomuthwiiwa apaalle o opaalla wa mwiilli apaallettho o opaalla wa muthu koma wavenyenre wa Mulluku.

¹⁴ Mawu yaalla yaakhalla muthu, ooddalla ni echisomo ni yawoona, ekhalla variyari vahu. Nahoona ntitimiho naye, ntitimiho nno aakhenlleeye wa Attiitthinnya vookhallani mwaniwa mmoddave.

¹⁵ Vano Yohane aavelleella omboni dda olliye. Aakhuwa wi, “Olla sika kamwaakeemi kalloteemi wi, ‘Animawa vatulli vaka nave tti ookikhwaranya kaambiiwa miyaano kihinayariwe aari arivo khalle.’ ”

¹⁶ Ovenyera mu oddalla wa echisomwaaye olliye oonidalisa hiyaano attheene nave oonivaha echisomo moowaata.

¹⁷ Mulluku aanivaha malamulo oweella mwa Mose koma echisomo ni yawoona ddaawa oweella mwa Yesu Khrisitu.

¹⁸ Khaavo muthu amoonille Mulluku koma mwaana mmoddave oyo arittho Mulluku nave oyo ari a vamurimani vaye sika amuupullullalle.

Othenga wa Yohane Oobatiza

¹⁹ Olla sika omboni wa Yohane mvo attekweene a Ayuda* a o Yerusalemu yaarumalliiwa allupa mukutho ni Alevi, oorumeyella allupa mukutho wi yamukohe Yohane wi, “We ttaani?”

²⁰ Yohane khaakhootille owaakhulla koma aallota mwawiiweya wi, “Mi khe Mesiya.”*

²¹ Yaamukoha wi, “Vano weyaano ttaani? Weyaano tti namallotella Eliya?” Yohane ahaakhulla wi, “Mi khe Eliya.” Yaakoha wi, “We tti namallotella?” Ahaakhulla wi, “Khe miyaano.”

²² Yaallota wi, “We ttaani? Ninnapaalleya wi naalleelle phaama ayo yaanirumalle hiyaano. Onallota tini dda weyaano weekhaawo?”

²³ Yohane ahaakhulla voollotani mawu a namallotella Yesaya wi, “Mi tti okhuwa wa muthu mmodda muchipululuni, onallalleya wi, ‘Okollani musewu wa Apwiya.’ ”

²⁴ Nave athwaayo yarumiwe ni Afarisi.*

²⁵ Nave yaamukoha wi, “Kaambiiwa tini onabatizeewe ohiri Mesiya apaalle Eliya naari namallotella?”

²⁶ Yohane ahaakhulla wi, “Kinuubatizani ni maaddi koma variyari va nyuwaano vohiimella muthu mmodda muhinamudduwelleenyu.

²⁷ Animawa mutulli mwaka nave miyaano ngiphwanenlle naari ottaphulla mikwe dda esapato ddaye.”

²⁸ Ddeko ddittheddenenndda ddaheereya mu etawoni ya Betaniya, okhopella wa muhinje wa Yordani nko Yohane aariiye abatizaka.

Yesu, Mwaanaankhosa a Mulluku

²⁹ Osaka wene Yohane aamoona Yesu awaaka wa olliyooyo nave allota wi, “Ngamooneni! Mwaanaankhosa a Mulluku oyo anavenyiha machimo a ellapo yavatthi.

³⁰ Olla sika kamwaakeemi kalloteemi wi, ‘Animawa vatulli vaka nave tti ookikhwaranya kaambiiwa miyaano kihinayariwe aari arivo khalle.’

³¹ Miyaano ngaamudduwenlle wi aari wonanko aani koma kaawa kibatizaka ni maaddi wi adduwelliwe ni athu a o Israele”

³² Nave Yohane aavelleella omboni allota wi, “Kahoona Munepa Waweella akitthaka wonanko ekhunda avenyeraka oddullu nave akhalla va olliyooyo.

³³ Miyaano ngaamudduwenlle wi aari wonanko aani koma Mulluku oyo aakirumihalle wi kibatize ni maaddi, aallota wa miyaano wi, ‘Oneerewoona Munepa Waweella akitthaka nave aneerokhalla va muthu. Yooyo sika anabatiza ni Munepa Waweella.’

³⁴ Sika kohoona yeella nave koovelleella omboni wi yoolla tti Mwaana a Mulluku.”

Oohuddera awaamba a Yesu

³⁵ Osaka wene Yohane ahiimella vamodda ni eelli a oohudderaaye.

³⁶ Aamoonilleeye Yesu aviraka aallota wi, “Mwaanaankhosa a Mulluku.”

³⁷ Oohuddera eellaalle yaamwiiwa olliyooyo allotaka yeella nave yaamuthwara Yesu.

³⁸ Yesu aarukunuwa awoona alliwa emuthwaraka nave ahaakoha wi, “Munaasha tini?” Yaamwaakhulla wi, “Munakhalla wuuwi, Rabi?” (Rabi anattaphullella, Muhuddihi.)

³⁹ Olliye ahaakhulla wi, “Waawoni moone.” (Enthawi yeella yaari yaatamenlle 4 koloko misikuwa.) Yaawa yoona mvo akhalleeye nave yaakhalla ni olliyooyo nllapo nenno.

⁴⁰ Mmodda a eelli ayo yamwiiwalle Yohane allotaka nave yamuthwanre Yesu aari Andreya, mwanamunne a Simoni Petro.

⁴¹ Enthawi yeeyo aaya wa mwanamunne Simoni nave aamulleella wi, “Hi noomphwanya Mesiya.” (Mesiya anattaphullella Khrisitu.)

⁴² Eerille ddiiddo aamukusella Simoni wa Yesu. Yesu aamuweha allota wi, “We tti Simoni, mwaana a Yohane koma oneeroromolliwa Kefa.” (Petro ottaphullella nlluku.)

⁴³ Osaka wene Yesu aapaalla oya o echigawo ya Galileya. Aamuphwanya Filipo,* amulleella wi, “Kithware!”

⁴⁴ Filipo aari oovenyera o etawoni ya Betisaida, owaniwa wa Andreya ni Petro.

⁴⁵ Vano Filipo aamuphwanya Natanaele nave aamulleella wi, “Noomuphwanya oyo malamulo a Mose ni ehuddiho ya anamallotella yamwaakiiwa. Tti Yesu a o Nazareti, mwaana a Yosefe.”

⁴⁶ Natanaele ahaakoha wi, “Ethiyo o Nazareti ttuuvenyera ello yaphaama?” Filipo ahaakhulla wi, “Waawo woone.”

⁴⁷ Yesu amoonilleeye Natanaele awaaka wa olliye, aallota dda olliyooyo wi, “Olla sika mu Israele awoona, mwa olliyooyo khamuri woottha.”

⁴⁸ Natanaele aamukoha wi, “Mwaakidduwenlle miyaano mwawiidde?” Yesu ahaakhulla wi, “Kaawoona weyaano vatthi va muteekho wanamukuyu, Filipo ahinawiithane.”

⁴⁹ Natanaele ahaakhulla wi, “Muhuddihi, nyuwaano muri Mwaana a Mulluku! Nyuwaano muri Mwene a Israele!”

⁵⁰ Yesu aallota wi, “Onakhulupilila kaambiiwa kahuulleella wi kaawoona weyaano vatthi va muteekho wanamukuyu? Oneerewoona ddeko dduullupalli ddookhwaranya ddenndda!”

⁵¹ Nave aallota wa yaayo wi, “Ddawoona, kinimuulleellani wi muneerewoona oddullu woohulleya nave angelo a Mulluku ewellaka ni ekitthaka vakhuviru ni miyaano Mwaana a Muthu.”